Read Te B'aib'ara Te Otinako 10 Bible Online

Te Otinako 10 - Te B'aib'ara bible

Te Otinako 10

¹Ao i mwiina, e taku te UEA nakon Moote, “Naako noora te uea. I a tia ni kataningabonoa ma ana mataniwi, b'a I aonga ni karaoi taian kakai i buakoia

²ao ko aonga naba ni konaa n tuangiia ami ataei ma tibumi arou ni kaburababaia kaain Aikubita ngke I karaoi taian kakai. Ane kam na bane n ataia b'a bon te UEA Ngai.”

³Ma ngaia are, a nako Moote ma Aaron nakon te uea ao a taku, “E kaangai ana taeka te UEA ae Atuaia Ebera, “Maan ra riki ngkoe n rawa ni konaaki i rou? Ko na kanakoia au aomata, b'a aonga n taromauriai.

⁴Ngkana ko teimatoa n rawa, ao N na manga karokoia te taanga n rookati n abam nakon te ingabong. [14]

⁵E na bon rangi ni m'aiti n te aro are e na kaona aon tano. A na kang b'aai nako ake taian nikira n ana urub'ai te karauteaiti, ni karokoa naba taian aroka ake a tiku.

⁶Ane a na kaona am bareti ma aia auti am aobitia ni kabane ao am aomata ni kabane. A na bon buakaka riki nakon b'aai nako ake a tia n noori ami bakatibu. Ao i mwiin arei, e rairaki Moote ao e nako.

⁷Ao a taku ana mataniwi te uea nako ina, “E na maan ra ana tai te mm'aane aei ni kaakarokoa te kangaanga nako ira? Ani kanakoia Iteraera, b'a aonga ni konaa n taromauria te UEA ae Atuaia. Ko tuai namakinna ae e urubekebeke Aikubita?”

⁸A a manga kaokaki Moote ma Aaron nakon te uea, ao e taku nakoia, “Kam a riai n nako n taromauria te UEA ae Atuami. Ma bon antai raoi ae e na nako?

⁹Ao e kaeka Moote ni kaangai, “Boni ngaira ni kabane, n reitaki ma natira ao ara kara. Ti na kairiia natira mm'aane ma natira aine, ara tiibu ma ara kooti, ao ara kao, b'a ti tangiria ni karaoa te toa i bukin karinean te UEA.”

¹⁰Ao e taku te uea ae B'arao, “I tuea n aran te UEA b'a kam na aki kairiia ami aine ma natimi! E teretere raoi b'a kam iaiangoa te kamangao.

¹¹I aki kariaia! Ti taiani mm'aane aika na nako n taromauria te UEA ngkana ngaia b'a kam tangira anne.” Ao a kanakoaki Moote ma Aaron mai matan te uea.

¹²Ao i mwiina, E taku te UEA nakon Moote, “Tabeka baim i aon te aba ae Aikubita ao karokoia taian rokati. A na roko ni kang b'aai ma aroka aika a maiu. B'aai ni kabane ake nikiran ana urub'ai te karau te aiti.”

¹³Ma ngaia are, e tabeka okona Moote, ao e karokoa te ang n te aba arei ni kabane te bong ma te ngaina. E a tia ni karokoia taian rokati (noora nanon te taeka aei i aan Taeka ma Nanoia) ngke e a moa n ingabong.

¹⁴A roko n te m'aiti ae e korakora ao a tiku n te aba arei ni kabutaa. Bon te nanai n rokati ae moan te korakora ae e tuai man nooraki mai m'aaina, ke ae na aki manga konaa n nooraki rimwi.

¹⁵A kaona aon tano ni karokoa e a roroo taraan te tano i rouia: a kang b'aai ni kabane ake nikiran ana urub'ai te karau te aiti, n reitaki ma uaani kaai ni kabane i aon taian aroka. Bon akea te b'ai teuana ae e mawaawa ae e tiku i aon kaai ke aroka n te aba are Aikubita.

¹⁶Ao e kawaekoaa te uea ni weteia Moote ma Aaron ao e taku, “I a tia ni bure nakon te UEA ae Atuami ao nako imi.

¹⁷Kam na kab'araa riki au bure te kabanea n tai ao tataro b'a E na uota nako te karekekai ae rawata te aba iai aei mai rou.”

¹⁸Ao e kiitana te uea are B'arao Moote ao e tataro nakon te Atua.

¹⁹Ao te UEA, e bita te angi mainiku nakon te angi maeao ae matoatoa, are e uotiia nako taian rokati ao a kiba nako nakon Naman Tueti (te Nama are Uraura). Bon akea temanna te rokati ae tiku i Aikubita. [15]

²⁰Ma te UEA, e kataningabonoa te uea, ao e aki roko n te kanakoia Iteraera.

²¹Ao E a manga taku te UEA nakon Moote, “Tabeka baim nako karawa, ao e na roko te rootongitong ae e na rabuna aban Aikubita ni kabutaa.”

²²Ao e tabeka baina Moote nako karawa, ao e rabunaki Aikubita ni kabutaa i nanon tenua te bong.

²³A aki konaa n nooriia kaain Aikubita i bon i rouia, ao bon akea ae roko n te kiitana ana auti n te tai anne. Ma bon iai te oota irouia Iteraera n te tabo are a maeka iai.

²⁴E wetea Moote te uea are B'arao ao e taku, “Kam na nako ngkai n taromauriia te UEA ae Atuami; ngkami naba ma ami aine ao ataei. Ma kam na aki kairiia ami tiibu, kooti ao ami kao. A na tiku.”

²⁵Ao e kaeka Moote ni kaangai, “Ao ko riai ni katauraoi maan i bukin te karea ni kabuokaki nakon te UEA ae Atuara.

²⁶Akea temanna ae e na uoti ara man: akea naba ae e na tiku. Ti na bon rinei maan i bukin taromaurian te UEA ae Atuara. Ao ti na bon aki atai maan ake ti na karean nako ina ni karokoa rokora ikekei.”

²⁷Ma te UEA, e karika B'arao b'a e na taningamatoa, ao e na bon aki kanakoia.

²⁸E taku B'arao nakon Moote, “Naako mai rou! N na aki manga oki n noora matam! N na tiringko ngkana I a manga nooriko!”

²⁹Ao e kaeka Moote ni kaangai, “E koaua ane ko taku. Ko na aki manga oki n noorai.”