Read Te B'aib'ara Etira 7 Bible Online

Etira 7 - Te B'aib'ara bible

Etira 7

¹I mwiin ririki aika bati, ngke e uea Atatokititi [40] i aon Botia, ao iai te m'aane ae arana Etira. E kataia ni kakae nako rongorongon rikiia ana bakatibu ni karokoa teuare Aron, mataniwiia ibonga, n aron aio: Etira bon te m'aane ae natin Teraia, natin Ataria, natin Irekia,

²natin Tiarum, natin Tatoka, natin Aituba,

³natin Amaria, natin Ataria, natin Meraiota,

⁴natin Teraia, natin Uti, natin Buki,

⁵natin Abitua, Bineati, Ereata, natin Aaron are te ibonga ae e rietaata.

⁶Bon te aomata ae e rangi atatai Etira n te tua n te aro are e a tia n anga te UEA ae Atuaia aomatan Iteraera nakon Moote, ao E kabobongaa nanon te uea n te aro b'a a na bane n reke baike e buubuti iai Etira.

⁷Ao a raona Etira n nako Ierutarem Iutaia ake tekorakina, n ikotaki ma ibonga, kanoan Rewi, taani katangitang, taan teiakina te Tembora, ao taani m'akuri. E riki aei n ana kaitiua n ririki Atatokititi [41] n uea.

⁸E buoka Etira te Atua, ao e roko i Ierutarem ni moani bongin te kanimaua n nam'akaina [42]

⁹n te kaitiua n ririki anne, i mwiin kiitanakin B'aburon ni moani bongin te moan nam'akaina. [43]

¹⁰E a tia Etira ni kabanea maiuna ni kamateb'aia, ao n ongotaeka n ana Tua te UEA ma n reireiniia tabem'aang iai.

¹¹Bon te ibonga Etira ao te aomata ae e rangi n atatai n ana Tua te UEA, n ikotaki ma ana mwioko ake e a tia n anganiia Iteraera. N te bong teuana ao e a anga te reta te uea are Atatokititi nakon Etira ae e kaangai kanoana:

¹²Te Kamauri mairoun te uea ae Atatokititi nakon Etira are te ibonga, ao te aomata ae e atatai n ana reirei te Atua are i karawa.

¹³A kona n iriko Iteraera, ke taiani ibonga, ke kanoan Rewi aika i nanon abanueau, ao ngkana a kan iriko nako Ierutarem.

¹⁴I boraoi ni iango ma au taan iango ake itiman b'a ko konaa n nako Ierutarem ao Iuta ni kakoauaa raoi[44] b'a e iraki ana tua Atuam.

¹⁵Ngkana ko nako, ao ko na uoti tirewa ao koora ake I a tia ngai ma au taan iango n anga ma te kukurei n nano nakon Atuan Iteraera, are e mena ana Tembora i Ierutarem.

¹⁶Ko na uoti tirewa ao koora aika ko rikoi man taabo nako i aon B'aburon. Ko na uoti naba b'aintangira ake a anga am aomata ao ibonga ma te kukurei ae e bati i bukin ana Tembora Atuam i Ierutarem.

¹⁷Ko na kamanenaa raoi te m'aane ni kabooi iai kaao, tiibu m'aane, tiibu ataei, te uita, ao te wain. Ao ko na karean i aon baonikarean ana Tembora te Atua i Ierutarem.

¹⁸Ngkana iai nikiran tirewa ma koora, ao kam na kamanenaa ngkoe ma am aomata ni b'aai akana kam taku b'a e na kukureia Atuami.

¹⁹Angan Atuam b'aai ake tabeua ake a tia n anga aomata b'a a na kabonganaaki n ana Tembora.

²⁰Ngkana iai riki te b'ai ane kam na tangiria i bukin te Tembora, ao kam konaa ni kamanenaa te m'aane are ni kaub'ain te uea.

²¹Etira, bon te ibonga ngkoe ao ko atatai n ana tua te Atua ni karawa, ao I a tia n tuangiia taani kaawakin taiani kaub'ai ni kabane n te m'akoro n tautaeka i Maeao aia kabanea n tamaroa ni buokiko.

²²A na kariaiakaki n anga te m'aiti ae tenua tengaa abubua te kirokuraem te tirewa, tebwi ma tenua tengaa nimabubua te kirokuraem te uita, uoua tengaa te riita te wain, uoua tengaa te riita b'aan te oriwa, ma kam na aki raka i aoia. Ao taian taoro ni kabane akana ko kainanoi.

²³A na riai ni katauraoi b'aai ni kabane akana e na kainanoi Atuani karawa i bukin ana Tembora, b'a e aonga n aki manga un irou ao irouia uea akana a na tautaeka imwiiu.

²⁴I tangiria b'a kam na ataia b'a akea te ibonga, kanoan Rewi, taani katangitang ma taan anene, taan tararua, taani m'akuri n te Tembora, ao taani m'akuri n te Tembora ake tekorakina aika a na manga kab'akai aekakin taekiti nako.

²⁵Etira, ko na kamanenaa te wanawana ane e a tia n anganiko te Atua n rineia mataniwi, ao taani kairiiri ake a na tararuaia kaain m'akoron te tautaeka are i Maeao. A na riai taani kairiiri aikai n ataa ana tua te Atua, ao a na reireiniia aomata ni kabane aika a aki ataia.

²⁶Ni kabaneia koraki akana a aki ongotaeka nakon ana tua te Atua ke ana tua te uea, a na katuaaeaki n aki nanoangaaki. A na kamateaki, ke a na kainaki n te karabuuti, ke a na kanakoaki man te aba, ke a na bane n anaaki b'aai ni kabane akana a b'ain.

²⁷E taku Etira i bukina ngke e rangi n ataataiaomata Atatokititi: Neboa te UEA ae Atuaia ara bakatibu. E boni kabobonga raoi karinean ana Tembora i Ierutarem iroun te uea.

²⁸E a tia te Atua n tuanga te uea, ma ana taan iango, ao ana mataniwi aika a m'aaka b'a a na akoai. E a tia te UEA ae te Atua ni buokai, ao I a tia ni konaa ni kairiia rikaaki taani kairiiri aika Iutaia aika a m'aiti nako Ierutarem.