Read Te B'aib'ara Etita 9 Bible Online

Etita 9 - Te B'aib'ara bible

Etita 9

¹E a roko katebwi ma tenuan bongin Ata, [16] are te bong are e katanoataaki iai ana moti te uea b'a e na karaoaki, te bong are a kaantaningaia iai aia kairiribai I-Iutaia b'a a nang reke iai I-Iutaia i aan m'aakaia. Ma ngaia tiaki, b'a a manga tokanikai I-Iutaia i aoia.

²A bootaki I-Iutaia n aia tabo nako ni katoa kaawa tatabeua nako n te abanuea b'a a na buakaniia akana a kataia ni buakaniia. A bane ni maaku aomata n tatabemaniia irouia, ao akea ae e konaa n tei n eekiia nako.

³Ao ni bon oina, a buokaki irouia mataniwiin taian burawinti, ma taiani kowana, taan babaaire, taan tei i bukin te uea, b'a a bane ni maaka Morotekai.

⁴E a rangi n ataaki ngkai ni kabutaa te abanuea b'a e a rangi ni m'aaka Morotekai n te bareti ao e rikirake m'aakana.

⁵Ma ngaia are, a konaa taian I-Iutaia ni karaoa te b'ai are a tangiria ni karaoia nakoia aia kairiribai. A buakaniia n te kabaang ao a tiringiia ni kabane.

⁶A tiringiia nimabubua aomata i Tutian are atuun kaawan te tautaeka.

⁷I buakoia aomata ake a mate bon natin Aaman m'aane ake tengaun

⁸ake tibun Ammetata, are aia kairiribai I-Iutaia.

⁹Beretiantata, Tarebon, Atibata, Borata, Ataria, Aritata, Barematita, Aritai, Arirai, ao Waitata.

¹⁰Ao bon akea te kurib'ai ae e karaoaki.

¹¹Ao e ribootinaki nakon te uea n te bong naba anne te m'aiti n aomata ake a tiringaki i Tutian.

¹²Ao e taku te uea nakon te ueanaine are Nei Etita, A tia I-Iutaia n tiringiia nimabubua te aomata n reitaki ma natin Aaman ake tengaun. Tera riki ae a tangiria ni karaoia n abanueau. Tera ae ko tangiria ngkai? Ko na anganaki ane ko tangiria. Tuangai riki te b'ai ane ko tangiria, ao e na reke iroum.

¹³Ao e kaeka Nei Etita, Ngkana ko kukurei iai te uea ae ko karineaki, ao ko na kariaia b'a nakon te ingabong a na karaoa aron ae a karaoia n te bong aei. Ko na tua b'a a na katineaki rab'ataia natin Aaman ake tengaun i aon te kainikabaeroroa.

¹⁴Ao e tua te uea b'a e na karaoaki aei, ao e kamatoaaki arei i Tutian. A anaaki rab'ataia natin Aaman ake tengaun ao a kamenaki i mataia aomata.

¹⁵Ao ni katebwi ma auan bongin Ata a manga ikotaki taian I-Iutaia i Tutian, ao a tiringiia tenibubua te aomata n te kaawa arei. Ma bon akea naba te kurib'ai ae e karaoaki.

¹⁶A baaireia aroia naba I-Iutaia ake n te burawinti, ao a tatauraoi nakon eekakinakoaia. A tiringiia itibwi ma nimaua te ngaa aia kairiribai i bukin kamauraia mairouia. A kamauriia i bon irouia mai irouia aia kairiribai. Ma ngaia are, a tiringiia itibwi ma nimaua te ngaa m'aitiia. Ma bon akea naba te kurib'ai ae e karaoaki.

¹⁷Ai tebwi ma tenua bongin te bong are Ata ngkai. Ao n te bong are i mwiina ae te katebwi ma aua, ao ai akea te manga te tiritiri irouia, ma a karaoia b'a aia bong ni baka ni kukurei.

¹⁸Ao I-Iutaia i aon Tutian a karika te bong ae te katebwi ma nimaua, b'a aia bong ni motirawa, i bukina ngke a tia n tiringiia aia kairiribai n te katebwi ma tenua, ao n te katebwi ma aua ni bongin te nam'akaina are Ata, ao a toki n te katebwi ma nimaua ni bong.

¹⁹Ao bon aei naba bukina ngkai a kakauringa katebwi ma auan bongin te nam'akaina are Ata I-Iutaia n taian kaawa aika a uarereke, ma ni karikia b'a aia bong ni motirawa ae e kakukurei, ao aia tai ni baka n am'arake ma n anga b'aintangira te am'arake i marenaia.

²⁰E korea taekan te bong aei Morotekai, ao e kanakoa te reta nakoia I-Iutaia ni kabane, aika a kaan ma aika a raroa, ni kabutaa te abanuea are Botia,

²¹ma n tuangiia b'a a na kakaraoa aia kauring n katebwi ma auan ao katebwi ma nimauan te nam'akaina ae Ata, ma ni karikia b'a te bong ni motirawa ni katoa ririki.

²²Bon aika boong are a tia iai I-Iutaia ni kamaiuia i bon irouia mairouia aia kairiribai; bon aei te nam'akaina are e a tia n bitaki man te tai n nanokawaki, ma ni korakai nakon te tai n kukurei ma ni kim'areirei. A tuangaki b'a a na kakauringi boong aikai ni karaoa iai aia baka n am'arake, ma n anga aia b'aintangira taian am'arake i bon i marenaia n tatabemaniia nako ao nakoia aika a kainano.

²³Ma ngaia are, a iraki irouia I-Itaia ana kaetieti Morotekai ma taian bootaki ni kukurei b'a ai te katei ni katoa ririki.

²⁴E a tia Aaman are natin Ammetata te m'aane, are kanoan Akaaka are aia kairiribai I-Iutaia ni kaiwana [17] te bong are e na tiringiia iai taian Iutaia, ao e iangoia b'a e na kamaunaia iai.

²⁵Ma e nako Nei Etita ni kawara te uea, ao te uea e katanoataa ana taeka are e na karawaawataaki iai Aaman i bukin ana babaaire nakoia I-Iutaia, ao e tiringaki ma natina m'aane ni kabaeaki roroaia i aon te kainikabaeroroa.

²⁶Bon aei bukin reken te bong ni motirawa are e aranaki b'a Burim. [18] I bukin ana reta Morotekai ao i bukin b'aai naba ake a tia n riki nakoia,

²⁷ao a karaoia Iutaia b'a te tua bon nakoia, ma aia kariki, ao aomata nako ake a tangiria n riki b'a I-Iutaia, b'a a na kauringaki raoi n taiia ni katoa ririki boong aika uoua aikai, ma ni karaoaki raoi ni kaineti ma ana kaetieti Morotekai.

²⁸E baaireaki b'a a riai n uringa te bong aei utu nako irouia I-Iutaia i nanon roro aika a na roko n taian burawinti nako, ao ni kaawa nako, ao ni ururinga ma ni kaawakina bongin te Burim ni boong aika a na roko.

²⁹E a manga korea naba ana reta te ueanaine are Nei Etita are natin Abiaira te aine n reitaki ma Morotekai, ao e karina m'aakana ni kabane i nanon n te reta i bukin te Burim, are e a tia ni kaman koreaki iroun Morotekai.

³⁰E koreaki te reta arei nakoia I-Iutaia ni kabane, ao a kanakoaki taiani katoto nakon taiani burawinti ake tebubua uabwi ma itiua ni kabutaa te abanuea ae Botia. E anga te katekeraoi nakoia I-Iutaia b'a a na mamauri ma n teetekeraoi,

³¹ao e tuangiia ma aia kariki b'a a na kakauringa bongin te Burim ni karaoia raoi i aon taina, n aron are a tia ni karaoia n aia bong n aki mamatam, [19] ao n aia tai n tanginiwenei. Morotekai ao te ueanaine are Nei Etita, a boutokai baikai uoua aikai.

³²Ana kaetieti e kamatoai naba tuan te Burim, are e koreaki taekana n te niira ni boki.