Read Te B'aib'ara 1.Rongorongo 27 Bible Online

1.Rongorongo 27 - Te B'aib'ara bible

1.Rongorongo 27

¹Ni katoa teuana te nam'akaina, ao iai te koraki ni m'aane aika uabwi ma aua te ngaa m'aitiia ake a kam'akuraki b'a tautian ana taanga ni buaka Iteraera. Raoia m'aane aikai bon taani kairiiri man taiani utu, mataniwiin taian taanga ni buaka, ao ana mataniwi te uea. A baaireaki aroia i nanon teuana te nam'akaina:

²N te moan nam'akaina, bon Iatiobeam are natin Taberiera te m'aane,

³are ana kariki Bereti;

⁴N te kauoua n nam'akaina, bon Totai are kanoan Aoa, are ana tia buobuoki Mikerota; [72]

⁵N te katenua n nam'akaina, bon Benaia are natin Ieoiata te m'aane, are te ibonga,

⁶are te tia kairiiri irouia Taani Buaka ake teningaun, are Ammitabata natina te m'aane are bon te mataniwi n te taanga ni buaka; [73]

⁷N te kaaua n nam'akaina, bon Ataera are tarin Ioaba, ao natina te m'aane are Tebaria e a manga riki b'a te mataniwi n te taanga ni buaka i mwiina;

⁸n te kanimaua n nam'akaina, bon Tiamuta man te kaainga are Itira;

⁹n te kaonoua n nam'akaina, bon Ira are natin Iketi are kaain Tekoa;

¹⁰n te kaitiua n nam'akaina, bon Ereti are kanoan Beron man te aba are Eberaim;

¹¹n te kawanua n nam'akaina, bon Tibekai are kanoan Utia man te kaainga are Tera;

¹²n te karuaiwa n nam'akaina, bon Abietera are kanoan Anatota man te aba are Beniamin;

¹³n te katebwina n nam'akaina, bon Maarai are kanoan Netob'a man te kaainga are Tera;

¹⁴n te katebwi ma teuana n nam'akaina bon Benaia are kanoan Biraton man te aba are Beniamin;

¹⁵n te katebwi ma uoua n nam'akaina, bon Eretai man Netob'a, are ana kariki Oteniera.

¹⁶Aio araia taani kairiiri man taian baronga nako i aon Iteraera:

¹⁷Aia tia kairiiri kaain Reuben bon Erietera are natin Tikeri te m'aane:

¹⁸Tebatia are natini Maaka te m'aane b'a aia tia kairiri kaain Timeon; Atiabia are natini Kemuera mairouia kain Rewi, ao Tatoka te ibonga b'a aia tia kairiri te baronga are Aaron

¹⁹Eriu are tarin Tawita b'a te tia kairiri mairouia kain Iuta; Omri are natin Mikaera te m'aane b'a aia tia kairiri kain Itakara;

²⁰Itimaia are natin Ob'aria te m'aane b'a aia tia kairiri kain Teburun; Ieremota are natin Atiriera te m'aane b'a aia tia kairiri kain Nabetari;

²¹Otea are natin Atatia te m'aane b'a aia tia kairiri kain Eberaim, Ioera are natin Betaia te m'aane b'a aia tia kairiri kain te baronga are Manate maeao;

²²Ito are natin Tekaria te m'aane b'a aia tia kairiri kain Manate mainiku, Iaatiera are natin Abenera te m'aane b'a aia tia kairiri kaain Beniamin ao Atarera are natin Ieroam te m'aane b'a aia tia kairiri kain Taan.

²³Ngke e baireia Tawita b'a e na wareki m'aitiia Iteraera, ao e anga ana taeka b'a a na aki warekaki koraki ake a mena aia ririki ni maiu i aan uabwi, i bukina b'a E a tia ni berita te UEA n taai ake ngkoa b'a e na rangi ni m'aiti te botannaomata n Iteraera n ai aron itoin karawa.

²⁴E a wakina ana wareaomata Ioaba are natin Teruia te m'aane ma e a ti toki naba ngke e a moana katuaeaia Iteraera te UEA. Ma ngaia are, e aki roko n te rin bootaia aomatan Iteraera n te boki are a tauaki iai mwiin b'aai ni kabane n ana tai ni uea Tawita.

²⁵Te tia kaawakin ana ruunib'ai te uea bon Atimaweta are natin Ariera te m'aane. Te tia kaawakin ana ruunib'ai te uea ake tabeua riki ake n taiani kaawa, ma kaawa naba ake a uarereke ao ake n taian taua n taratara ake i Iteraera bon Ionatan are natin Utia te m'aane.

²⁶Te tia tararuaia taani m'akuri ake a unika aban te uea bon Etiri are natin Kerub'a te m'aane.

²⁷Te tia tararua te nnenaroka i bukin te kureebe bon Timei are kaain Ram'a, ao Taberi are kaain Tibema boni ngaia are e tararua te ruunib'ain.

²⁸Te tia tararua te oriwa ma te kai are te tukomorea ake n rabeen te tabuki are mai maeao bon B'aara Anan mai Ketera, ao Ioati e tararua kaawakinan te ruunib'ai i bukin b'aan te oriwa.

²⁹Te tia tararuai maan ake a kaawakinaki n te aba ae e aoraoin Tiaron bon Titerai are kaain Tiaron, ao te tia tararuai b'aai ake a kaawakinaki n taian m'arua bon Tiabata are natin Aterai te m'aane.

³⁰Te tia tararuai taiani kaamero bon Obira are kanoan Itimaera, ao te tia tararuai taian aati bon Ieteia are kaain Meronota, ao Iatiti are kaain Akeraite bon te tia tararuai taian tiibu ma kooti.

³¹Bon aikai m'aane ake taan tararua ana b'ai te uea are Tawita.

³²Tarin taman Tawita are Ionatan bon te tia iango ae e wanawana ae e rangi n raoiroi. Bon ngaia ma Ieiera are natin Akemon te m'aane ake a reireiniia natin Tawita m'aane.

³³Aitobera ao Utiai are kaain Areka bon ngaiia ana taan iango te uea.

³⁴Ieoiata are natin Benaia te m'aane bon ana tia iango te uea i mwiin Aitobera, ao rimwi riki, e a manga riki Abiata b'a te tia iango. Ioaba bon te mataniwi n ana taanga ni buaka Iteraera.