Read Te B'aib'ara Te Otinako 1 Bible Online

Te Otinako 1 - Te B'aib'ara bible

Te Otinako 1

¹Ao aikai araia natin Iakob'a ake a iri nako Aikubita ma aia utu n tatabemaniia nako.

²Reuben, Timeon, Rewi, Iuta,

³Itakara, Teburun, Beniamin,

⁴Taan, Nabetari, Kata, ao Atera.

⁵Bootan te botannaomata aei ake a nako mairoun Iakob'a bon itingaun.[1] E a kaman roko natina are Ioteb'a i Aikubita.

⁶Ao i nanon waakin te tai, ao e a mate Ioteb'a ma tarina, ao nikiran te roro arei,

⁷ma a riki rake ni m'aiti aia kariki Iteraera, ao a karikiia natiia aika m'aiti ma ni korakora ni karib'aia kaain Aikubita,

⁸Ao akea b'a e a uea i aon Aikubita te aomata ae aki ataa Ioteb'a

⁹Ao e taku nako ia ana aomata, “A rangi ni m'aiti Iteraera ma ni korakora riki nako ira.

¹⁰Ao ane a na kaaina aia taanga ni buaka ara kairiribai n tain te buaka ma ni manga buakaniira ma ni biri nako mai abara. Ti riai ni kakaaea katokan rikirakeia.”

¹¹Ma ngaia are, kaain Aikubita a manga riki b'a mataniwiia tooro, ao a kairiia n te kairiiri ae matoatoa. Ao a karaoa te kaawa ae buubura are Bitom ma Rameteti Iteraera aika kaawa i bukin kaawakinan kaub'aina. [2]

¹²Kakorakoraan karawawataaia Iteraera irouia kaain Aikubita ai aron ae boni kakorakoraan aia botannaomata n taona aon te aba, ao e a rikirake maakuia kaain Aikubita irouia Iteraera.

¹³A karawawataai maiuia ni kairoroia nakon te tautoronaki ae matoatoa.

¹⁴A kam'akuria n aia waaki ni kateitei, ao n ribanai abaia, ao bon akea aia nanoanga teutana nako ia.

¹⁵Ao e taetae uean Aikubita nako ia ana tia kabung i bukiia ainen Ebera ake Tibera ao Buua,[3]

¹⁶“Ngkana kam kabungiia aine aika Ebera, ao kam na tiringa te tei ngkana te mm'aane, ma kam na kamaiua ngkana te aine.”

¹⁷Ma bon aomata aika mamaaka te Atua taani kabung akekei, ma ngaia are, a aki ira nanon te uea, ao a boni kamaiuia naba ataei aika mm'aane.

¹⁸Ma ngaia are e kananako weteaia taani kabung akekei te uea, ao e taku nako ia, “E aera ngkai kam karaoa aei? e aera ngkai kam kamaiuia ataei aika mm'aane?”

¹⁹Ao a taku aine akekei, “B'a a boni kaokoro ainen Iteraera ma ainen Aikubita; a bungiia natiia n akea aia kangaanga, ao a kaman bung i m'aain rokora i rouia.”

²⁰Ao E kakab'aiaia taani kabung akekei te Atua i bukina ngke bon aomata ngaiia aika mamaaka te Atua,

²¹ma ngaia are, E karekea aia utu, ao a rikirake ni m'aiti Iteraera ma ni korakora.

²²Ao n tokina ao e kanakoa ana katanoata te uea nakoia ana aomata ni kaangai, “Anaia naati mm'aane ni kabane aika a tib'a bungiaki, aika Ebera, ao karenakoia nako nanon te Naire, ma kam na kamaiuia aine.”