Read Te B'aib'ara Etita 2 Bible Online

Etita 2 - Te B'aib'ara bible

Etita 2

¹Ao i mwiin tabeua te tai ngke e a toki unin te uea, ao e bon tabe naba ni iangoa te b'ai are e a tia ni karaoia Nei Watiti, ma ana katanoata i bukin kabuakakaan Nei Watiti.

²Ao a taku tabeman ana taan iango ake a mena i rarikina, E aera ngkai ko a aki kakaeia tabeman ataeinaine aika botonaine?

³Ko kona n rineia taian aobitia i nanon abam b'a a na kairiia ataeinaine aika a botonaine nakoni nneia buum ikai, n te kaawa ae Tutian, ae atuun kaawan am tautaeka. Angan Ekai are te iunaki are e kakawakiniia aine, b'a e na kawakinia, ao tuua b'a a na tararuaaki raoi.

⁴Ao i mwiina, ko anaa te ataeinaine ae ko tangiria riki mai buakoia, ao karikia b'a te unaine n onea mwiin Nei Watiti.

⁵Ao iai te I-Iutaia ae arana Moretekai ae natin Iaira, ae kaain te baronga are Beniamin, ae e riki mairoun Kiti ao Timei.

⁶Ngke e anaa uean Iuta uean B'aburon are Nebukaneta, are Ieoiakin mai Ierutarem nakon te kataenikaiaki, ao bon raoia naba taenikai teuare Moretekai.

⁷Ao bon iai naba ai natin Moretekai ae Nei Etita ae arana n Ebera bon Nei Atata; bon te ataeinaine ngaia ae e tikiraoi, ma rab'atana ae akea waewaeana. Ngke a mate ana koraki neierei, ao e anaia Moretekai n tabekia ma ni kaikawaia b'a natina te aine.

⁸Ngke e katanoata te b'ai arei te uea, ao a bane ni uotaki ataeinaine aika a m'aiti nako Tutian, ao bon Etita bon naba temanna i buakoia. E boni katukaki naba n tararuaaki iroun Ekai, are te tia tararua aia auti buun te uea.

⁹Ao e tatangiraki riki Nei Atita iroun Ekai. Ma ngaia are, e aki manga anga ana tai ma e a waakina naba kakatamaroan te aine arei, ma n anganganna te am'arake ae e okoro. E anganna ana tabo ae e rangi n tamaroa n te tabo arei, are nneia buun te uea, ao e rinei itiman ainen te bareti b'a buokana.

¹⁰Ao n te tai aei, ao e tuangaki Nei Etita iroun Moretekai b'a e na aki kakaotia ae te I-Iutaia ngaia.

¹¹Ao e katoa bong n nanakonako Moretekai i matan m'aneaban nneia buun te uea, b'a e aonga n ataa aron Nei Etita b'a tera ae e riki nakoina.

¹²E nakon teuana te ririki aroni katamaroaan te aine, onoua nam'akainan kabirakina n te b'a are te muura, ao te b'a are te baretam. Ao i mwiin anne, ao a manga uotaki aine nakon te uea are Keatiti, temanna i mwiin temanna.

¹³Ngkana e nako te aine temanna man aia auti buun te uea nakon te bareti, ao e kona ni katokai i aona b'aai ake e tangiri.

¹⁴E na nakon ana bareti te uea n te tairiki, ao n te ingabong are imwina, e na manga kairaki nakon nneia buun te uea are teuana, ao e na manga mena i aan ana tararua Tiaatikati, are ana iunaki te uea are e tararuaia buun te uea ni kewe.[5] E na bon aki manga nakon te uea ni karokoa e tangiria te uea, ma n atonga arana b'a e na kawaekoaki.

¹⁵Ao akea b'a e a roko ana tai ni kawara te uea Nei Etita, natin Abiaira te aine, Abiaira are tarin taman Moretekai. Moretekai are e tabekia b'a natina te aine. E rangi ni mataiakinaki neiere Nei Etita irouia aomata. Ao ngke e a roko ana tai ni kawara te uea, ao e ti katokaa i aona te b'ai are e a tuangnga Ekai b'a e na katokaa i aona. Ekai bon te iunaki are e tararua te auti are a mena iai buun te uea.

¹⁶Ma ngaia are, i nanon ana kaitiua n ririki n uea te uea are Keatiti, n te katebwina n nam'akaina are Tebeta, [6] ao e a uotaki Nei Etita nakon ana bareti te uea are Keatiti.

¹⁷Ao e tangiria riki te uea nakoia aine ake tabeman, ao e b'aka iroun Nei Etita, ao e anaaki nanona i rouna nakoia aine ake tabeman. Ma ngaia are, e a katokaa te baunuea i aon atuna, ma ni karikia b'a te ueanaine n onea mwiin Nei Watiti.

¹⁸Ao te uea e karaoa te baka n am'arake ae e ab'ab'aki i bukin karinean Nei Etita, ao e kaoiia ni kabane ana aobitia ma ana taani kairiiri. Ao e anga te motirawa ae e ab'ab'aki nakon ana tautaeka ni kabane, ao e kakerikaaka te angab'ai n rab'ata i nanon ana tautaeka ni kabutaa.

¹⁹Ao i mwiin tabeua te tai, ao e a rineaki Moretekai iroun te uea b'a mataniwiin te bareti temanna.

²⁰Ao neiere Nei Etita, e bon tuai man kakaotia ae te I-Iutaia ngaia. E a tia n tuangnga Moretekai b'a e na aki kakaotia nakon temanna ma temanna, ao e ongotaeka Nei Etita nakon anne, n ai arona n ongongotaeka iroun Moretekai ngke e kaawakinna ngkoa i nanon uarerekena.

²¹Ao n te tai are e reke iai ana m'akuri Moretekai n te bareti, ao a riki iai Biketan ma Tereti ake taian iunaki, ake a tararua mataroan ana ru te uea b'a ana kairiribai te uea are Keatiti, ao a tabe ni iaiangoa tiringana.

²²Ao e karekea te rongorongo arei Moretekai, ao e tuanga te ueanaine are Nei Etita, ao e a manga tuanga te uea neierei te rongorongo are e reke mairoun Moretekai.

²³Ao e karaoaki te kakaae, ao e kuneaki b'a ngaia e boni koaua te rongorongo arei. Ma ngaia are, a kaai ni kabaeaki roroaia m'aane aikekei n te kainikabaeroroa. Ao e tua te uea b'a e na koreaki taekan te b'ai ae e riki aei ni bokin te tautaeka.