Read Te B'aib'ara Etira 8 Bible Online

Etira 8 - Te B'aib'ara bible

Etira 8

¹E uea Atatokititi i Botia ngke I[45] kairiia mai B'aburon nako Ierutarem mataniwiin bootaki n utu ake:

²Keritiom man ana utu Bineati,

³Taniera man ana utu Itama,

⁴Atuti are natin Tekania te m'aane man ana utu Tawita;

⁵Tekaria ao tebubua nimangaun m'aane tabem'aang man ana utu Baroti, are a mena i rouna rongorongon taian utu;

⁶Erioenai are natin Teraia te m'aane ma uabubua m'aane man ana utu Baata Moaaba;

⁷Tekania are natin Iaatiera te m'aane ma tenibubua m'aane man ana utu Tatu; [46]

⁸Ebeta are natin Ionatan te m'aane ma nimangaun m'aane man ana utu Arin,

⁹Ietiaia are natin Ataria te m'aane ma itingaun m'aane man ana utu Eram;

¹⁰Tebaria are natin Mikaere te m'aane ma waningaun m'aane man ana utu Tebatia;

¹¹Ob'aria are natin Ieira te m'aane ma uabubua tengaun ma waniman m'aane man ana utu Ioaba;

¹²Teromita are natin Iotibeia te m'aane ma tebubua onongaun m'aane man ana utu Bani;[47]

¹³Tekaria are natin Bebai te m'aane ma uangaun ma waniman m'aane man ana utu Bebai; Ioana are natin Akatan te m'aane ma tebubua tengaun m'aane man ana utu Atikata;

¹⁴Eribereta, Ieuera, ao Temaia ake a oki tabeua te tai rimwi riki ma onongaun m'aane man ana utu Atonikam; Utai ao Takuura ma itingaun m'aane man ana utu Bikewai.

¹⁵I[48] bootia aomata ni kabane i rarikin te karaanga[49] are e raanga nakon te kaawa are Aawa[50] ike ti kaemb'a iai i nanon tenua te bong. Bon akea temanna kanoan Rewi ae e kuneaki i buakoia aomata ma ibonga.

¹⁶Ma ngaia are, I kanaanako weteaia taani kairiiri ake Erietera, Ariera, Temaia, Erenatan, Iariba, Erenatan, Natan, Tekaria ao Meturam. I kanaanako naba weteaia Ioiariba ao Erenatan, ake a rangi n rabakau.

¹⁷Ao i mwiina, I kanakoia nakon Ito are te tia kairiiri i Katibia, [51] ao I tuangiia b'a a na buubutiia ma ana taani m'akuri n te Tembora b'a a na kanakomaia aomata b'a a na m'akuri n ana Tembora te Atua.

¹⁸E akoi te Atua nakoira, ao e karekea nanoia b'a a na kanakomaia te aomata ae e rangi ni m'aatai ae arana Terebia, ae boni kanoan Rewi man ana utu Mari. A raonna n roko tengaun ma waniman ana utu.

¹⁹Ti boni kanakoa naba Atiabia ao Ietiaia man ana utu Merari, n reitaki ma uangaun aia utu.

²⁰N raonaki ma aikanne, bon uabubua uangaun tekorakina aika a roko ni buokiia kanoan Rewi i nanon te Tembora. A tia n rineaki aia bakatibu taani m'akuri aikai i nanon ririki aika a b'aka nako iroun te uea are Tawita [52] ma ana mataniwi, ao a bane n tauaki m'aitiia ma araia.

²¹I a buubutiia [53] aomata ngke ti mena i rarikin te Karaanga are Aawa, [54] b'a a na aki am'aam'arake [55] ao a na tataro. Ti kananorinanoira ao ti buubutia te Atua b'a e na anganiira ma natira te mauri i aon Ierutarem ao i aon ara b'ai ni kabane.

²²I mamaa ni buubutia te uea b'a e na kanakoia ana tautia ma ana taan toka i aoia aoti, b'a a na kaawakiniira mairouia ara kairiribai i aon kawaira. Ao i rarikin anne, ti a tia n tuanga te uea b'a Atuara e kaawakiniia aomata ni kabane aika a taromauriia ma te koaua, ao E bon un ma ni katuuaia aomata akana a rawa n ongotaeka Irouna.

²³Ma ngaia are, ti aki am'aam'arake ao ti buubutiia te Atua b'a e na kaawakiniira, ao E kaekai ara tataro.

²⁴I [56] rineia tengaun ma uoman ibonga aika taani kairiiri: Terebia, Atiabia ao tengaun aia utu.

²⁵Ao i mwiina, I taui rawaawatan taian b'aintangira ake e anga te aba i bukin ana Tembora te Atua, ao I tib'aia i aoia taiani ibonga ake tengaun ma uoman ake I a tia n rineaia. Bon iai b'aintangira aika tirewa ao koora, ao ai uana naba ma b'aai ake e a tia n anga te uea, ma ana taan iango, ana aobitia ao Iteraera.

²⁶Bootaia bon uabwi ma nimaua te tan te tirewa; tebubua b'aai aika a karaoaki man te tirewa ae rawawataia bon itibwi te kirokuraem; tenua tengaa abubua te kirokuraem te koora;

²⁷uabwi boora aika koora aika m'aane te kirokuraem rawawataia; ao uoua taian b'ai aika buraati aika a karaneaneaaki ae kaanga ai aron kakaawakin te koora.

²⁸Ao I taku nakoia ibonga: Ngkami bon ana Aomata te UEA ae Atuaia ami bakatibu, ao bon ana b'ai naba baikai. A tia n anga tirewa ma koora aomata ma nanoia ni koaua, b'a aia b'aintangira nakon te UEA.

²⁹Kam na kakoaua raoi b'a kam teiakin baikai ni kaawakin ni karokoa kam roko i Ierutarem. Ao i mwiina, kam na taui rawawataia i nanon ana Tembora te Atua i matan te mataniwi ni ibonga, kanoan Rewi, ao atuun utuun nako Iteraera.

³⁰Ao ibonga ma kanoan Rewi a anai n tararuai taian b'aintangira ake a tia n tauaki rawawataia, n te aro b'a a aonga ni konaa ni uoti nakon ana Tembora Atuara i Ierutarem.

³¹Ni kauabwiin bongin te moan nam'akaina,[57] ao ti a kiitana te Karaanga are Aawa [58] ao ti a waaki nako Ierutarem. E tararuaira Atuara, ao ngke ti tabe ni m'ananga, ao e kararoaia ara kairiribai mani buakanakira n te aro ni karaba.

³²Ao ngke ti a tia n roko i Ierutarem, ao ti motirawa i nanon tenua te bong.

³³Ao i mwiina, n te ka aua ni bong ao ti a nakon ana Tembora te Atua, ike a tauaki iai rawaawatan tirewa, koora ao b'aai riki ake tabeua, ao e anganaki te ibonga are Meremota, are natin Uria te m'aane. Boni iai raona aika Ereata ae natin Bineati te m'aane, uoman kanoan Rewi, Iotabata are natin Ietua te m'aane, ao Noaria are natin Binnui te m'aane.

³⁴A bane ni warekaki b'aai ni kabane, ma n tauaki rawawataia ma m'aitiia.

³⁵Ao koraki ake a oki man te kataenikaiaki a angakarea i aon te baonikarea nakon Atuaia Iteraera. A kareanaki tengaun ma uoman kaao i aon te baonikarea i bukiia Iteraera ni kabane, n ikotaki ma ruangaun ma onoman tiibu m'aane ao itingaun ma itiman [59] tiibu ataei. Ao a kareanaki tengaun ma uoman kooti i bukin aia bure aomata.

³⁶Ao tabeman mai buakoia koraki ake a oki, a uoti ana taeka te uea nakoia koowana ao mataniwi ni m'akoron te tautaeka are i Maeao. Ao i mwiina, mataniwi a karaoi baike a konai i bukiia aomata ao i bukin ana Tembora te Atua.