Read Te B'aib'ara Etira 2 Bible Online

Etira 2 - Te B'aib'ara bible

Etira 2

¹E a tia uean B'aburon are Nebukaneta [3] n tauia kaain Iuta aika a bati, ao e uotiia nako B'aburon b'a ana taenikai. I aoni kawaia ngkai n okira Ierutarem ma oin aia kaawa nako i aon Iuta.

²Aikai naake a tararuaia koraki ake a oki rikaaki: Terub'abera, Iotua, [4]

³Neemia, Teraia, Reeraia, Moretekai, Biretian, Mitib'ara, Bikewai, Reum, ao Baana.

⁴Aikai araia ma m'aitiia te koraki ake a oki mani m'akoron nako aia utu n tatabeua nako:

⁵uoua tengaa tebubua itingaun ma uoman man te utu are Baroti;

⁶tenibubua itingaun ma uoman man te utu are Tebatia,

⁷itibubua itingaun ma niiman man te utu are Ara,

⁸uoua tengaa wanibubua tengaun ma uoman ana kariki Ietua ao Ioaba [5] man te utu are Baata Moaaba;

⁹teuana tengaa uabubua nimangaun ma aman man te utu are Eram;

¹⁰ruabubua angaun ma niiman man te utu are Tatu;

¹¹itibubua onongaun man te utu are Takai;

¹²onobubua angaun ma uoman man te utu are Bani;

¹³onobubua uangaun ma teniman man te utu are Bebai;

¹⁴teuana tengaa uabubua uangaun ma uoman man te utu are Atikata;

¹⁵onobubua onongaun ma onoman man te utu are Atonikam;

¹⁶uoua tengaa ao nimangaun ma onoman man te utu are Bikewai;

¹⁷abubua nimangaun ma aman man te utu are Arin;

¹⁸ruangaun ma waniman man te utu are Atera; e ataaki naba n arana ae Etekia;

¹⁹tenibubua uangaun ma teniman man te utu are Betai; tebubua tengaun ma uoman man te utu are Iora;

²⁰uabubua uangaun ma teniman man te utu are Atum; ruangaun ma niman man te utu are Kib'a.

²¹Aikai araia ma m'aitiia aomata ake a oki ake a nako ngkoa aia bakatibu man taian kaawa aikai:

²²tebubua uangaun ma teniman man te kaawa are Betereem;

²³nimangaun ma onoman man te kaawa are Netob'a;

²⁴tebubua uangaun ma waniman man te kaawa are Anatota;

²⁵angaun ma uoman man te kaawa are Atimaweta;

²⁶itibubua angaun ma teniman man te kaawa are Kiriataim, Kebira, ao Beerota;

²⁷onobubua uangaun ma temanna man te kaawa are Ram'a ao Keeb'a;

²⁸tebubua uangaun ma uoman man te kaawa are Mikemati;

²⁹uabubua uangaun ma teniman man te kaawa are Betaera ao Ai;

³⁰nimangaun ma uoman man te kaawa are Nebo;

³¹tebubua nimangaun ma onoman man te kaawa are Makebiti;

³²teuana tengaa uabubua nimangaun ma aman man te kaawa are Eram are teuana;

³³tenibubua uangaun man te kaawa are Arim; itibubua uangaun ma niiman man te kaawa are Rote, Arita, ao Ono;

³⁴tenibubua angaun ma niiman man te kaawa are Ieriko;

³⁵ao tenua tengaa onobubua teningaun man te kaawa are Tenaa.

³⁶Aikai araia ma m'aitiia ake a oki man aia utu ibonga: ruabubua itingaun ma teniman ake ana kariki Ietua man te utu are Ietaia;

³⁷teuana tengaa ao nimangaun ma uoman man te utu are Immera;

³⁸teuana tengaa uabubua angaun ma itiman man te utu are Batura

³⁹ao teuana tengaa ao tengaun ma itiman man te utu are Arim.

⁴⁰Aikai araia ma m'aitiia koraki ake a oki man utuia nako kanoan Rewi: itingaun ma aman man ana kariki Otawia man te utu are Ietua ao Katemiera;

⁴¹tebubua uangaun ma waniman man ana kariki Ataba mairouia taani katangitang ao taan anene n te Tembora;

⁴²ao tebubua teningaun ma ruaman man ana kariki Tiarum, Atera, Taremon, Akuba, Atita, ao Tiobai mairouia taan tei n te Tembora.

⁴³Aikai araia ma m'aitiia utuia taani m'akuri n te Tembora ake a oki ake a riki mairouia aomata aikai:

⁴⁴Tia, Atuba, Tabaote,

⁴⁵Keroti, Tiaa, Baton,

⁴⁶Ribana, Akaba, Akuba,

⁴⁷Akaba, Tiamrai, Anan,

⁴⁸Kitera, Kaa, Reaia,

⁴⁹Retin, Nekota, Katam,

⁵⁰Uta, Batea, Betai,

⁵¹Atina, Meunim, Nebitim,

⁵²Bakebuka, Akuba, Areura,

⁵³Batiruta, Meita, Aretia, Barekoti,

⁵⁴Titera, Tem'a, Netia, ao Atiba.

⁵⁵Aikai araia ma m'aitiia ana taani m'akuri Toromon ake a oki ake a riki mairouia aomata aikai:

⁵⁶Totai, Atobereta, Beruta, Iaara, Tarekon,

⁵⁷Kitera, Tebatia, Atira, Bokireta Atebaim, ao Ami.

⁵⁸Bootan m'aitiia ana taani m'akuri Toromon n te Tembora ma ake bon oin ana taani m'akuri ake a oki bon tenibubua ruangaun ma uoman.

⁵⁹Bootan m'aitiia ake a oki man utuun nako Teraia, Tobia, ao Nekota bon onobubua nimangaun ma uoman, e ngae ngke a aki konaa ni kakoauaia b'a bon kanoan naba Iteraera ngaiia.

⁶⁰A tia ni maeka ni kaawan nako B'aburon ake Tere Mera, Tere Aretia, Kerub'a, Atan, ao Immera.

⁶¹A aki konaa ni kakoauaia b'a ibonga naba utuun nako Abaia, Akoti, ao Baretirai. E iein ana bakatibu Baretirai ma natin Baretirai te aine are mai Kireata ao e katokaa aran ana utu buuna.

⁶²Ma a aki konaa n reke araia utu aika tenua aikai, ao bon akea mai buakoia aika a kariaiakaki b'a a na riki b'a ibonga.

⁶³Ni koauana, ao a tuangaki iroun te koowana [6] ni kaangai, Kam aki konaa ni kang taian am'arake ake taian angab'ai nakon te Atua ni karokoa kam boni kakoaua raoi b'a bon taian ibonga ngkami.

⁶⁴Bootan m'aitiia ake a oki bon abwi ma uoua tengaa tenibubua onongaun,

⁶⁵ao i buakoia itiua tengaa tenibubua teningaun ma itiman tooro m'aane ao aine, ao uabubua taani katangitang ao taan anene aika m'aane ma aine.

⁶⁶Itibubua teningaun ma onoman taian aoti, uabubua angaun ma niiman taiani miure,

⁶⁷abubua teningaun ma niiman taiani kamero, ao onoua tengaa itibubua uangaun taian aati.

⁶⁸Ao ngke a roko aomata n te tabo are e tei iai ngkoa ana Tembora te UEA i Ierutarem, ao tabeman mataniwiia utu a anga aia b'ai n tangira b'a e aonga ni konaa ni manga kateaki n te tabo are e bon tei iai ngkoa.

⁶⁹A anga b'aai ni kabane n aron ae a konaa, ao e a roko n te boota ae m'aitina nimabubua te kirokuraem te koora, uoua tengaa wanibubua itibwi te kirokuraem te tirewa, ao tebubua niiniiraia ni ibonga.

⁷⁰Ao a bane n okiri aia kaawa nako aomata man taabo ake a bon nako mai iai aia utu nako, n reitaki ma taian ibonga, kanoan Rewi, taani katangitang ao taan anene, taan teiakina te Tembora ao taani m'akuri.[7]