Read Te B'aib'ara 2.Rongorongo 1 Bible Online

2.Rongorongo 1 - Te B'aib'ara bible

2.Rongorongo 1

¹Ao e a matoa ana tautaeka n abanueana ni kabutaa ngkai te uea are Toromon are natin Tawita, i bukina b'a e a tia te UEA ae te Atua ni kakab'aia ma ni karikia b'a te uea ae korakora.

²N te tai anne, ao e bon kaawakinaki naba i Kibeon te Um'antabunrianna are e a tia ni karaoia ana toro te UEA are Moote i nanon te rereua,

³ao e mena i matan te Um'antabunrianna te baonikarea are te buraati are e karaoia Betarera.

⁴N te bong teuana, ao e taku Toromon nakoia Iteraera, ma ana mataniwi n te taanga ni buaka, ao ana mataniwi, ao tani kairiiri n taian utu b'a a na nako ma ngaia nakon te tabo n taromauri i Kibeon,

⁵e ngae ngke e a kaman kam'ainga te Atiniberita tamana are Tawita mai Kirataim-Iearim nakon te auti n rianna are e a tia ni kateia i Ierutarem. Ao a m'ananga Toromon ma te korakina nako Kibeon b'a a na taromauriia te UEA,

⁶ao e anga ana karea Toromon aika te ngaa taiani man b'a kakukureian te UEA i aon te baonikarea ae te buraati.

⁷E kaoti te Atua nakon Toromon n te tairiki anne n te mii ao e taku, “Toromon, bubuti i bukin b'aai ni kabane akana ko tangiri, ao N na anganiko.”

⁸Ao e taku Toromon: Te UEA ae te Atua, ko boni kakaonimaki nakon tamau are Tawita, ao ngkai ko a manga karikai b'a te uea i aon Iteraera.

⁹I kaantaningaaki b'a n na tautaekaniia aomata aikai ma a bon rangi ni m'aiti kurikuri m'aitin tanon aontano. Ma ngaia ae ko na kaawakina am berita are ko karaoia nakon

¹⁰tamau, ao ko na anganai te wanawana. Anganai te rabakau ae I kainanoia i bukin nakoau ni uea i aon am botannaomata ae korakora aei.

¹¹Ao E kaeka te Atua: Toromon, I taku b'a ko na bubutiai b'a n na karikiko b'a te kaub'ai ae e kakannato, ke n na kanaanaua maium. Ke ko na butiai b'a n na kamaunaiia am kairiribai, ma ko aki b'a ko butiai b'a n na anganiko te wanawana ma te rabakau n tautaekaniia au aomata.

¹²Ma ngaia ae, N na kawanawanako man anganiko te ataib'ai. Ma N na bon karikiko naba b'a te aomata ae moan te kaub'ai mani kakannato riki nakoia uea ake mai m'aaim ao akana i mwiim.

¹³Ao e kiitana Kibeon Toromon ao e okira Ierutarem, are kaawan te tautaeka n Iteraera.

¹⁴Bon iai ana taanga ni buaka Toromon ae m'aitina bon teuana te ngaa abubua ana ka ni buaka, tebwi ma uoua te ngaa ana aoti ake e kaawakiniia i Ierutarem ao kaawa ake tabeua.

¹⁵I nanon ana tai ni uea Toromon i aon Iteraera, ao moan te bati taiani koora ao taian tirewa ni kabutaa aon Ierutarem, ao a m'aiti taiani kai aika tiira kaanga taian kai tukomorea i oin taian tabuki.

¹⁶A kabooi taian aoti ma kaanibuaka ana taani bob'ai Toromon man aonon Mutiri ao Kue. [1]

¹⁷A kabooa onobubua te m'akoro n tirewa i bukin te kaanibuaka ao tebubua nimabwi te m'akoro n tirewa i bukin te aoti. A boni kaboonako nako taian aoti ma kaanibuaka nakoia kaain Eta ao uean Tiria.