Read Te B'aib'ara 1.Rongorongo 26 Bible Online

1.Rongorongo 26 - Te B'aib'ara bible

1.Rongorongo 26

¹A bwenauaaki naba taan tantani n te Tembora nakon taiani m'akoro ni kaineti ma aia kaainga nako. Meteremia are natin Kore te m'aane man te kaainga are Kora bon ana kariki Ataba.

²Bon iai natina m'aane aika itiman aika a bungiaki n aron aei man te karimoa nakon te karimwi: Tekaria, Ieriaera, Teb'aria, Iateniera

³Eram, Ieoanan, ao Erioenai.

⁴E a tia ni kakab'aiaki Obeta-Etom ma natina m'aane ake waniman:

⁵Temaia, Ieotabata, Ioa, Taka, Netanera, Ammiera, Itakara, ao Beuretai.

⁶Temaia bon tamaia Oteni, Reb'aera, Obeta, Eretabata, Eriu, ao Temakia.

⁷Bon taani kairiiri ngaiia aika a karineaki man aia kaainga.

⁸Bon onongaun ma uoman m'aitiia ana kariki Obeta-Etom aika a bon tau korakoraia n teiakina te Tembora.

⁹Tengaun ma waniman ana kariki Meteremia aika a rineaki i bukin te m'akuri aei.

¹⁰Ota are kaain te kaainga are Merari boni ngaia tamaia Timri, Irekeia, Teb'aria, ao Tekaria.

¹¹E a tia Ota ni karika Timri b'a te tia kairiiri n te utu, e ngae ngke tiaki ngaia te karimoa te m'aane. Tengaun ma teniman man ana utu Ota ake a rineaki b'a taan tantani n te Tembora.

¹²A bwenauaaki taan tantani nakon taian m'akoro i aaia aia taani kairiiri n aia utu, ao a anganaki tabeia n te Tembora, n aroia kanoan Rewi ake tekorakina.

¹³Ao a anganaki tabeia te mataroa b'a a na tantani iai, ao a kakaea nanon te Atua b'a tera ae e tangiria b'a a na karaoia. [66]

¹⁴E rineaki Teremia [67] b'a te tia tantani n te Mataroa are i Mainiku. Natina te m'aane are Tekaria bon te aomata ae e wanawana ngaia are e rineaki b'a te tia tantani n te Mataroa are i Meang.

¹⁵Ao e a manga rineaki Obeta-Etom b'a te tia tantani n te Mataroa are i Maiaki, ao a rineaki natina m'aane b'a taani tantani n taian ruunib'ai.

¹⁶A rineaki Tubim ma Ota b'a taan tantani n te Mataroa are i Maeao ao te Mataroa are Tiareketa n te kawai are i eta. Aikai kaetietin te m'akuri i bukin te m'akuri n te bong koraki i bukin tabeia taan tantani ake a anganaki:

¹⁷N te bong ae koraki ao a na tei onoman taan tantani i mainikun te Tembora, a na tei aman taan tantani n te itera are mai meang, ao aman man te itera are mai maiaki. Kakauoman taan tantani i bukin taian ruunib'ai ake uoua.

¹⁸Ao aman aika a na tantani n te kawai are e nakon katawanangin te Tembora are i maeao, [68] ao uoman taan tantani aika a tiku n are bon katawanangin te Tembora.

¹⁹Ao aikanne tabeia m'aane man te kaainga are Kora ao Merari ake a anganaki.

²⁰A anganaki tabeia kanoan Rewi ake ana koraki kanoan Kora ma Merari [69] tabeia b'a a na tantani ni kaub'ain te Tembora ao b'aintangira ake a tia ni katabuaki b'a a na b'ai te Atua.

²¹Ratan bon kaain te kaainga are Kerition ao bon taman Ieieri. Angiia ana kariki bon taani kairiiri man te utu i nanoni kaainga. [70]

²²Ieieri bon tamaia Tetam ao Ioera, ao tabeia bon te tantani n taiani kaub'ai.

²³Taan tantani ake tekorakina ake n taiani kaub'ai bon kaain te kaainga are Koata ake kanoan Amram, Itiia, Eberon ao Utiera.

²⁴Tebuera bon ana kariki Keritiom are natin Moote te m'aane. Bon ngaia te mataniwi i bukin b'aai aika kakawaki n te Tembora.

²⁵Aikai ana kariki tarin Keritiom are Erietera: Reabia, Ietiaia, Ioram, Tikeri, ao Teromota.

²⁶Tabeia Teremota ma ana koraki bon tararuaakin taiani b'aintangira ake a tia ni katabuaki b'a a na b'ai te UEA. A reitaki naba i nanon aikai b'aintangira ake e a tia te uea are Tawita ni katabui, n reitaki naba ma ake a katabuaki irouia taani kairiiri man taiani utu, ao mataniwi n taian taanga ni buaka.

²⁷N taai nako are a reke iai b'ai aika a rangi ni boongana i nanon te buaka, ao a uoti m'aane aikai tabeua nakon te Tembora.

²⁸Bon tabeia Teromota ma ana koraki tararuaakin taian b'aintangira aikai ake e a tia n anganaki te Tembora, n reitaki naba ma ake mairoun Tamuera are te burabeti, te uea are Tauro are natin Kiti te m'aane, Abenera, are natin Neera te m'aane, [71] ao Ioaba, are natin Teruia te m'aane.

²⁹Kenania are kaain te kaainga are Itiia ma natina m'aane bon mataniwi n te tautaeka ao taani moti. A aki m'akuri n te Tembora.

³⁰A anganaki Atiabia are kaain te kaainga are Eberon ao teuana te ngaa itibubua ana koraki aika bane aroia b'a taiani mataniwi ake a na tararua waakin te aro ni kabane ao taiani karikirake i nanon te tautaeka n aban nako Iteraera ake i maeaon te Karaanga are te Ioretan.

³¹E riki Ieriia b'a te tia kairiiri n te kaainga are Eberon. E anganna tabena Tawita n reitaki ma uoua te ngaa itibubua man ana koraki aika taani kairiiri man aia utu aika a karineaki b'a a na riki b'a taan tararuaa bootakin te aro ma ana karikirake te tautaeka n te baronga are Reuben, Kata, ao Manate Mainiku.

³²E kunei taekaia m'aane aikai i nanon ana ka abwi n ririki n tautaeka Tawita, ngke e reke i rouna araia utu nako i nanon te kaainga ae Eberon. Boni kaain te kaawa ae Iatera n te aba are Kireata.