Read Te B'aib'ara 2.Rongorongo 23 Bible Online

2.Rongorongo 23 - Te B'aib'ara bible

2.Rongorongo 23

¹I mwiin karabaakin Ioati are natin Aatia te m'aane i nanon te Tembora i nanon onoua te ririki, ao e a iangoia Ieoiata are te ibonga b'a e a riai ni waakina ana m'akuri. Ma ngaia are, e karekeia moa ana taan boutokaia mairouia tabeman ana aobitia. Koraki aikanne bon Ataria are natin Ieroam te m'aane, Itimaera are natin Ieoanan te m'aane, Ataria are natin Obeta te m'aane, Maateia are natin Ataia te m'aane, ao Eritiabata are natin Tikeri te m'aane.

²A m'ananga m'aane aika niiman aikai nakon kaawan nako Iuta ma ni weteia ni bootia kanoan Rewi ao taani kairiiri man taiani kaainga. A bane n roko i Ierutarem

³ao a bootaki i nanon te Tembora, ike a boonanoia b'a a na boutokaa Ioati. E taku Ieoiata nakoia: E na riki Ioati b'a ara uea, b'a e berita ngkoa te UEA n taai ake ngkoa b'a e na uea n taai nako temanna man ana kariki Tawita.

⁴Aio te b'ai ae ti na karaoia. A na uatei tenikoraki ibonga ao tenikoraki kanoan Rewi n te Taabati-tekorakina a na teiakin mataroan nako te Tembora,

⁵tekorakina a na tararua te bareti, ao tekorakina a na tararua Mataroan te Aana. Ao nikirami kam na teiakina katawanangin nako te Tembora.

⁶Bon ti ibonga ma kanoan Rewi ake a tei aika a kariaiakaki n rin n te Tembora, i bukina b'a bon ti ngaiia ake a tia n ri nanon taian bootaki ni kaitiaki are a na kariaiakaki iai, Ao ake tekorakina a na tiku i tinaniku i nanon katawanangin te Tembora, n aron are e a tia ni baaireia te UEA.

⁷Ao ngkami kanoan Rewi kam na kakaawakina Ioati are te uea. Kam na kaaki matami i aona n taai nako! Ao kakatauraoa ami kabaang n taai nako ma n tatauraoi n tiringa ane e rin n te Tembora.

⁸Ao a ira ana babaaire Ieoiata kanoan Rewi ma kaain Iuta. A aki kariaiakaki taan tei akana a bane aia tei n okiri aia auti, ao mataniwiia taan tei n tatabemaniia nako a na kakatauraoia n taai nako aia taan tei—ake a motirawa ma ake a tib'a teirake.

⁹E rinnako Ieoiata nakon te Tembora ao e uota te kabaang ao te otanga n otinako are ana b'ai ngkoa te uea are Tawita, ao e anganiia taiani mataniwi.

¹⁰A anga taiani b'ai ni buaka nakoia taani tei, ao Ieoiata e taraia b'a a na roko raoi taan tei ni nneia ni katobibia te Tembora ao te baonikarea i bukin kaawakinan te uea man taabo nako.

¹¹Ao Ieoiata ma natina m'aane a kaira Ioati nako tinaniku, ao a katoka te baunuea i aon atuuna ao a anganna katotoon taian tua i bukin tautaekanakiia te botannaomata. E kab'aroaki b'aan te oriwa i aon atuuna ni kaotaki b'a ai te uea ngkai ngaia, ao a bane ni kukurei aomata ma n takaarua, “E na anaanau maiun te uea!”

¹²Ao ngke e ongo takaaruaia aomata ni kukurei te ueanaine are Nei Ataria i bukin Ioati, ao e nako n rin n te Tembora.

¹³Ao e a noora Ioati n tei i rarikin te boua i rarikin mataroa, are bon ana taatabo te uea. A tei i rarikina mataniwi n te taanga ni buaka ao taan katangibu, ao taani katang b'ainikatangitang ake a tabe ni kairiia aomata ngke a tabe ni bukamaru n anene ni kukurei mani katangi taiani bu. E raeuai kunnikaina Nei Ataria i bukin marakin nanona, ao e takaarua ni kaangai, “Kam kam'aneai, ngkami aika taani kam'aam'ane!”

¹⁴Ni bon te tai naba arei, ao e taku Ieoiata nakoia mataniwiin te taanga ni buaka, “Kam na aki tiringnga ikai i rarikin te Tembora. Kaotinakoa i matan taian taanga ni buaka, ao tiringiia raoi naba ni kabane ana taan boutokaia!”

¹⁵E kataia ni birinako Nei Ataria, ma a raweia mataniwi n te taanga ni buaka ao a tiringnga i rarikin te mataroa ike a kakairaki iai taian aoti nakon te bareti.

¹⁶E buubuti Ieoiata nakon te uea are Ioati ao aomata b'a a na iria ni kakaonimaki nakon te UEA. Ao a kariaia,

¹⁷ao i mwiina, a kabane biriia nakon ana Tembora Baara ma n urubekeia. A urui taian baonikarea ao taian bouannanti ao a tiringa Matan are ana ibonga Baara i matan te baonikarea.

¹⁸Ao Ieoiata e anganiia ibonga tabeia n te Tembora, n aron are e karaoia naba ngkoa Tawita. Tabeia bon te anga taiani karea nakon te UEA n aron are n ana tua Moote, ao tabeia naba kairan te anene.

¹⁹E tuangiia taan teiakina mataroan te rin nakon te Tembora b'a a na aki kariniia aomata aika a aki itiaki n aron ana tua Moote.

²⁰N tokina, e a bootia mataniwiin te taanga ni buaka Ieoiata, kaain te kaawa ake a rangi ni kakannato, ao mataniwiin te tautaeka. Ao aomata aika a m'aiti a iri ngke a kaira Ioati nakon te Tembora n te mataroa are Mataroa Ieta, ao ni manga nako nanon te bareti, ike e a anaa iai nnena ae uean Iuta.

²¹Ao a bane ni kukurei aomata b'a e a tia ni mate Nei Ataria ao e a manga reke te rau i aon Betereem.