Read Te B'aib'ara Etira 1 Bible Online

Etira 1 - Te B'aib'ara bible

Etira 1

¹N ririki ake ngkoa, ao te UEA e kanakoa Ieremia ma rongorongon te berita b'a a na kainaomataaki Iteraera mai B'aburon i mwiin itibwi te ririki i bukiia Iteraera. Ao n ana moan ririki Tairati ni uea i aon Botia, [1] ao e kakoroa nanon ana berita te UEA ngke e karekea Tairati b'a e na kanakoa ana rongorongo ae e taabangaki ataakina ni kabutaa m'akoron nako abanueana:

²Bon uean Botia ngai ae Tairati. E a tia te UEA ae Atuan karawa, are bon Atuaia naba Iteraera ni karikai b'a N na tautaeka i aon taiani botannaomata ni kabane n te aonnaba. Ao e a tia n rineai b'a N na manga karaoa te Tembora i bukina i Ierutarem, are i Iuta.

³E na boni kaawakiniia ana Aomata ma ni kakorakoraia ake a tangiria n okira Ierutarem ni buoka manga karaoan te Tembora.

⁴A na riai aomata nako ni katauraoi b'aai ni kabane aika a na kainanoaki. A na riai n anga te m'aane, b'aai, ao taiani man, ao ai uana naba ma taiani b'aintangira i bukin manga katean ana Tembora te Atua.

⁵A bane n namakinna aomata b'a e tangiriia te UEA ae te Atua b'a a na buoka manga karaoan ana Tembora, ao a bane ni iangoia b'a a na nako Ierutarem. Mai i buakoia ake a tangiria n oki ni buoka manga katean te Tembora, ao ni manga katea Ierutarem bon taian ibonga, kanoan Rewi, ao taani kairiiri man te baronga are Iuta ao Beniamin.

⁶Ao ake tekorakina a buobuoki n anga b'aai aika a karaoaki man te tirewa, ao taiani koora, ao bon aia b'ai nako, taian kao, ao b'aintangira riki tabeua aika a kakaawaki, ao ai uana naba ma taian angab'ai i bukin te Tembora.

⁷Ao Tairati are te uea e a kaoki taian b'ai ake e anai ngkoa Nebukaneta [2] man te Tembora i Ierutarem ake e katikui ngkoa i nanon aia tembora antina.

⁸Ao Tairati, e rinea Miteretata, are ana tia kaawakin kaub'ai ae e rietaata b'a e na kaawakin baikai. E wareki m'aitiia Miteretata ao e anga m'aitiia nakon Tetibata, are te koowana i Iuta.

⁹Aei m'aitina: 30 turee aika koora aika buubura; 1,000 taian turee aika tirewa aika buubura

¹⁰ao 29 riki aeka ni b'ainam'arake., 30 boora aika koora; 410 boora aika tirewa; ao 1,000 aekan b'ai riki tabeua.

¹¹Bootan b'aai akekei ni kabane bon 5,400 taian turee ao boora aika koora ao tirewa, ao b'aai riki tabeua. E anai Tetibata ao e uoti rikaaki ngke e okira Ierutarem mai B'aburon ma raona ake tekorakina.