Read Te B'aib'ara 2.Rongorongo 9 Bible Online

2.Rongorongo 9 - Te B'aib'ara bible

2.Rongorongo 9

¹Ao e ongo rongorongon Toromon te ueanaine mai Tieba, ma ngaia are, e nako Ierutarem ni kataia n taian titiraki aika a matoatoa. E kairiia ana aobitia tabeman, ao e kanoai taiani kaamero n taiani b'aintangira aika taiani boiarara, tirewa, ao taiani koora. Ao ngke e roko, ao e a maroroo ma Toromon i bukin b'aai ni kabane ake e atai.

²Ao e kabooi ana titiraki neirei Toromon ni kabane, e ngae ngkana e matoatoa te titiraki.

³Ao e rangi ni mimi te ueanaine mai Tieba ni wanawanan Toromon. E rangi ni mimi ngke e noora ana bareti, [25]

⁴te am'arake i aon te taibora, ana mataniwi nako, ana toro ni kabane aika a kaboraoi, ao te karea are e anga i nanon ana Tembora te UEA.

⁵Ao e taku neierei: Toromon, I ongo i aon abau rongorongom ma wanawanam ao b'aai ni kabane aika ko a tia ni karaoi i abau.

⁶Ma I bon aki kakoauai ni karokoa I a bon noria raoi ni matau! Ao ngaia a m'aiti riki aika I tuai n ongo taekaia. E korakora riki taekam nakon ae I a tia ni kaongoaki.

⁷A rangi n tekeraoi am mataniwi ma am aomata ngkai a mena ikai i rarikim b'a a konaa n reke aia tai n ongongora n am taeka n rabakau.

⁸I neboa te UEA ae Atuam. E tangiriko ao E karaoiko b'a uean Iteraera. E tangiriia kaain te aba aei te Atua ao e aki konaa n tannako mairouia, ai ngaia are, e a tia n anganiia aia uea ae e na tautaekaniia n te eti ao te raoiroi.

⁹Ao e angan Toromon e kaaniia e raka i aon aua te ngaa te kirokuraem te koora, ao taian tirewa ae e rangi ni m'aiti, ao taiani b'ai ni kaboiarara aika a rangi n raraoi aika a tuai man nooraki.

¹⁰Ao Toromon e a manga angan neirei b'aai ni kabane ake e tangiri

¹¹n aron ae e m'aiti riki nakon are e a tia n anga neirei nako ina.

¹²Ao i mwiina, e a okinako neirei ma ana mataniwi nako abaia. A uoti taiani koora, kaai aika tuniba, ao taiani atiibu aika a tamaroa ana kaimoa Iram ma Toromon nakon te uea are Toromon man te aba are Obira. E kabonganai taiani kai Toromon i bukin karaoan taiani kaintam'arake [26] i bukin te Tembora ma te bareti, ao taian aabi ao b'aai riki ni katangitang ake tabeua ake taiani karai i bukiia taani katangitang. A bon tuai kaakaraoaki b'aai aikai mai m'aaina i aon Iuta.

¹³A reke iroun Toromon e kaaniia 23,000 kirokuraem te koora ni katoa ririki,

¹⁴ao e aki warekia b'a iraua ake a nikiria taani boob'ai ma taani iokinib'ai i rouna. A anganna naba taiani koora ao tirewa taian uea mai Arabia ao taani kairiiri mai Iteraera.

¹⁵E karaoi uabubua taian otanga aika taiani koora aika rawataia tenua te kirokuraem n tatabeua nako.

¹⁶E karaoi naba tenibubua otanga aika a uarereke riki aika koora aika 2 te kirokuraem rawaawatan teuana, ao e katikui taian otanga aikai i nanon ana bareti n te Ruu are Buakonikai.

¹⁷E karaoaki ana kaintokanuea man koron te ereb'anti ao e kabiraki n te koora ni koaua.

¹⁸Bon iai naba nangoan te wae ae te koora ae e nim ma ngaia, ao iai naba kaintokan te bai i rarikina ake uoua. Bon iai naba bannan te raian i angaatain ao angamaingin ana kaintokanuea,

¹⁹ao iai naba bannan taian raian aika tengaun ma uoman i angaatain ao angamaingin te kainrarake nakon te kaintokanuea ni katoai kainararake ake onoua. Bon akea te kaintokanuea n te aonnaba ae ai aron ana kaintokanuea Toromon.

²⁰A karaoaki ana b'ainam'arake Toromon ake n te Ruu are Buakonikain Reb'anon man taian koora ni koaua, i bukina b'a a aki rangi ni kakaawaki taiani tirewa ni boong akekei.

²¹A m'aiti ana kaibuke ni m'am'ananga Toromon i taari. [27] E kaakanakoi ni katoa tenua te ririki ma ana kaibuke Iram ni uoti rikaaki taiani koora, tirewa, ao koron taian ereb'anti, ao ai uana naba ma taiani m'angkii ao biikooki. [28]

²²Bon te kabanea ni kaub'ai ma ni wanawana Toromon n te aonnaba.

²³I nanon te ririki teuana ma teuana, ao a roko uea tabem'aang n ongora wanawanana are e a tia n anganna te Atua.

²⁴Ao a uoti taiani b'aintangira aika tirewa ma koora, ao ai uana naba ma taiani kunnikai, b'aai ni buaka, b'ai ni kaboiarara, taian aoti, ao ai taiani miure.

²⁵M'aitin ana tabo ni kaawakin aoti ao kanibuaka Toromon bon aua te ngaa m'aitina, ao iai naba ana aoti ae m'aitina tebwi ma uoua te ngaa ake e kaawakin i Ierutarem ao ni kaawa naba ake tabeua.

²⁶E tautaekaniia botannaomata nako man te Karaanga are Iuberetiti i meang nakon abaia kaain Biritia i maiaki, ni karokoa tian aban Aikubita.

²⁷Ngke e uea Toromon, ao e raea te tirewa n taabo nako i Ierutarem, ao a m'aiti taian tiira kaanga ai aron kaai aika tukomorea i oin taian tabuki ake i maeao.

²⁸A uotaki ana aoti Toromon man aaba tabeua, ni ikotaki naba ma Mutiri. [29]

²⁹Ao b'aai ni kabane ake e karaoi Toromon i nanon ana tai ni uea a bane ni koreaki n ana Rongorongo Natan are te burabeti, Aiia are te burabeti mai Tiro, ao Ito are te burabeti are e korea rongorongon Ieroboam are natin Netaba te m'aane.

³⁰I mwiin tautaekan Toromon i nanon abwi te ririki mai Ierutarem,

³¹e a mate ao e taunaki n ana kaawa tamana are Tawita. E a manga uea natina are Reoboam i mwiina.