Read Te B'aib'ara Te Otinako 12 Bible Online

Te Otinako 12 - Te B'aib'ara bible

Te Otinako 12

¹E taetae te UEA nakon Moote ma Aaron i Aikubita ni kaangai,

²“E na riki te nam'akaina aei b'a ami moan nam'akaina i Buku n te ririki. [16]

³Kam na anga taian kaetieti aikai nakoia Iteraera ni kabane: a na riai mm'aane n tatabemaniia nako n rinea tao te tiibuteteei ke te kootiteteei i bukiia kaain aia auti ni kabane.

⁴Ngkana e rangi n uarereke ana utu temanna n te aro are e aki konaa ni kana te man ae e b'anin, ao e na i buobuoka te man temanna ma kaain rarikina, n tib'aia raoi nakon te m'aiti ae e konaa ni kanna temanna.

⁵Ko na rinea te tiibu ke te kooti, ko na anaa ae teuana ana ririki ni maiu ae te mm'aane ae akea toabuakan rab'atana.

⁶Ao i mwiina, n tairikin te katebwi ma aua ni bong n te nam'akaina, a na bane Iteraera n tiringiia maan.

⁷A na riai aomata nako n uota teuana te raraa ma ni kaaki i aon bouan mataroan aia auti are a na kana iai te man.

⁸E na riai n umunaki te iriko ni man, ao e na kanaki ikekei n tannaaki ma aroka aika mao ao kariki aika aki renganaki ma te iti.

⁹Kam ma aki kang am'arake aika aki m'ai ke aika a kaburoaki, ma kam na kanna ngke umunaki ni kab'aninaki, n reitaki ma atuuna, rangana, ao kanoan nanona.

¹⁰Akea teutana ae kam na kanikiranaa nakon te moaningabong; ngkana iai nikirana, ao e na riai ni kabuokaki.

¹¹Kam na kanna ni kawikoaingkami, b'a kam na katauraoingkami nakon te m'ananga ni karin kunnikaimi, ami kauniwae ao okomi i nanon baimi. Bon aei te Toa are te Riao i bukin karineau Ngai ae te UEA.

¹²N na ri nanon te aba are Aikubita nakon te tairiki, n tiringiia karimoa mm'aane; natiia aomata ma maan, ao N na katuaaia antin Aikubita. Bon te UEA Ngai.

¹³E na riki te raraa are i aon bouan mataroan ami auti b'a te kanikina i bukin auti ake kam maeka iai. Ngkana I noora te raraa, N na riaoingkami ao N na aki tiringkami ngkana I katuaaia kaain Aikubita.

¹⁴Kam na bukamarua te bong aei b'a te bong ae te toa are kauringaakimi n te b'ai are E a tia n karaoia te UEA. Kam na kaakaraoia n taai nako ni boong aika a na roko.”

¹⁵E taku te UEA, “Kam na aki kana te kariki ae karikaki i nanon itiua te bong—Kam na tii kana are aki karikaki. Ao n te moani bong kam na kanakoi taian iti man ami auti nako, b'a ngkana iai ane e kana te kariki ae karikaki i nanon boong akana itibong akanne, ao e na aki atongaki b'a au aomata.

¹⁶N te moani bong ao n te kaitiua ni bong kam na bootaki n taromauri. Bon akea te m'akuri ae na karaoaki i nanon boong akanne, ma kam riai ni katauraoa te am'arake.

¹⁷Kam na kaawakina te toa aei i bukina b'a aio te bong are I kaotinakoi ngkami iai mai Aikubita. Kam na riai ni kaakaraoa ami bootaki ni boong ni kabane aika na roko i aon te bong aei b'a te toa.

¹⁸Kam na aki kana te kariki are e karaoaki ma te iti man tairikin te katebwi ma aua ni bongin te moan nam'akaina nakon tairikin te kauabwi ma teuana ni bong.

¹⁹Akea te iti ae kariaiakaki i nanon taiani mwenga, e aoria ngkana bon te Iteraera ke tiaki. Ngkana kam reke ni kana te b'ai ae e karaoaki man te iti, ko na aki manga atongaki b'a te Iteraera ngkoe.

²⁰Kam na kararoaingkami man te iti, e aki tabe te aba b'a ko maeka ia. Bon akea temanna ae e kariaiakaki ni kana te b'ai ae e karaoaki man te iti.

²¹E weteia ni kabane taani kairiiri mai buakoia Iteraera Moote ao e taku nako ia, “Kam na rinea te tiibuteteei ke te kooti te teei ngkami n tatabemaningkami nako ao kam na tiringnga, b'a a aonga ami utu ni konaa ni kauringa te Riao.

²²Kam na anaa m'aangan te utob'a, ao kateboa i nanon te boora ae kakanoa n raraan te man, ao kabira bouan mataroan ami auti ma kain naba te mataroa ake mai eta. Bon akea temanna mai buakomi ae e na kiitana ana auti n karokoa te moa n ingabong.

²³Ngkana E m'ananga te UEA b'a E na tiringiia kaain Aikubita, e na noora te raraa i aon kain etan ami mataroa ma bouana ao E na aki karina Aneran te Mate b'a e na rin n ami auti n tiring ngkami.

²⁴Kam na riai n iri taian tua aikai ma natimi n taai nako.

²⁵Kam na karaoa te aekaki ni bootaki ae aron aei ngkana kam rin n te aba are E a tia ni berita iai te UEA b'a e na angani ngkami.

²⁶Ao ngkana a titirakini ngkami natimi ni kaangai, “Tera nanon te aekaki n taromauri ae aron aei?”

²⁷ao kam na kaeka ni kaangai, “Bon karean te Riao i bukin karinean te UEA, i bukina ngke E riaoia aia auti Iteraera i Aikubita. E tiringiia kaain Aikubita, ma E kamaiura.” A katorobubua Iteraera n taromauri.

²⁸Ao i mwiin arei, a nako ma ni karaoi b'aai ake E tuangiia te UEA n aron ana mwioko nakon Moote ma Aaron.

²⁹Ngke e a nuukanibong E a tiringiia naati karimoa mm'aane te UEA i Aikubita, ni moa mairoun natin te uea te mm'aane, ni karokoa natin te bure are i nanon te karabuuti; a bane naba n tiringaki karimoa mm'aane aika natiia maan.

³⁰Ao a bane n uti n te tairiki anne, te uea, ana mataniwi, ao kaain Aikubita ni kabane ake tabem'aang. E a taona aon Aikubita ni kabutaa n te tang ae korakora, i bukina ngke a bane ni mate naati mm'aane n taiani mwenga ni kabane.

³¹Ao te uea, e kanaanako weteaia Moote ma Aaron ni bon te tairiki naba anne ao e taku, Otinako, ngkoe ma am botannaomata ane Iteraera. Kiitana abau; naako taromauriia te UEA n aron are kam buubuti iai.

³²Kairiia ami tiibu, kooti, ao ami kao, ao an naako. Ao kam na tataro i bukin kakab'aiaau.”

³³Ao kaain Aikubita a ienikuriia aomata b'a a na kawaekoaia ni kiitana te aba; ao a taku, “Ti na bane ni mate ngkana kam aki nako.”

³⁴Ma ngaia are, a kanoai boora ni kaboburawa n te kariki ae e a tia ni kabooaki ae e tuai itinaki, ao a rabun n taiani kunnikai, ao a uoti i aon angaia.

³⁵A karaoi b'aai ni kabane ake a tuangaki Iteraera iroun Moote, ao a buubutiia kaain Aikubita te koora ma te tirewa ao taiani kunnikai ni katamaroa.

³⁶E karaoia kaain Aikubita b'a a na karineia aomata ao a anganiia b'aai ake a buubuti. Ao n te aro aei, a uoti nako iai kaub'aia kaain Aikubita.

³⁷Ao a waaki nako n nakonako i aon waeia Iteraera mai Rameteti ni kakioa Tukota. E kaaniia onobubua tengaa bootan te mm'aane, n aki warekaki aine ma ataei.

³⁸Ao iai naba te koraki n aomata ae korakora ae a iriia aika a m'aiti naba aia tiibu, kooti, ao aia kao aika a kairiia.

³⁹Ao a kam'aa te kariki ae e aki karikaki man te buraawa are e a tia ni kabooboaki are a uotia mai Aikubita, i bukina ngke a kataweaki ni kanakoaki n aki reke aia tai ni katauraoi kanaia ke ni katauraoi aia buraawa are e a tia ni kabooaki ae e aki itiinaki.

⁴⁰A tia ni maeka Iteraera i aon Aikubita n te maan ae abubua tenibwi te ririki.

⁴¹N tokin te ririki ae abubua tenibwi, a bane n nako iai barongan nako ana aomata te UEA ni kiitana Aikubita.

⁴²Bon te tairiki te tai are e tarataraia iai ana aomata te UEA ngke kaotinakoia mai Aikubita, ao e katabuaki te tairiki naba anne b'a Ana b'ai te UEA n taai nako, b'a te tairiki are a na taratara iai Iteraera ni kabaneia.

⁴³E taku te UEA nakon Moote ma Aaron, “Aikai taian kaetieti i bukin te Riao: akea te ianena ae e na kana am'araken te Riao,

⁴⁴ma a na konaa ni kanna tooro akana kam a tia ni kabooia ti ngkana a tia moa ni korotabonim'aneaki.

⁴⁵Akea te iruwa ke te tia m'akuri ae kabooaki ana m'akuri ae e na kanna.

⁴⁶E na kanaki ni kabaneaki te am'arake i nanon te auti are katauraoaki iai; e na aki uotaki nako tinaniku. Ao kam na aki otea riin te man teaina.

⁴⁷A na riai Iteraera ni kabane ni bukamarua te toa aei,

⁴⁸ma akea te mm'aane ae tuai ni korotabonim'aneaki ae na kanna. Ngkana iai te ianena ae maeka i buakomi ae tangiria n ira te kauring i bukin te Riao, a na riai moa ni korotabonim'aneia m'anen te auti anne ni kabane. Ao i mwiina, e a tib'a aranaki b'a ataeinimm'aanen Iteraera ni koaua ao e a konaa n ira te toa.

⁴⁹E na kamanenaaki naba te kaetieti aei nako ia naba aika bon ataeinimm'aanen raoi Iteraera ao nakoia naba ianena ake a maeka i buakomi.”

⁵⁰A ongotaeka Iteraera ni kabane ao a karaoi b'aai ake E a tia ni mwiokoia iai Moote ma Aaron te UEA.

⁵¹N te bong anne, ao te UEA e kairiia aia baronga Iteraera ni kaotinakoia mai Aikubita.