Read Te B'aib'ara 1.Rongorongo 28 Bible Online

1.Rongorongo 28 - Te B'aib'ara bible

1.Rongorongo 28

¹E tewea aia boowi taani kairiiri i aon Iteraera Tawita i Ierutarem, n reitaki ma Taani kairiiri man taiani baronga, mataniwin te tautaeka, taani kairiiri n te taanga ni buaka, mataniwi ake taan tararua ana b'ai te uea ao ana man, mataniwi n te bareti, ao taani buaka aika a ninikoria.

²Ngke a bane aomata ikekei, ao e teirake Tawita ao e taku: Ongora irou, au aomata. I tangiria ni karaoa te tabo ike e na kaawakinaki iai te Atiniberita, b'a ti aonga ni konaa n nako n taromauria te UEA ae Atuara iai. I a tia ni katauraoi b'aai ni kabane i bukin karaoan te Tembora,

³ma e a tia te UEA n aki kukurei b'a n na karaoa te Tembora, i bukina b'a E taku b'a I a tia n tiringiia aomata aika a m'aiti n te buaka.

⁴Ao te UEA ae te Atua, e rinea Iuta b'a te baronga ni kairiiri i aon Iteraera. Ao man te baronga ane Iuta E a manga rinea ana utu tamau, ao man ana utu tamau, E rineai b'a n na riki b'a te uea i aon Iteraera, ao E berita b'a a na tautaeka man uea naba au kariki.

⁵E a tia ni kakab'aiaai te UEA n anganai natiu m'aane aika a m'aiti, ma E rinea natiu te m'aane ae Toromon b'a e na manga uea imwiiu i aon Iteraera.

⁶Ao E taku te UEA nako iu, “Bon natim ae Toromon ae e na karaoa te Tembora, ao n na karineaki iai. E na riki Toromon b'a kaanga natiu te m'aane, ao n na riki b'a kaanga tamana.

⁷Ngkana e teimatoa n iri nanon au tua ma au babaaire, ao e na teimatoa abanueana.”

⁸Ngkami aikai ni kabane, bon ana aomata te UEA, ao ngkai, e riki te UEA b'a te tia kakoaua, ao I tangiria b'a kam na berita b'a kam na karaoa ami kabanea n tamaroa n iri nanon b'aai ni kabane ake E a tia ni baaireia te UEA ae te Atua nakoira. Ao e na riki iai te aba aei b'a ami b'ai n taai nako ao nako ia naba ami kariki.

⁹Toromon ae natiu te m'aane, kona riai n taromauria te Atua ao ongotaeka i rouna ma nanom ni kabane ma am iango, n aron are I a tia ni karaoia. E atai am iango ni kabane ao bukin karaoan b'aai iroum, ao ngkana ko tang nakoina, ao E na ongo am tataro nako. Ma ngkana ko aki kubariia, ao e na bon aki tabeakiniko n aki toki.

¹⁰E a tia n rineiko te UEA b'a te tia katea te Tembora i bukin taromauriana. Ko na korakora ni karaoa am m'akuri ae ko a tia n anganaki.

¹¹Ngke e a bane a na taeka Tawita, ao e a angan Toromon taamnein te Tembora i bukin karaoan ruun te Tembora are moan te buubura, n ikotaki ma te kaman, taian ruunib'ai, ruu ake ieta ao ruu ake inano, ao ai uana naba ma te Tabo are Moan te Tabu.

¹²E angan Toromon taamnein katawanangin te Tembora, tamnein taian ruu ni katobibia taian katawanang, ao taamnein naba taian ruunib'ai i bukin kaub'ain te Tembora ao b'aai n tangira ake a tia ni katabuaki b'a ana b'ai te Atua.

¹³E angan naba Toromon taamnein tib'akiia taian ibonga ao kanoan Rewi nakon taiani m'akoro, n ikotaki ma taiani tamnei i bukin waakin te m'akuri ake a riai ni katiaaki i bukin te Tembora ma aron kaawakinan b'aai ake a kabonganaaki n te taromauri.

¹⁴E tuanga naba Toromon m'aitin te koora ma te tirewa are e na kamanenaaki i bukin b'aai aika a tabu,

¹⁵n ikotaki ma kaintein te taura ao taian taura,

¹⁶te taibora te koora are nnen te kariki are e tabu, te taibora are e karaoaki man te tirewa,

¹⁷kainiwaiteke i bukin te irikomaiu, taiani boora ao m'angko,

¹⁸te baonikarea i bukin te kaboiarara ae e karaoaki man te koora, aia kanibuaka te koora i bukiia b'aai ake a maiu ake iai baiia ni kiba ake a mena i aon matan te Atiniberita.

¹⁹Ao e taku Tawita nakon Toromon: E kaota nako iu te UEA aron karaoan te Tembora.

²⁰Ma ko riai ni kakoaua b'a a na karaoaki b'aai ni kabane n aron taian tamnei aikai. Ko na korakora ao ko na aki maaku n te b'ai teuana ke ni b'arannano. E na buokiko te UEA ae Atuau ni b'aai ni kabane akana a tangiraki i bukin katiaan te Tembora, b'a e aonga ni konaa ni kamanenaaki i bukin taromauriana.

²¹A tia n anganaki tabeia ibonga ma kanoan Rewi, ao a bane taani m'akuri aike a rabakau n tauraoi nakon te m'akuri. A tauraoi ni karaoi aia m'akuri aomata nako ma aia taani kairiiri ngkana ko tuangiia b'a a nang waaki.