Read Te B'aib'ara Etira 9 Bible Online

Etira 9 - Te B'aib'ara bible

Etira 9

¹Rimwi riki, ao a roko aia taani kairiiri taian Iutaia irou [60] ao a taku: A m'aiti Iteraera n reitaki ma taiani ibonga, ao kanoan Rewi aika a maeka n ai aroia aomata ake i rarikiia. A bon tia ni karaoi aia bure kaain Kanaan, kaain Eta, kaain Beriti, kaain Iebuti, kaain Ammon, kaain Moaaba, kaain Aikubita, ao kaain Amora aika a rangi ni kakamaaku.

²A tia tabeman m'anen Iteraera ni mare ma aine aika Ianena, ao a kariaia natiia m'aane b'a a na karaoa naba ae ai aron are a karaoia. Ara mataniwi ma ara taani kairiiri bon taani moan karaoa te bure ae moan te kam'araa aei, ao ngkai ana Aomata te Atua aika a tabu a irengan ma aomata aika Ianena.

³E bon rangi ni kauna nanou te rongorongo aei, ma ngaia are, I raeuai kunnikaiu ao I burimangaoa iran atuu ma buaiu. Ao i mwiina, I a tekateka ma te uruaki n nano,

⁴ni karokoa e a roko tain te angakarea are n te tairiki. A m'aiti ara aomata ake a tabeaianga ao a ikotaki ni katobibiai, i bukina ngke e a tia Atuan Iteraera n tuangiira b'a ti na kararoaira mairouia Ianena.

⁵Inanon tain te angakarea n te tairiki anne, ao I bon tekateka naba n nanokawaki ma kunnikaiu ake a raeuaaki. Ma ngaia are, I a katorobubua ao I tabeki baiu,

⁶ao I tataro ni kaangai: I a bon rangi ni mamaa ni kaaitarako te UEA ae te Atua. A tia n taoniira ara bure ma ara kaairua n ai aron te ieka ae e rooti taiani karawa.

⁷Ti a bane n tia ni bure ni moa man aia tai ara bakatibu, ao ti bane n tia ni bure. Ao bon anne bukina ngkai ti aki toki ni kookonaaki ngaira, ara uea ao ara ibonga irouia uea ake tekorakina. A tia n tiringiia tabeman mai buakora ao a tia n toroniia tekorakina; a tia n anai ara b'ai ao ma ni kamamaaira, n ai aron ae e riki nakoira n te bong aei.

⁸Ma ngkai te UEA ae te Atua, ko a tia ni kaota am Nanoanga ae moan te korakora nakoira. Ko anganiira te kukurei ni koaua ngkai ko karaoia tabeman mai buakora b'a a na maeka n te tabo ae e tabu aei, ao ko a tia ni buokiira naba i nanon ara tai n tautoronaki.

⁹Bon tooro ngaira, ma ko bon aki te roko n tannako mairoura. I bukin am tangira nakoira, ao a buokiira taiani uea mai Botia. Kaanga ai aron ae Ko a tia n anganiira te maiu ae e boou. Ko kariaia b'a ti na manga katea am Tembora, ao mani maeka ma te rau i Iuta ao i Ierutarem.

¹⁰Atuara, tera ae ti na konaa n taekinna ngkai? E ngae ngke ko a tia ni karaoi baikai, ma ti a tia naba n aki ongotaeka nakon am babaaire nako

¹¹ake ti anganaki mairouia am toro ake burabeti. A taku b'a e onrake te aba are ko anganiira irouia aomata aika a buakaka ma ni buubure, aika a teimatoa ni kaakaraoi b'aai aika a bati n ribaaki.[61]

¹²Ao ti a tia ni kauringaki b'a ti na aki kariaia natira aine, ao natira m'aane b'a a na mare ma natiia m'aane ao natiia aine. A tuangiira naba am burabeti b'a ti na aki buokiia Ianena akekei, ke ni kamaekaia ma te rau. Ko tangirira b'a ti na rikirake ni korakora ao ni kukurei ni b'aai aika a tamaroa n te aba aei, ao n te tai teuana a na tiku nakoia natira n aki toki.

¹³Ko katuaaira i bukin ara bure aika moan te buakaka. Ma ko bon aki katuaaira n aron m'aitin are ti bon riai n katuaaeaki iai, ao ko a tia ni kaokiia tabeman mai buakora nakoni mwengara.

¹⁴E aera ngkai ti na aki ongotaeka riki nakon am babaaire, b'a ti a manga kariaia natira m'aane ao natira aine, b'a a na mare ma Ianena aikai aika a kaakaraoi baika a bati n ribaaki? E na bon rangi ni kamaraka nanom n te aro are ko na tiringiira ni kabane iai.

¹⁵Te UEA ae Atuan Iteraera, ko bon moan raoiroi ngkai ko karaoia tabeman mai buakora b'a a na konaa n tiku ni maiu. Ma I kan taekinna riki b'a ara bure a rangi ni kamamaaira ni kawariko.