Read Te B'aib'ara Etira 6 Bible Online

Etira 6 - Te B'aib'ara bible

Etira 6

¹Ao te uea ae Taraiati e tuangiia tabeman b'a a na wareki taian rongorongo nikawai ake a kaawakinaki i B'aburon.

²Ao n tokina e a kuneaki te niira ni boki [31] i Akemeta, ni kaawan te tautaeka are ni m'akorona are Miria ao e kaangai: E na kaotaki n te rongorongo ae e taabangaki aei,

³b'a n ana moan ririki ni uea Tairati, ao e anga ana taeka b'a e na manga kateaki ana Tembora te UEA i Ierutarem, b'a a aonga n nikiraki taian angab'ai ma taiani karea iai.[32] E na kateaki nakon uabwi ma itiua te miita rietana ao uabwi ma itiua te miita rababana,

⁴ao teuana [33] te rinan ni kai aika tatanga i bukin tenua rinan n atiibu aika a buubura. A na kabooaki b'aai ni kabane mani kaub'ain te uea.

⁵Ao manga kaoki nakon nneia taian koora ma tirewa ake e anai ngkoa Nebukaneta man te Tembora nako B'aburon.

⁶Ao e kanakoa ana rongorongo Taraiati are te uea ae e kaangai: Tatenai ae te koowana ni m'akoron te tautaeka i Maeao, ao Teeta Botenai, ngkami ma ami taan iango kam na riai ni kararoaingkami man te Tembora.

⁷Kariaia aia koowana Iutaia ma aia taani kairiiri b'a a na manga katea te Tembora n te tabo are e bon tei iai mai m'aaina. Ao tai manga katokitokiia.

⁸Kam nang riai ni moanna mangkai, i aan au taeka b'a kam na buokiia tani kairiiri i bukin kabooan aia kabane m'aane man te taekiti ake a rikoaki mani m'akoron te tautaeka i Maeao.

⁹Ao kam na riai ni katauraoi b'aai ni kabane akana a na tangiraki irouia ibonga akana i Ierutarem ni katoa bong b'a a aonga ni konaa n anga b'aintangira nakon te Atua i karawa. Anganiia taian kao ataei, tiibu m'aane, taian tiibu, ao ai uana naba ma te uita, te taoro, te wain, ao b'aan te oriwa.

¹⁰I tangiriia b'a a na konaa n anga aia karea ni kakukurei nakon te Atua ma n tataro naba ibuku ma au utu.

¹¹Ngkana iai i buakomi ae e aki ongotaeka nakon au taeka aikai, ao e na anaaki te tatanga te kai man am auti ao e na kakangiaki tabona teuana. Ao i mwiina, e na ewaraki nako ri nanon rab'atam, [34] ao e na kab'akaaki am auti ao e na karikaki b'a te nne ni maange.

¹²I buubutiia te Atua are e taataromauriaki i Ierutarem b'a e na kamaunaia uea, ke botannaomata akana a kataia ni bita te b'ai ae I a tia n taekinna, ke ni kataia ni kab'aka te Tembora aei. Boni ngai ae Taraiati ae I kanakoi taeka aikai, ma au kaantaninga b'a a na iraki nanoia ma te taratara raoi.

¹³Ao a ongotaeka raoi koowana are Tatenai, Teeta Botenai, ao aia taan iango iroun te uea are Taraiati.

¹⁴Ao a nakoraoi aia m'akuri taani kairiiri mairouia taiani Iutaia n reitakinakoan karaoan te Tembora, ao a tabe Akai ma Tekaria ni kab'arab'ara ni kaungai nanoia. Ai ngaia are, e a tia te Tembora i aan ana kairiiri Atuan Iteraera, ao mai aan naba ana taeka Taraiati, ao Atatokititi are kaain Botia. [35]

¹⁵Ni katenuan bongin te nam'akaina are Ata [36] ni kaonouan ana ririki n tautaeka Taraiati, [37] ao e a bobonga iai karaoan te Tembora.

¹⁶Ao a bane ni kukurei Iteraera, taian ibonga, kanoan Rewi, ao aomata ni kabane ake a tia n oki man te kataenikaiaki, ao a bane ni bukamarua a katabuan ana Tembora te Atua.

¹⁷Tebubua kaao, uabubua tiibu m'aane, abubua tiibu ataei aika a kareanaki i bukin te katabu. Ao ai uana naba ma tengaun ma uoman taian kooti aika a kareanaki i bukin kab'araan aia bure barongan Iteraera ake tengaun ma uabaronga.

¹⁸Ao i mwiina, a anganaki tabeia ibonga ma kanoan Rewi n ana Tembora te UEA i Ierutarem, ni kaineti ma taiani kaetieti ake e a tia ni koroi Moote.

¹⁹Ao a bane aomata ake a oki man te kataenikaiaki ni kauringa te Riao ni katebwi ma auani bongin te moan nam'akaina.[38]

²⁰Ao taiani ibonga ma kanoan Rewi a tia ni karaoi kaitiakaia n aron taekan te tua b'a a aonga n tau i bukin kairan te taromauri. Ao tabeman mai buakoia a tiring tiibuteteein te Riao i bukiia ake a tib'a oki, n reitaki ma ibonga ake tekorakina ao bon i bukiia naba.

²¹A kanaki taian karea irouia aomatan Iteraera ake a oki ao irouia naba aomata ake kaain rarikiia ake a tia ni kaaki katei aika a bure, ake kateia botannaomata ake tabeua b'a a aonga ni konaa n taromauriia te UEA ae Atuaia aomatan Iteraera.

²²A kauringa te Toa are te Kariki ae Aki Karikaki i nanon itiua te bong. A bane ni kukurei aomata i bukina ngke e a tia te UEA ae Atuaia aomatan Iteraera ni kabobongaa raoi nanon uean Aturia b'a e boni karaoa te m'akuri n akoi [39] ma ni buokiia ni karaoa te Tembora.