Read Te B'aib'ara Neemia 3 Bible Online

Neemia 3 - Te B'aib'ara bible

Neemia 3

¹Aikai aomata ake a buoka manga katean oon ao Mataroan nako Ierutarem: Te ibonga ae e rietaata are Eriatiba ao ibonga ake tekorakina a manga katea te Mataroa are Tiibu ao a katinetinei mataroana. Ao i mwiina, a katabua te Mataroa are Tiibu ao m'akoron te oo ni karokoa te Taua are Tebubua ao te Taua are Ananera.

²A manga katea m'akoron te oo are teuana kaain Ieriko, ao Takuura are natin Imri te m'aane boni ngaia are e a manga katea te m'akoro are i mwiin anne.

³Ao te utu are Atena, e katea te Mataroa are te Ika. A kaaki taian tatanga ni nneia ao a katinetinei taiani mataroa, ao i mwiina, a manga kanim taian b'auti ao tatanga aika taiani kai b'a rokaia.

⁴Ao Meremota are natin Uria te m'aane ao tibun Akoti te unim'aane, e katia m'akoron te oo are i mwiina. Ao Meturam, are natin Berekia te m'aane ao tibun Metetabera te unim'aane, e a manga katea te m'akoro are i mwiina, ao Tatoka are natin Baana te m'aane, e a manga katea te m'akoro are i rarikin anne.

⁵E na manga onob'aiaki te m'akoro are i mwiina irouia m'aane mai Tekoa, ma a rawa aia taani kairiiri man aia kaawa ni karaoa te m'akuri ae e rawaawata are a anganaki b'a tib'angaia.[7]

⁶Ao a manga karaoa te Mataroa are b'aini Ngkoa Ioiata are natin Batea te m'aane ao Meturam are natin Betoteia te m'aane. A kaaki taian tatanga ni nneia, ao a katinetinei taiani mataroa, ao a kanim taian b'auti aika a matoatoa ao taian tatanga aika kaai b'a kaanga rokaia.

⁷Ao a karaoa te oo are i mwiina, Meratia mai Kibeon, Iaton mai Meronota, ao m'aane mai Kibon ao Mitib'a. E toki te m'akoro aei n ana auti te kowana n te Burawinti are Iuberetiti.

⁸Ao Utiera are natin Areaia are te tia orokoora, e a manga karaoa te m'akoro are i mwiina. Ao Anania are te tia karao boiarara, e a manga karaoa te m'akoro are i mwiin anne, ao e waaki nako ni karokoa te oo are Raababa.

⁹E tautaekana iteran aonon Ierutarem Rebaia are natin Ura te m'aane, ao e a manga karaoa m'akoron te oo are i mwiina.

¹⁰Ao e a manga karaoaki te m'akoro are i mwiina iroun Ietaia are natin Arumaba, are e tena mwengana ma ngaia. Ao e karaoa m'akoron te oo are i mwiina Atuti are natin Atiabeneia te m'aane.

¹¹Ao e manga karaoa te m'akoro are i mwiin anne Marekia are natin Arim ao e karaoa te m'akoro are i mwiin anne Atuba are natin Baata Moaba te m'aane, ao a karaoa naba te Taua are Umum.

¹²Ao e tautaekana iteran aonon te aba are Ierutarem Tarum are natin Aroeti te m'aane, ao boni ngaiia ake a manga katea m'akoron te oo are i mwiina. E bon m'akuri naba ma ngaia natin Tiarum te aine.

¹³A karaoa te Mataroa are M'arua Anun ao aomata ake a maeka n te kaawa are Tanoa. A katinetinei taiani mataroa ao a kanim taiani b'auti aika a matoatoa ao taian tatanga aika taiani kai b'a rokana. A boni karaoa naba te oo ae tebwi ma nimaua te buuti ab'akiia, ni karokoa te Mataroa are Kaabiti.

¹⁴E tautaekana aonon te aba are Beta-akirem teuare Marekia are natin Rekaba, ao boni ngaia are e a manga karaoa te Mataroa are Kaabiti. E katinetinei taiani mataroa ao e kanim taian b'auti aika a matoatoa ao taiani tatanga aika taiani kai b'a rokaia.

¹⁵E tautaekana m'akoron te aba are Mitib'a Tiarun [8] are natin Koraote te m'aane, ao boni ngaia are e a manga karaoa te Mataroa are Koburake n Ran. E rabuna aon te kawai n rin, ao e katinetinei taiani mataroa ao e kanim taian b'auti aika a matoatoa ao taian tatanga aika taiani kai b'a rokana. E bon manga karaoi naba taian oo n te Nei are Tiroa. E mena te m'akoro aei i mwiin ana nnenaroka te uea ao e waaki nako ni karokoa te kawai n ruorikaaki nakon ana Kaawa Tawita.

¹⁶E tautaekana aonon te aba are Beta-Tura Neemia are natin Atibuka te m'aane, ao e a manga karaoa naba m'akoron te oo are i mwiina. E waaki nako te oo anne ni karokoa nnen ruanimateia uea, [9] te nei are e karaoaki, ao taian auti ni maeka i bukiia tautia.

¹⁷Ao kanoan Rewi ake a m'akuri ni m'akoron te oo are i mwiina, bon Reum are natin Bani te m'aane; Atiabia, are e tautaekana iteran aonon te aba are Keira ao e karaoa ana m'akuri i bukin ana tabo;

¹⁸Binnui [10] are natin Enatata te m'aane are e tautaekana iteran aonon te aba are Keira;

¹⁹Etera are natin Ietua te m'aane, are e tautaekana Mitib'a, ao boni ngaia are e a manga karaoa m'akoron te oo are i matan autin taian b'ainibuaka ao e roota te tabo are e b'aoua iai te oo;

²⁰Ao Baruka are natin Tabai te m'aane, e rangi ni ingainga ni kan manga karaoa m'akoron te oo are e nakon ana auti Eriatiba are te ibonga are e rietaata;

²¹Ao Meremota are natin Uria te m'aane ao tibun Akoti te unim'aane, e karaoa are e nako tabon ana auti Eriatiba.

²²Aikai araia ibonga ake a m'akuri n te oo: Bon Ibonga ake maeka n aono ake i rarikin Ierutarem ake a manga karaoa m'akoron te oo are i mwiina.

²³A manga karaoa te oo are i matan aia auti Beniamin ao Atuba. Ao Ataria are natin Maateia te m'aane ao tibun Anania te unim'aane, boni ngaia are e a manga karaoa te m'akoro are i matan ana auti.

²⁴Binnui are natin Enatata te m'aane bon ngaia are e manga karaoa m'akoron te oo are man ana auti Ataria nakoni koonan te oo.

²⁵E karaoaki te m'akoro are i mwiina are e moa man koonan te oo ao te taua are n te bareti are i eta i rarikin aia katawanang taan tei iroun Barara are natin Utai te m'aane. E karaoa m'akoron te oo are i mwiina Betaia are natin Baroti te m'aane.

²⁶E toki te tabo are i rarikin te Mataroa are Ran i mainiku ao n te taua i bukin teiakinan te Tembora. E tena ma te m'akoro are n te kaawa are e aranaki b'a Obera, ike a maeka iai taani m'akuri n te tembora. [11]

²⁷A manga karaoa m'akoron te oo are i mwiina m'aane mai Tekoa, ao bon anne aia kauoua ni m'akoro. [12] E waaki aia m'akuri man te tabo are e kaaitaraa te taua are e buubura are i bukin teiakinan te Tembora, ao e waaki nako ni karokoa te oo are i rarikin Obera.

²⁸A manga karaoa m'akoron te oo are i mwiina tabeman taiani ibonga, A moana aia m'akuri mai meangin te Mataroa are Aoti, ao a karaoi naba taiani m'akoro ake i matan oin aia auti n tatabemaniia nako.

²⁹E manga karaoa te oo are i matan ana auti Tatoka are natin Immera te m'aane. E karaoa te m'akoro are i mwiina, Temaia are natin Tekania te m'aane, are e tararuaa te Mataroa are Mainiku.

³⁰A manga karaoa te m'akoro are i mwiina Anania ao Anun [13] are bon aia kauoua ni m'akoro [14] Ao Meturam are natin Berekia te m'aane, e a manga karaoa te m'akoro are i mwiina, ti are i matan ana auti.

³¹Ao Marekia are te tia karaokoora, e manga karaoa te m'akoro are i mwiina, ni karokoa te auti are e kamanenaaki irouia taani m'akuri n te tembora ao taani kaboowi. E kaaitaraa te tabo aei ma te Mataroa are Bootaki, i rarikin te ru are i etan te oo are te koona are i meang mainiku.

³²A karaoa te kabanea ni m'akoro n te oo taani karaokoora ao taani kabob'ai, are e biri man ruun te koona ni karokoa te Mataroa are Tiibu.