Read Te B'aib'ara Neemia 13 Bible Online

Neemia 13 - Te B'aib'ara bible

Neemia 13

¹Ao n te bong arei ngke e a warekaki ana Tua Moote n te b'anaa ae korakora nakoia aomata ni kabane, ao e a kuneaki ae a aki kariaiakaki kaain Ammon ma kaain Moaba b'a a na riki b'a a na aomata te Atua.

²E riki aei i bukina ngke a rawa n anga te am'arake ma te ran nakoia Iteraera ao a tia ni kabooa B'araam [50] b'a e na kamaraiaia. Ma e ngae n anne, ao e a tia Atuara n onika te kamaraia nakon te kakab'aia.

³Ao i mwiin warekan ana Tua Moote, ao a moana kanakoaia aomata nako ake a riki mairouia ianena Iteraera.

⁴Bon ana koraki Eriatiba teuare Tobia ao e a tia mai m'aaina n anganaki tib'angana tararuaan taian ruunib'ai n te tembora.

⁵Ma ngaia are, e a manga kamaekaa Tobia n teuana mai buakon ru aikai, ike a tia ni kaawakinaki iai aekaki ni b'ai nako-te angab'ai are te uita, b'ai ni kaboiarara, b'ai n am'araken te Tembora, ao ai uana naba ma kabwianib'ai man te uita, wain, ao b'aan te oriwa ake a tia n anganaki irouia kanoan Rewi ake taan anene, ao taan teiakina te tembora, ao taian b'aintangira i bukiia ibonga.

⁶E riki aei ni katenibwi ma uouan ana ririki Atatokititi [51] n tautaekana B'aburon. I aki mena i Ierutarem n te tai anne, i bukina b'a I nako ni kawaria. Rimwi riki, ao I a karekea te kariaiakaki mairoun te uea

⁷b'a n na okira Ierutarem. Ao I a tib'a ataia b'a ngaia e a tia Eriatiba ni karaoa te m'akuri ae moan te buakaka aei ngke e kamaekaa Tobia i nanon ruun te Tembora.

⁸E bon rangi ni kamaraka nanou n te aro are I a karenakoi b'ain nanon ana auti ni kabane Tobia.

⁹Ao i mwiina, I tua b'a e na kaitiakaki te ru ma b'ain am'arake ake b'ain te tembora, ma taian angab'ai ake taian uita, ao b'ai ni kaboiarara b'a a na manga kaokaki nako nanon te ru.

¹⁰I bon kunea naba b'a a tia n okiri aia m'akuri nako n aia nnenaroka tabeman taan anene ma kanoan Rewi ake tekorakina, i bukina ngke a tuai man anganganaki tib'angaia man uaan te tai.

¹¹I weteia taani kairiiri ni bootia ao I titirakiniia ni m'angaingai ni kaangai, “E aera ngkai e a kiitanaki te Tembora? Ao i mwiina, I a tuangiia b'a a na moana karaoan aia m'akuri.

¹²Ao i mwiin aei, ao a bane kaain Iuta ni uoti taian kabwianib'ai man aia uita, wain, ao aia b'aa n oriwa nakon ana ruunib'ai te tembora.

¹³N tokina, I a rineia teniman m'aane aika akea aia kaangaanga b'a a na tararuai b'aai ake a uotaki nako ikekei ao ni manga tib'ai nako nakoia tabem'aang. Koraki aikai bon Teremia are te ibonga, Tatoka are te tia reirei n te Tua, ao Betaia are kanoan Rewi. Aia taani buobuoki bon Anan, are natin Takuura te m'aane ao tibun Matania te m'aane.

¹⁴I tataro b'a e na ururing baika a raraoi aika I a tia ni karaoi aikai nakon ana Tembora Atuau ao aomata naba ake a tia n taromauri iai.

¹⁵I ataa naba te b'ai ae a karaoia kaain Iuta n te Taabati. A aki ti kamanti kureebe i bukin karekean te wain, ma a bon taia naba uaan te uita, te kureebe, te biiku, ao uaan aroka ake tabeua, ao i mwiina, a katokai i aon taian aati ma ni kabooi nako i Ierutarem. Ma ngaia are, I kauringiia b'a a na aki kabooi nako am'arake n te Taabati.

¹⁶Ao a manga uoti taian ika ao b'aai riki tabeua nako ikekei ni kabooi nako n te Taabati, aomata ake a m'aing nako Ierutarem man te kaawa are i Turo.

¹⁷E rangi ni maraki nanou ao I taku nakoia taani kairiiri i Iuta, “Bon te m'akuri ae moan te kam'araaea te Taabati[52] te b'ai ae kam a tia ni karaoia!”

¹⁸E bon aki katuaaira ngkoa te Atua i bukina ngke a karaoa naba ae ai aron aei ara bakatibu? Ao ngkai ti a manga rangi ni kauna naba te Atua ni kabuakaka ana Taabati!”

¹⁹Ao I tua b'a a na kainaki mataroan Ierutarem n te bong are i m'aain te Taabati [53] ao a na aki kaukaki ni karokoa mwiin banen bongin te Taabati. Ao i mwiina, I kaaki tabeman au rorobuaka b'a a na tararuai taian mataroa b'a a na kakoaua raoi b'a a na akea ae e uoti b'aai ni karin i Ierutarem n te Taabati.

²⁰Ao a wene taani iokinib'ai i tinanikun te kaawa ma aia b'ai teuana te tai ke uoua te tai.

²¹Ma I kauringiia ni kaangai, “Ngkana kam a manga karaoa riki aei, ao N na katikingkami ni karabuutiningkami.” Ao man te tai anne, ao a aki manga oki n roko n te Taabati.

²²I tuangiia kanoan Rewi b'a a na katabuia ao a na teiakin taiani mataroa n te Taabati, b'a e aonga n teimatoa tabuna. E bon akoi ni koaua te Atua, ao I tataro b'a e na karaoa ae e raoiroi nako iu ma ni kakab'aiaai ngkai I a tia ni karaoa aei.

²³Ao I kunea b'a iai tabeman Iutaia ake a tia ni mare ma ainen Atitota, Ammon, ao Moaba.

²⁴E kaaniia iteraia natiia aika a aki konaa n taetae n Ebera—a ti konaa n taetae n Atitota ke taian taetae ni i-anena ake tabeua.

²⁵Ma ngaia are i bukin marakin nanou, ao I a kamaraiaia m'aane aikai. I tua b'a a na oreaki ao ni bon kouti naba iran atuuia tabeua. Ao i mwiina, I karaoia b'a a na berita; N aran te Atua ao I berita b'a n na aki mareia natiu m'aane ao natiu aine ma I-anena.

²⁶E rangi n tangira te uea are Toromon te Atua ao e karikia b'a te uea ae moan te kakannato n te aonnaba, ma a kab'aka Toromon nakon te bure buuna ake taiani i-anena.

²⁷Ma ngaia ae, ti na ongotaeka iroum ao ti na aki manga kakaitaraa Atuara ni mare ma aine aika i-anena.

²⁸Ao iai natin Ioiata are natin te ibonga are Eriatiba, ae e mare ma natin Taneb'arata te aine; Taneb'arata are kaain Oron, [54] ao I kairoroia natina m'aane b'a a na nako.

²⁹I tataro b'a e na katuaaia te Atua i bukin uruakan aia berita n nakoaia n ibonga ao i bukin naba katarabuakaan te baronga are Rewi.

³⁰Ao i mwiina, I a karaua ni kakoauaa raoi b'a a bane aomata n aki b'aina te katei ni i-anena, ao I anganiia ibonga ma kanoan Rewi tabeia.

³¹I bon baaireia naba aomata b'a a na uoti taian aia i bukin te baonikarea ni katoa bong ao I baaireia naba b'a a na uoti moan m'akoron uaan aia tai nakon te Tembora. I tataro b'a e na kakab'aiaai te Atua i bukin b'aai aika a raraoi aika I a tia ni karaoi.