Read Te B'aib'ara 1.Rongorongo 9 Bible Online

1.Rongorongo 9 - Te B'aib'ara bible

1.Rongorongo 9

¹A bane n tauaki araia Iteraera n rongorongon te utu ae e eti raoi are e karinaki naba n Rongorongoia Uean Iteraera. A uotaki nako aomatan Iuta b'a taenikai nako B'aburon i bukina ngke a bure nakon te UEA.

²Koraki ake a moan okira aia kaawa bon taian ibonga, kanoan Rewi, taani m'akuri n te Tembora, ao Iteraera ake te korakina.

³A tekateka i Ierutarem barongan Iuta ake Beniamin, Eberaim, ao Manate.

⁴Bootan m'aitiia kaain te baronga are Iuta ake a tekateka i Ierutarem bon onobubua ruabwi.

⁵Kanoaia ana bakatibu natin Iuta te m'aane are Bereti,

⁶bon iai aia mataniwi ae Utai, are natin Ammiuta te m'aane ae tibun Omri. Ao tabeman riki ana bakatibu bon teuare Imri, ao Bani. Kanoaia ana bakatibu natin Iuta te m'aane are Tiera, bon iai aia mataniwi ae Ataia, are bon te mataniwi n ana utu. Kanoaia ana bakatibu natin Iuta te m'aane ae Tera ao iai ana mataniwi are bon teuare Ieuera.

⁷Botan m'aitiia taani kairiiri man te baronga are Beniamin bon ruabubua nimangaun ma onoman ake a tekateka i Ierutarem.

⁸Ao n ikotaki naba ma Taru are natin Meturam te m'aane, are tibun Otawia, ao tibutorun Atenua;

⁹Ibeniia are natin Ieroam te m'aane; Era are natin Uti te m'aane ao tibun Mikeri te ataei ni m'aane; Meturam are natin Teb'atia te m'aane, tibun Reuera te ataei ni m'aane, ao tibutorun Ibeniia te ataei ni m'aane.

¹⁰Aio tauan mwiia ibonga ake a tekateka i Ierutarem: Ietaia; Ieoiariba; Iakin,

¹¹Ataria, are mataniwiin te Tembora, are e riki mairouia Irekia, Meturam, Taroka, Meraiota, ao Aituba;

¹²Ataia are natin Ieoram te m'aane, are e riki mairouia Batiura ao Marekia, Maatai are natin Ariera te m'aane, are e riki mairouia Iatera, Meturam, Metiremita, ao Immera.

¹³Bootan m'aitiia ibonga bon 1,760, ao bon taani kairiiri ngaiia man aia utu n aia kaainga ao a tia ni kataneiaki b'a taani m'akuri n te Tembora.

¹⁴Aio tauani mwiia kanoan Rewi ake a tekateka i Ierutarem: Temaia man te kaainga are Merari,

¹⁵are e riki mairouia Atuba, Atirikam, ao Atiabia; B'akeb'aka. Ereti, Karara, Matania are natin Mika te m'aane, are e riki mairouia Tikeri ao Ataba;

¹⁶Ob'aria are natin Temaia te m'aane, are e riki mairouia Karara ao Ierutun, Berekia are natin Ata te m'aane ao tibun Erekana te ataei ni m'aane, are e a tia ni maeka ni kaawa aika a uarereke i rarikin te kaawa are Netob'a.

¹⁷Aikai taan tantani ni mataroan nako te Tembora: Tiarum, Akuba, Taremon, Aiman, ma aia koraki. Tiarum bon te tia kairiiri man te kaainga aei,

¹⁸ao a tia n riki b'a taan tantani n ana mataroa te uea i mainikun te kaawa ae e buubura. I m'aain anne, ao aia bakatibu ngkoa ngaiia ake a tantani ni mataroan aia kaemb'a kanoan Rewi.

¹⁹Tiarum bon natin Kore te m'aane, [27] ai uana naba ma m'aane ake tekorakina n te kaainga are Kora, a tantani ni mataroan te rin nakon te Tembora, n aroia aia bakatibu ake a tantani ni mataroan te Um'antabunrianna.

²⁰E a tia n tararua te m'akuri Bineati are natin Ereata te m'aane i bukina ngke E memena te UEA i rouna.

²¹Tekaria are natin Meteremia te m'aane boni ngaia naba temanna te tia tei i matan te rin nakon te Umantabunrianna.

²²Bootaia taan tei bon 212, a bane n tauaki rongorongoia n te boki are tauani mwiia utu ni bon aia kaawa. A tia n rineaki aia bakatibu iroun te uea are Tawita ao Tamuera are te burabeti b'a taani m'akuri aika a onimakinaki,

²³ao ngkai a riki b'a taan teiakina mataroan taiani kawai n rin nakon te Tembora.

²⁴Kaka temanna aika a rineaki b'a taan tei i bukin koonan te Tembora ake aua, aika a b'anin raoi aia tai n tei.

²⁵A maeka taan buokiia n taiani kaawa aika a uarereke i tinanikun te kaawa are e buubura, ao a baabane n rooroko nakon te kaawa are e buubura ni katoa itiua te bong ao a karaoa aia tei n taabo n tei.

²⁶Naake a b'anin raoi aia tei bon kanoan Rewi ao a kairiia taan tei ake te korakina ao tabeia tararuaan ruun nako te Tembora ao b'aai ake a kaawakinaki ikekei.

²⁷A tararua te Tembora n te ngaina ao te bong ao a kakauka mataroana ni katoa ingabong.

²⁸Tabeia tabeman kanoan Rewi bon te tararuai b'aai ake a kabonganaaki n te taromauri n te Tembora, ao a wawareki b'aai i m'aain kamanenakiia ao i mwiin kamanenakiia.

²⁹Ao ake tekorakina a tararuaa b'ain nanon te Tembora ma b'aai ake a tabu, n reitaki ma te buraawa, te wain, b'aan te oriwa, te b'ai ni kaboiarara, ao b'aini kaboiararaan te am'arake.

³⁰Ma bon tabeia ibonga ni karaoi rengarenga ni b'aini kaboiararaan te am'arake.

³¹Ana karimoa te m'aane Tiarum are kaain te kaainga are Kora man kanoan Rewi bon Matitia, ao tib'angana bon kam'aakin te kariki are e na kamanenaaki i bukin taian angakarea. [28]

³²Kanoan Rewi ake man te kaainga are Koata boni ngaiia ake a tabena kam'aakin taiani kariki ake a tabu ni katoa Taabati. [29]

³³Taani kairiri man utuun nako kanoan Rewi ake taani katangitang a boni maeka naba n te Tembora. Bon akea riki tib'angaia teuana, i bukina ngke a tei n te bong ma te ngaina.

³⁴Bon taani kairiiri man utuun te baronga are Rewi ao a tauaki araia n te aro anne ni bokin aia utu. A maeka i Ierutarem.

³⁵E a tia n tekateka Ieiera n te kaawa are Kibeon, ike e maeka iai ma buuna are Nei Maaka.

³⁶Bon iai natiia m'aane aika tengaun aika a bungiaki n aron aei man te karimoa nakon te karimwi: Abeton, Tura, Kiti, B'aara, Nera, Nataba,

³⁷Ketora, Aio, Tekaria, ao Mikerota

³⁸are taman Timeam. A nako ni maeka tabeman mai buakoia i Ierutarem i rarikiia aia koraki.

³⁹Nera bon taman Kiti ao tibun te uea are Tauro te unim'aane. Bon iai natin Tauro aika aman m'aane b'a: Ionatan, Marikitua, Abinataba, ao Etib'aara. [30]

⁴⁰Ionatan bon taman Merib'ab'aara, [31]

⁴¹ao tibun Mika te unim'aane, ao tibutoruia Biton, Mereka, Tarea, ao Aati te unim'aane. [32]

⁴²Aikai ana kariki Aati: Iara, Aremeta, Atimaweta,

⁴³Timri, Mota, Binea, Reb'aia, Ereata, ao Atera ma natina m'aane aika onoman:

⁴⁴Atirikam, Bokeru, Itimaera, Tearia, Ob'aria, ao Anan.