Read Te B'aib'ara Neemia 6 Bible Online

Neemia 6 - Te B'aib'ara bible

Neemia 6

¹Ao a ataia Taneb'arata, Tobia, Ketem, ao ara kairiribai ake tekorakina ae I a tia ni kabanea manga karaoan te oo. Ti te b'ai ae I tuai ni karaoia bon katinetinean taiani mataroa ni mataroan taiani kawai n rin.

²Ao a kanakoa te rongorongo Taneb'arata ao Ketem, ni bubutiai b'a n na kaitibo ma ngaiia n te kaawa teuana. I ataia ae a na kataia ni kakaaea aia anga ni kam'aneai.

³Ma ngaia are, I kanakoa te tia ua rongorongo b'a e na tuangiia au taeka, “I aki konaa ni katoka au m'akuri ngkai b'a e rangi ni kakaawaki te m'akuri ao I aki konaa ni kitanna. I karautaeka b'a I aki konaa ni kabutimerea te m'akuri i bukin kawarakimi.”

⁴Ao a kaooai aua te tai, ma I bane n aki nako iai.

⁵Ao n tokina, e a kanakoa ana mataniwi Taneb'arata nako iu ma te reta ae e aki titamb'anaki

⁶ae e kaangai kanoana: E a buta nako aaningin te rongorongo nakoia botannaomata ae kam a manga karaoa te oo ao kam a kataia ngkai ni iangoa te kamangao, i bukina b'a ko tangiria n riki b'a aia uea. Ao e boni koaua ana taeka Ketem [18]

⁷Bon iai naba ami burabeti i Ierutarem, are e taekinna b'a ko a uea ngkai i aon Iuta. Ane e na ongo uean Botia, ma ngaia ae, ti na riai ni karekea ara tai ni kaaitibo ni iangoa te b'ai aei.

⁸Ao I kaoka te rongorongo nakon Taneb'arata ae e kaangai, “Bon akea koauan taian rongorongo aikanne! Bon te naan rongorongo aika ko otoi.”

⁹A kataia ara kairiribai ni kakamaakuira ma ni kataia ni katokiira man ara m'akuri. Ma I buubutiia te Atua b'a e na anganai te korakora.

¹⁰N te bong teuana ao I kaaitibo ma Temaia, [19] E aki riai ni kitana mwengana, ma e taku, “Ti a kawaekoaira nakon te Tabo are e Tabu n te Tembora ma ni karabaira ikekei. [20] Ti na rokani mataroan te Tembora, i bukina b'a a iangoia ami kairiribai n tiringko nakon te tairiki.”

¹¹Ao I taku, “E aera ngkai N na biri nako ma ni karabaai i nanon te Tembora i bukin rawean maiu? I aki nako!”

¹²Ao I mwiina, I ataia ae e aki angan Temaia te rongorongo aei te Atua. Ma a tia Tobia ma Taneb'arata ni kabooa b'a e na kam'aneai

¹³ma ni kakamaakai b'a n na karaoa te m'akuri ae e bure, b'a a tangiria ni kabuakaka raoiroin arau.

¹⁴Ao i mwiina I buubutiia te Atua b'a e na katuaaea Tobia ma Taneb'arata i bukin te b'ai are a tia ni karaoia. I tataro b'a e na katuaaea te burabeti are Nei Noaria te Atua ao burabeti ake tekorakina ni ikotaki, ma koraki ake a tia ni kataia ni kakamaakai.

¹⁵Ao ni kauabwi ma nimauan bongin te nam'akaina ae Erura, [21] ao e a bane iai manga karaoan te oo. E kabanea nimabwi ma uoua te bong.

¹⁶Ao ngke a ataia ara kairiribai ake i rarikira ae e a tia karaoan te oo, ao a rangi ni b'ara nanoia, i bukina b'a a ataia ae e a tia Atuara ni buokiira ni manga karaoa te oo.

¹⁷I nanon te tai aei, ao a aki toki ni kokoro reta taani kairiiri mairouia I-Iutaia ma Tobia.

¹⁸A kakaonimaki aomata aika a m'aiti i Iuta nakon Tobia i bukin b'aai aika uoua aika: I bukina ngke taman buuna bon Tekania are natin Ara te m'aane, ao i bukina naba ngke e iein Ieoanan are natin Tobia te m'aane ma natin Meturam te aine. Meturam are natin Berekia te m'aane. [22]

¹⁹Aomata ake a aki toki ni kakaongoai b'aai aika a raraoi aika e a tia ni karaoi Tobia a manga tuanga Tobia b'aai ake I a tia n taekin. Ma ngaia are, e teimatoa Tobia ni kaakanakoa ana reta ni kakamaakai.