Read Te B'aib'ara Te Otinako 11 Bible Online

Te Otinako 11 - Te B'aib'ara bible

Te Otinako 11

¹Ao e a manga taku te UEA nakon Moote, “Ai ti teuana riki te rekenikai ae N nang karokoa i aon uean Aikubita ma ana aomata. Ao i mwiin anne, e na kanakoi ngkami. Ni koauana, e na kanakoi ngkami ni kabane mai ikai.

²Ko na taetae nakoia Iteraera ao tuangiia ni kabane b'a a na buubutiia kaain rarikin aia auti aia koora ao aia tirewa aika b'aai ni katamaroa.

³Ao te UEA, E karaoia kaain Aikubita b'a a na karineia Iteraera. Ni koauana raoi, a atonga Moote mataniwi ni kabane b'a te aomata ae e kakannato.

⁴E taku Moote nakon te uea are B'arao, “E kaangai te UEA ae Atuara, ‘Nakon te nukanibong, N na ri nanon Aikubita,

⁵ao a na bane ni mate karimoa mm'aane i aon Aikubita, ni moa mairoun natin te uea te mm'aane, are te tia bonomwi n te kaintokanuea, ni karokoa te karimoa; te nati te mm'aane, ae natin te toro te aine are te tia kamanti taian koon. A na mate naba natiia kaao aika karimoa mm'aane.

⁶E na roko te tang ae e korakora i aon Aikubita ni kabutaa, ae akea n ai arona mai m'aaina ke i mwiina.

⁷Ma e na bon aki kaukau naba te kamea nakoia Iteraera ke aia man. Ao kam na ataai iai b'a bon te UEA Ngai, ae E kaokoroia kaain Aikubita ma Iteraera.’ ”

⁸Ao e kabanea ana taeka Moote ni kaangai, “A na bane n roko am mataniwi nako iu ni boobaraaki i matau, ao a na buubutiai b'a N na kairiia nako au aomata ma ni m'ananga nako. Ao i mwiin anne, I a m'ananga nako.” Ao i mwiina, e kiitana te uea Moote ma te marakinnano.

⁹E taku te UEA nakon Moote, “Ane na teimatoa te uea n rawa n ongo i roum, b'a I aonga ni konaa ni karaoi au kakai i Aikubita.”

¹⁰Ao a karaoi taian kakai Moote ma Aaron i matan te uea, ma e bon kataningamatoaa te UEA, ao e na bon aki kanakoia Iteraera b'a a na kiitana abana.