Read Te B'aib'ara 2.Rongorongo 13 Bible Online

2.Rongorongo 13 - Te B'aib'ara bible

2.Rongorongo 13

¹E a manga riki b'a te uea Abiia [35] i aon Iuta n ana katebwi ma wanua n ririki ni uea Ieroboam i aon Iteraera,

²ao e tautaeka mai Ierutarem i nanon tenua te ririki. Aran tinana bon Nei Mikaia are natin Uriera te aine. Uriera are kaain Kibea. Tabeua te tai i mwiina, ao a uaia ni buakaniia i bon irouia Abiia ma uean Iteraera are Ieroboam.

³M'aitiia kaain ana taanga ni buaka Abiia bon abubua te ngaa, ao e kaaitaraaki iroun Ieroboam ma ana taanga ni buaka aika wanibubua te ngaa m'aitiia.

⁴E tam'arake Abiia nako taubukin te Maunga are Temaraim [36] n taian tabuki ake i Eberaim ao e takaarua ni kaangai: Kam na ongora Ieroboam ma ngkami Iteraera ni kabane!

⁵E a tia ni karaoa ana berita ae e matoa te UEA ae te Atua b'a a na riai n nako uean Iteraera ni kabane man ana utu Tawita.

⁶Ma ngkoe ae Ieroboam, bon ana mataniwi Toromon ngkoe, ao ko a manga kakaitaraa.

⁷Ao i mwiin rikin Reoboam b'a te uea, ngkoe ma akana a iririko akana akea manenaia, kam kaewenakoa Reoboam, are e bon rangi n raa ma n aki konai uotana ni katokiko.

⁸Ko taku ngkai b'a ko konaa ni kaaitaraa te abanuea are e a tia te UEA n angan Tawita ma ana kariki ngkoe ma am taanga ni buaka ane e korakora anne. Bon akanne antim ao akea riki, akana bannan taian kao ataei aika koora, ake e karaoi ngkoa Ieroboam i bukim.

⁹Ao bon akea naba ana kariki Aaron n ami itera, i bukina b'a kam kakioia nako ana ibonga te UEA ao kanoan Rewi. Ao ko a manga rineia aomata n aki akaaka b'a a na manga riki b'a ibonga n onea mwiia, n aron are a karaoia botannaomata ake ianena. Ni bon koauana, ao a boni konaa n riki b'a ibonga aomata ni kabane akana a uoti aia kao ao itiman taian tiibu m'aane nakon te baonikarea nakoia akana a aranaki b'a antim.

¹⁰Ma ti bon tuai man tannako mairoun te UEA ae te Atua! A bon teimatoa n riki b'a ara ibonga ake bon oin ana kariki Aaron, ao a teimatoa naba n riki kanoan Rewi b'a taani buokiira.

¹¹A anga karea uoua te tai n te bongina ao a kabuoki b'aai ni kaboiarara nakon te UEA. A uota te kariki are e tabu nako aon te taibora aika a tia ni kaitiakaki, ao a kaurai taian taura ni kaintaura are te koora ni katoa bong ngkana e a bung taai. Ti karaoa ana mwioko te UEA ae te Atua are ko a tia n tannako mai rouna!

¹²Ao bon anne bukina ngkai E mena te Atua n ara itera ao e na kairiira nakon te buaka ngkana a katanga te kanikina ibonga n taiani buu. Kam kabane buakaa ami tai Iteraera, kam bon riai ni kab'araa nanomi. Bon akea manenan ae kam karaoia Iteraera, kam riai ni kab'ara nanomi. Bon akea ami anga ae kam na konaa iai te UEA ae te Atua are a taataromauriia ami bakatibu.

¹³Ma ngke e tabe n taetae Abiia, ao e a tia Ieroboam ni kanakoia ana taanga ni buaka tabeua b'a a na buakana Iuta mai akuiia, ao angiia ana taanga ni buaka a buakaniia mai mataia.

¹⁴Ao a ataia kaain ana taanga ni buaka Iuta b'a a m'ane, ma ngaia are, a tataro nakon te UEA. A katanga te kanikina ibonga n taiani bu,

¹⁵ao a takaarua n te takaarua ni buaka taian taanga ni buaka. Ao a kairaki iroun Abiia nakon te buaka, ao te Atua e kakonaakiia Ieroboam ma ana taanga ni buaka Iteraera.

¹⁶Ao a biri nako Iteraera, ao E buokiia tautian Iuta te Atua ni kamateia

¹⁷nimabubua te ngaa aia taanga ni buaka taiani kairiribai.

¹⁸A tokanikai kaain Iuta i bukina ngke a tia n onimakina te UEA ae Atuaia aia bakatibu.

¹⁹Ao e teimatoa Abiia ni buakaniia kaain ana taanga ni buaka Ieroboam ma n taui kaawan nako Iteraera aika Betaera, Ietiana, ao Eberon, n ikotaki ma kaawa aika a uarereke ake i rarikiia.

²⁰Ao e aki manga tei m'aakan Ieroboam i nanon ana tai n tautaeka Abiia ni kabane. E katuaaea Ieroboam te UEA, ao e mate, ma e rikirake riki m'aakan ana tautaeka Abiia.

²¹Bootan m'aitin buun Abiia bon tengaun ma aman, ao natina m'aane bon uangaun ma uoman, ao tengaun ma onoman natina aine.

²²A bane ni koreaki taekan b'aai ni kabane ake e taekin ma ni karaoi Abiia i nanon ana tai ni uea i nanon ana rongorongon te burabeti are Ito.