Read Te B'aib'ara 2.Rongorongo 6 Bible Online

2.Rongorongo 6 - Te B'aib'ara bible

2.Rongorongo 6

¹Ana Tataro Toromon: “Ara UEA, ko taku ngkoa b'a ko maeka n te nang ae roro.

²Ao ngkai I a tia ni karaoa te Tembora ae e mimitong ae ko na maeka iai n aki toki.”

³Ao e rairaki Toromon ni kaaitaraia aomata ake a tei ikekei. Ao e taetae ni kakab'aiaia ao e taku:

⁴Neboa te UEA ae Atuan Iteraera! E kaotinakoia ana aomata mai Aikubita n taai ake ngkoa

⁵ao i mwiina e kaawakina ana berita ni karika tamau are Tawita b'a te uea i aon Iteraera

⁶ao ngkai e a koro bukin te taeka ni berita anne.

⁷Ngke e tangiria ngkoa tamau ni karaoa te Tembora i bukin te UEA ae Atuan Iteraera,

⁸ao e taku te UEA, “E rangi n raoiroi ngkai ko tangiria ni karaoa te Tembora are n na konaa n taromauriaki iai.

⁹Ma tiaki ngkoe ae ko na karaoia. Ma e na kateaki iroun natim te m'aane b'a karineau.”

¹⁰E a tia te UEA ni karaoa te b'ai are e berita iai ngkoa. I a riki ngkai b'a uean Iteraera, ao I a tia ni katea te Tembora i bukin te UEA ae Atuara.

¹¹I a tia naba ni karina te Atiniberita i nanon te Tembora. Ao i nanon te ati bon taian atiibu aika a raababa ake a koreaki iai ana boraraoi te UEA i marenana ma ara bakatibu ngke e kaotinakoia mai Aikubita.

¹²Mai m'aaina, bon iai ngkoa ana tabo ae rietaata teuana Toromon ae e a tia ni karaoia ae e kaaniia 2 te miita rababana ao anauna, ao e ri aon teuana te miita rietana, ao e karaoia i nuuka i tinanikun katawanangin te Tembora i rarikin te baonikarea.

¹³Ao e tei Toromon i aon te b'ai are e rietaata arei n kaaitaraa te baonikarea ao a bane n tei aomata i a kuuna. Ao i mwiina, e katei baina nako karawa; e katorobubua

¹⁴ao e tataro ni kaangai: Te UEA ae Atuan Iteraera, bon akea temanna te atua i karawa ke i aonnaba ae ai arom! Ko bon aki konaa ni m'aninga te boraraoi are ko karaoia ma am aomata, ao ko kakaonimaki nakoia akana a kakaonimaki n ongotaeka nakon am reirei.

¹⁵Bon tamau Tawita are am toro, ao n te bong aei ko a tia ni kaawakina am berita are ko karaoia ngkoa i bukina.

¹⁶Ko berita ngkoa b'a e na riki ni uea n taai nako temanna mai buakoia ana utu i aon Iteraera, ngkana a karaoa aia kabanea n tamaroa nakoim, n aron are e a tia ni karaoia.

¹⁷I butiiko b'a ko na kaawakina am berita ae ko karaoia ngkoa nakon am toro are Tawita.

¹⁸E bon aki tau buuburan karawa i bukim, te UEA ae te Atua. Ao ko nang kangaa riki ni maeka n te aonnaba n te Tembora ae I a tia ni karaoia aei?

¹⁹Ma I butiiko b'a ko na kaeka au tataro.

²⁰Bon aei te Tembora are ko a tia n rineia b'a ko na taromauriaki iai. I butiiko b'a ko na tararuaia ni bong ao ni ngaina ao kakauongo ngkana I rairaki nako iai man tataro.

²¹Bon am toro ngai, ao bon am b'ai Iteraera, ma ngaia are, ngkana iai maibuakora ae e kaaitaraa am Tembora man tataro, ao ko na kaeka mani mwengam i karawa ao kab'arai ara bure.

²²Ngkana tao arona b'a iai ae e bukinaki ni karaoa te m'akuri ae e bure, ao e a kateaki te tia bukinaki i matan te baonikarea i nanon te Tembora ao e taku, “I bon tuea b'a I aki bure!”

²³Ko na ongora mai karawa ao baaireia b'a antai ae e eti. Ao i mwiina, katuaaea te aomata are e reke n te bure ao kainaomata te aomata are bon akea ana bure.

²⁴Ngkana tao arona b'a e karaoa te bure Iteraera nakoim, ao i mwiina, e a manga konaaki irouia aia kairiribai. Ao ngkana a manga nakomai nakon te Tembora aei ni buubutiiko i bukin kab'araan aia bure,

²⁵ko na ongora man mwengam are i karawa. Kab'arai aia bure ao kaokiia nakon te aba are ko a tia n anganiia aia bakatibu.

²⁶Ngkana tao arona b'a a bure am aomata nakoim, ao ko katuaaia n taua te karau b'a e na aki b'aka. Ao ngkana a manga katoka karaoan te bure ao a manga tanrikaaki nakon am Tembora man tataro n aram,

²⁷ko na ongora mani mwengam are i karawa ao kab'arai aia bure. Bon am toro Iteraera, ma ngaia ae ko na reireiia aroia ni maiuakina te raoiroi. Ao kab'aka te karau i aon te aba n aron am berita nakoia are akea tokina.

²⁸N tabetai ane a na m'auteretere arokan te tawaana ke a na mka ke a na kanaki n taian rokati [18] ke taian taake, ao ane a na bora ni baki am aomata. N tabetai a na roko kairiribai ni katobibia aia kaawa, ke a na aoraki aomata n te aoraki ae moan te kamaamate.

²⁹Taiaoka ma ongora nakon temanna mai Iteraera ane e namakinna ni koaua ana bure ao man tataro ma baina aika a tangaina nakon am Tembora.

³⁰Ko bon atai b'aai ni kabane ake inanoia aomata nako. Ma ngaia are, ko na kaekai aia tataro mani mwengam ane i karawa, n aron te b'ai are a karaoia ke te b'ai are i nanoia.

³¹Ao ane a na taromauriiko iai am aomata ao a na ongotaeka iroum ni kabane aia tai ni maeka n te aba are ko anganiia aia bakatibu.

³²Ane a na ongo rongorongom iruwa ma taekan m'aakam, ao ane a na roko tabeman ni maeka i buakoia am aomata aika Iteraera. Ngkana iai i buakoia aika a tataro nakon te Tembora aei,

³³ao ongora mani mwengam ane i karawa ao kaekai aia tataro. Ao ane a na bane kaain aonnaba n taromauriiko, n ai aron are a karaoia ake bon am aomata aika Iteraera, ao ane a na ataia iai b'a I karaoa te Tembora aei i bukin neboakim.

³⁴N tabetai ane ko na tuangiia am aomata b'a a na buakaniia aia kairiribai. Ao ane a na rairaki am aomata ni kaaitaraa te Tembora aei ae I a tia ni karaoia i bukim n am kaawa ae e rineaki, ao ane a na tataro nakoim.

³⁵Ko na kaekai aia tataro mani mwengam ane i karawa ao anganiia te tokanikai.

³⁶A bane ni bure aomata ni kabane, ma ngkana a bure am aomata nakoim, ao ngkana arona b'a ko a un n te aro are ko a kariaia aia kairiribai b'a a na uotiia nakon abaia ianena.

³⁷Rimwi, a manga namakina aia bure n te b'ai are a tia ni karaoia ao a manga bubuti kab'araan aia bure.

³⁸Ko na kaekaia ngkana a tataro nakon te Tembora aei ae I a tia ni karaoia n am kaawa ae e rineaki, n te aba aei are ko anganiia aia bakatibu.

³⁹Ko na kakauongo nakon aia tataro m'aaka ao kab'arai aia bure aomata.

⁴⁰Te UEA ae te Atua, ongora iroura ngkana ti tataro n te Tembora aei.

⁴¹Nakomai nakon mwengam ae e boou, ae ti a tia ni karina iai te Atiniberita, are boni kanikinaean korakoram. I tataro b'a ngkana a katanoataa m'aakam ibonga i bukin kamaiuaia aomata, ao ane a na kukurei aomata akana a kakaonimaki nakoim i bukin b'aai aika ko a tia ni karaoi i bukiia.

⁴²Ko na ururinga am tangira ngkoa nakon am toro are Tawita, [19] B'a ko aonga n aki tannako mairouia am uea aika ko rineia.