Read Te B'aib'ara Neemia 7 Bible Online

Neemia 7 - Te B'aib'ara bible

Neemia 7

¹Ao i mwiin banen manga karaoan te oo ao taiani mataroa ake a tinetine, ao a anganaki tib'angaia taan tei n te tembora, taan anene, ao kanoan Rewi ake te korakina.

²I katuka tariu are Anani b'a e na tararua Ierutarem, n reitaki ma Anania, are te kam'aanta n te nono b'a e onimakinaki, ao e karinea te Atua nakon are a karaoia aomata nako.

³Ao I taku nakoia, “Kam na aki kauki taiani mataroa nakon te kaawa ni karokoa tabeua te tai i mwiin otin taai. Ao kam na kakoaua raoi b'a a bon in ma ni matoa raoi i m'aain motirawaia taan tei ni bungin taai. Kam na rineia aomata mai Ierutarem b'a a na tei n taabo aika a kakaokoro i rarikin nako te oo ao tabem'aang b'a a na tei i rarikin oin aia auti nako.”

⁴E ngae ngke e rangi ni korakora aban Ierutarem, ma a karako aomata ake a maeka ikekei, ao akea naba taian auti aika a boou aika a tia ni kateaki.

⁵Ma ngaia are, e a anganai te Atua te iango b'a n na bootia aomata, ma taani kairiiri, mataniwi ao n tuoi rongorongon taian utu aika a eti raoi i bukiia aomata ake a tia n okirikaaki man te kataenikaiaki mai B'aburon, i mwiin uotakinakoaia iroun te uea are Nebukaneta.[23]

⁶N bon te tai naba anne, ao I kunea rongorongoia aomata ake a moan oki nako Ierutarem man te Burawinti are B'aburon [24] Ngke I wareki araia aomata aikai, ao I a ataia b'a ngaia a bon maeka ni bon oin aia kaawa nako,

⁷ao a airi ma Terub'abera uaake, Iotua, Neemia, Ataria, Raamia, Naamani, Moretekai, Biretian, Mitibereta, Bikewai, Neum, ao Baana.

⁸Ao aikai m'aitiia koraki ake a okirikaaki man m'akoron nako aia utu:

⁹uoua te ngaa tebubua itingaun ma uoman man Baroti;

¹⁰tenibubua itingaun ma uoman man Tebatia;

¹¹onobubua nimangaun ma uoman man Ara;

¹²uoua tengaa wanibubua tengaun ma waniman man Baata Moaba, ake bon ana kariki Iotua ao Ioaba;

¹³teuana tengaa uabubua nimangaun ma aman man Eram;

¹⁴wanibubua angaun ma niiman man Tatu;

¹⁵itibubua onongaun man Takai;

¹⁶onobubua angaun ma waniman man Binnui;

¹⁷onobubua uangaun ma waniman man Bebai;

¹⁸uoua tengaa tenibubua uangaun ma uoman man Atikata;

¹⁹onobubua onongaun ma itiman man Atonikam;

²⁰uoua tengaa onongaun ma itiman man Bikewai;

²¹onobubua nimangaun ma niiman man Arin;

²²ruangaun ma waniman man Atera, ae e ataaki naba n arana ae Etekia;

²³tenibubua uangaun ma waniman man Atum;

²⁴tebubua uangaun ma aman man Betai;

²⁵tebubua tengaun ma uoman man Ariba; ao ruangaun ma niiman man Kibeon.

²⁶Aikai araia te koraki ake a oki ake a nako aia bakatibu man kaawa aikai:

²⁷tebubua waningaun ma waniman mai Betereem ao Netob'a;

²⁸tebubua uangaun ma waniman mai Anatota;

²⁹angaun ma uoman mai Beta Atimaweta;

³⁰itibubua angaun ma teniman mai Kireata-Iearim, Kebira, ao Beerota;

³¹onobubua uangaun ma temanna man Ram'a ao Keeb'a;

³²tebubua uangaun ma uoman mai Mikemati;

³³tebubua uangaun ma teniman mai Betaera ao Ai;

³⁴nimangaun ma uoman mai Nebo; [25]

³⁵teuana tengaa uabubua nimangaun ma aman mai Eram; [26]

³⁶tenibubua uangaun mai Arim; tenibubua angaun ma niiman mai Ieriko;

³⁷itibubua uangaun ma temanna mai Rote, Arita, ao Ono;

³⁸ao tenua tengaa ruabubua teningaun mai Tenaa.

³⁹Aikai m'aitiia ake a oki man utuia nako ibonga:

⁴⁰ruabubua itingaun ma teniman ake kanoan Ietua mai Ietaia;

⁴¹teuana tengaa nimangaun ma uoman man Immera;

⁴²teuana tengaa uabubua angaun ma itiman man Batura; ao teuana tengaa tengaun ma itiman man Arim.

⁴³Aikai m'aitiia koraki ake a oki man kanoan Rewi: itingaun ma aman ake kanoan Otewa man ana utu Ietua ao Katemiera;

⁴⁴tebubua angaun ma waniman man kanoan Ataba ake taani katangitang n te Tembora;

⁴⁵ao tebubua teningaun ma waniman man kanoan Tiarum, Atera, Taremon, Akuba, Atita, ao Tiobai mairouia taan tei n te Tembora.

⁴⁶Aikai araia utuia taani m'akuri n te tembora ake a oki kanoaia nako Ierutarem:

⁴⁷Tiia, Atuba, Tabaota,

⁴⁸Keroti, Tia, Baton,

⁴⁹Rebana, Akaba, Taremai,

⁵⁰Enan, Kitera, Kaa,

⁵¹Katam, Reaia, Retin,

⁵²Nekota, Uta, Batea,

⁵³Betai, Meunim, Nebutetim,

⁵⁴Bakebuka, Akuba, Areura, Batiria,

⁵⁵Meita, Aretia, Barekoti,

⁵⁶Titera, Tem'a, Netia, ao Atiba.

⁵⁷Aikai araia ana toro Toromon ake a oki kanoaia aika:

⁵⁸Totai, Tobereta, Berita, Iaara, Tarekon,

⁵⁹Kitera, Tebatia, Atira, Bokireta, Atebaim, ao Amon.

⁶⁰Bootan m'aitiia kanoaia taani m'akuri n te tembora ao ana toro Toromon ake a oki bon tenibubua ruangaun ma uoman.

⁶¹Bootan m'aitiia ake a oki man aia utu Teraia, Tobia, ao Nekota bon onobubua angaun ma uoman, e ngae ngke a aki konaa ni kateirikiia b'a Iteraera ngaiia.

⁶²A tia ni maeka ni kaawan B'aburon are Tera-Mera, Tera-Aretia, Kerub'a, Aton, ao Immera.

⁶³A aki konaa naba ni kateirikiia ana utu Obaia, Akoti, ao Baretirai b'a ibonga ngaiia. A tia ni mare ana bakatibu ana utu Baretirai ma natin Baretirai te aine, are kaain Kireata ao e katokaa araia ana utu buuna.

⁶⁴Ma e aki konaa n reke rongorongon utu aika tenua aikai, ao akea mai buakoia ae e kariaiakaki n riki b'a te ibonga.

⁶⁵Ni koauana, ao e taku te kowana nakoia, “Kam aki konaa ni kang taian am'arake ake a anga aomata nakon te Atua ni karokoa kam konaa n tuangiira b'a bon tenaan ibonga raoi ngkami.”[27]

⁶⁶Bootan m'aitiia ake a oki bon 42,360

⁶⁷n ikotaki ma 7,337 taian toro,

⁶⁸ao 245 taani katangitang. Ao uoti naba ma ngaiia 736 taian aoti, 245 taian miure,

⁶⁹435 kamero, ao 6,720 aati.

⁷⁰A m'aiti aomata ake a anga aia b'aintangira ni buoka kabooan taiani b'ai i bukin te Tembora.

⁷¹E anga 8 kirokuraem te koora, 50 te boora i bukiia taian ibonga aika a na kabonganaaki i bukin te Tembora, ao 530 te niiniira i bukiia ibonga.

⁷²A anga 153 kirokuraem te koora taani kairiiri man taiani utu ao 1,458 kirokuraem te tirewa. Ao nikiraia aomata a anga 153 kirokuraem te koora, 1,325 kirokuraem te tirewa ao 67 te kunnikai i bukiia ibonga.

⁷³Ai ngaia are, n te kaitiua n nam'akaina,[28] ao a maeka taiani ibonga, kanoan Rewi, taan tei n te tembora, taani katangitang, taani m'akuri ao ai bon aomata nako ni kaawan nako Iuta.