Read Te B'aib'ara 2.Rongorongo 16 Bible Online

2.Rongorongo 16 - Te B'aib'ara bible

2.Rongorongo 16

¹N ana katenibwi ma onoua n ririki n tautaeka Ata, ao e roko uean Iteraera are Baatia ni buakana Iuta man taua te kaawa are Ram'a. E a waakina kamatoaan te kaawa, ao e katikuia ana taanga ni buaka i bukin katokaia aomata man riniia ao otinakoia mai Iuta.

²Ao ngke e ongo rongorongona Ata, ao e anai taian tirewa ma koora man ana bareti ao ana Tembora te UEA. Ao i mwiina, e kanakoi nako Tamateko ma ana rongorongo nakon uean Turia are Benatata:

³“I taku b'a ti riai n tiaaina te boraraoi n raoi n aron are a karaoia ngkoa tamara. Aikai taiani b'aintangira nakoim tirewa ma koora aikai. I butiiko b'a ko na urua am boraraoi ma uean Iteraera are Baatia man kairoroa b'a e na kiitana abau?”

⁴Ao Benatata, e karaoa te b'ai are e bubutiia Ata ao e kanakoia ana taanga ni buaka Turia nako nanon Iteraera. A taua te kaawa are Iion, Taan, Abera-Maim, [41] ao kaawa ni kabane ake i Nabetari ake a kaawakinaki iai b'aai.

⁵Ao ngke e ongo rongorongon anne Baatia, ao e katoka ana m'akuri n te kaawa are Raam'a.

⁶Ao Ata e tuangiia kaain Iuta ni kabane b'a a na uoti nako taian atiibu ma kaai ake e kabonganai ngkoa Baatia ni kamatoa iai Ram'a. Ao e a manga kamatoai kaawa ake Keeb'a ao Mitib'a n taian atiibu akanne.

⁷N te tai ae e aki maan i mwiin rikin anne, ao e nako te burabeti are Anani ni kawara Ata ao e taku: Ko mwiokoa uean Turia ao ko aki mwiokoa te UEA ae Atuam. Ma ngaia are, ko na bon aki konaa ni kataenikaia ana taanga ni buaka Turia.

⁸Uringa aron korakoran ana taanga ni buaka Itiobia [42] ao Rubim, ma aia kanibuaka ni kabane ao taan buaka i aoia aoti! Ko onimakina ngkoa te UEA b'a e na buokiko, ao e anganiko te tokanikai i aoia.

⁹E teimatoa te UEA n tataraia aomata ni kabane, ao e anga te korakora nakoia ake kakaonimaki n ongotaeka i rouna. Ma ngkoe, ko a tia ni karaoa te m'akuri n nanobaba, ao e na bon aki konaa ni manga reke riki te rau n abanueam.

¹⁰Ao ngke e ongo aei Ata, ao e rangi ni maraki nanona, ao e kaina Anani n te Karabuuti. Ao e bon karaoa naba ae e aki raoiroi nakoia ana aomata tabeman.[43]

¹¹A bane n tauaki mwiin b'aai ni kabane ake e karaoi Ata i nanon ana tai n uea n te boki are Rongorongoia Uean Iuta ao Iteraera.

¹²I nanon ana katenibwi ma ruaiwa n ririki n tautaeka, ao e reke i rouna aorakin te wae ae moan te buakaka, ma e onimakiniia taian taokita ao e aki kan buubutiia te UEA buokana.

¹³Uoua te ririki i mwiina, ao e mate.

¹⁴Mai m'aaina, ao bon iai ruanimaten Ata ae e a tia n ekeaki n te tabuki are e b'a i Ierutarem. Ma ngaia are, e bon taunaki ikekei, ao e kanoaaki te ruanimate arei ni b'aai ni kaboiarara, ao taiani b'a aika boiarara. Ao i mwiina, a karaoa aia kaura ai aomata i bukin karineana.