Read Te B'aib'ara 1.Rongorongo 23 Bible Online

1.Rongorongo 23 - Te B'aib'ara bible

1.Rongorongo 23

¹E a bon kara Tawita ngke e rinea natina te m'aane are Toromon b'a e na uea i aon Iteraera.

²Tabeua te tai i mwiina, ao e weteia taani kairiiri Tawita mai aon Iteraera, ma ibonga, ao kanoan Rewi.

³E wareki m'aitiia m'anen Rewi ake kakatenibwi rake aia ririki ni maiu, ao bootaia bon 38,000.

⁴Ao e taku, “Ana tabeakina te Tembora kanoan Rewi akana 24,000, ao akana 6,000 a na riki b'a mataniwi i nanon te Tembora ao a na riki naba b'a taani moti,

⁵akana 4,000 a na riki b'a taan tei n te Tembora, ao 4,000 a na neboa te UEA ni katang taiani b'ai ni katangitang ake I a tia n anganiia.”

⁶Ao i mwiina, e bwenauaia kanoan Rewi Tawita nakon tenikoraki n aron aia kaainga nako natin Rewi m'aane ake Kerition, Koata, ao Merari.

⁷Bon iai natin Kerition m'aane aika uoman: Ratan ao Timei.

⁸Ratan bon tamaia Ieiera, Tetam, ao Ioera.

⁹Bon taani kairiiri ngaiia ni kabane i buakoia ana kariki nako tamaia. Timei bon tamaia Teremota, Atiera, ao Aran.

¹⁰Rimwi, a manga reke riki natin Timei aika aman m'aane aika a bungiaki n aron aei man te karimoa nakon te karimwi:

¹¹Iaata, Tita, Ieuti, ao Beria. Ma akea natiia Ieuti ma Beria, ma ngaia are, a warekaki kanoaia b'a ti teuana n utu.

¹²Bon iai natin Koata aika aman m'aane: Amram, Itiia, Eberon, ao Utiera.

¹³Amram bon tamaia Aaron ma Moote. A rineaki Aaron ma ana kariki b'a taani kaawakin b'aai aika a tabu. Aia m'akuri iroun te UEA bon te anga karea nakoina ao kakab'aiakiia aomata n arana.

¹⁴Moote are ana aomata te Atua bon tamaia Keritiom ao Erietera,

¹⁵ao a atongaki aia kariki b'a kanoan Rewi.

¹⁶Natin Keritiom are te karimoa te m'aane bon Tebuera.

¹⁷A m'aiti natin Reabia are bon ti natin Erietera te m'aane.

¹⁸Ana kauoman n nati te m'aane Koata bon Itiia, ao a na karimoa te m'aane bon Teromota.

¹⁹Eberon, are ana kateniman n nati te m'aane Koata, bon tamaia Ieria, Amaria, Iaatiera, ao Iekameam.

²⁰Natin Koata are te bina te m'aane are Utiera, bon tamaia Mika ao Itiia.

²¹Bon iai natin Merari aika uoman m'aane: Mari ao Muti. Mari bon tamaia Ereata ma Kiti.

²²Bon akea natin Ereata m'aane, ma ti natina aine aika a mare ma natin tarin tamaia.

²³Ao Muti are natin Merari te m'aane are te kauoman, bon tamaia Mari, Etera, ao Ieremota.

²⁴Bon aikai taiani kaainga ao utu man te baronga are Rewi. Aikai koraki ake uabwi ni waerake aia ririki ni maiu ake a anganaki tib'angaia b'a te m'akuri n ana Tembora te UEA.

²⁵Ao e taku Tawita: E a tia te UEA ae Atuan Iteraera n anga te rau nako ia ana aomata, ao E na maeka i Ierutarem n aki toki.

²⁶Ma ngaia are, a aki tangiria kanoan Rewi ni kam'ainga te Um'antabunrianna ao b'aai aika a kakabonganaaki n te taromauri man te tabo teuana nakon te tabo teuana.

²⁷Ni moa man te tai aei, ao kanoan Rewi ni kabane akana man uabwi rake aia ririki ni maiu

²⁸ana m'akuri i bukin te UEA ni buokiia ana kariki Aaron ni m'akuri n te Tembora, ni kaitiaki katawanangin nako te Tembora ao ruun naba te Tembora, ao taan tararuaia naba b'a a na bane ni itiaki b'aai nako aika a kabonganaaki i bukin te taromauri.

²⁹Bon tabeia naba tararuaakin te kariki are e tabu, ao te buraawa are b'ain te karea are te uita, taian kariki are a mmani, ao karea ni kabane ake a umunaki, ao te buraawa are e renganaki ma b'aan te oriwa. Bon kanoan Rewi aikai ake a na baairei rawaawatan ma m'aitin taiani karea.

³⁰A na katoa ingabong ao tairiki kanoan Rewi n anganga aia kaaitau nakon te UEA ao n anene nebonebo nakoina.

³¹A na riai naba n anga aia kaaitau ao n anene n nebonebo ngkana e tabe ni waaki te angakarea ni katoa Taabati,[64] ao ai uana naba ni katoa te Toa ae Moan Otin Nam'akaina ao bootakin riki te aro ake tabeua. A na riai n tau m'aitiia n taai nako kanoan Rewi aika a na m'akuri n te Tembora ni karaoi baika a tangiraki ni katiaaki.

³²Bon tabeia ngkoa kaawakinan te Um'antabunrianna, ma ngkai ai manga tabeia tararuaakin te Tembora ao buokakiia ana kariki Aaron.