Read Te B'aib'ara Te Otinako 13 Bible Online

Te Otinako 13 - Te B'aib'ara bible

Te Otinako 13

¹Ao E taku te UEA nakon Moote,

²“Ko na katabuia karimoa ni kabane aika nati mm'aane b'a au b'ai b'a a na riki karimoa aika m'anen Iteraera ma aia man naba aika karimoa mm'aane b'a au b'ai.”

³Ao E taku Moote nakoia aomata, “Kam na ururinga te bong aei, te bong are kam kiitana iai Aikubita, are te tabo are kam toronaki iai. Bon aio te bong are E kaotinakoingkami iai te UEA ni m'aakana. Bon akea te kariki ae karikaki ae na kanaki. [17]

⁴Kam kiitana Aikubita n te bong aei n te moan nam'akaina are arana Abibi.

⁵E berita ngkoa te UEA nakoia ami bakatibu b'a E na anganingkami abaia kaain Eta, kaain Amora, kaain Iwa, ao kaain Iebuti.

⁶Kam na kana te kariki ae aki karikaki i nanon itiua te bong, ao kam na karaoa ami Toa b'a neboan te UEA n te kaitiua ni bong.

⁷Kam na aki kana te kariki ae itinaki i nanon itiua te bong, e na bon akea te iti ke te kariki ae itinaki n taabo ni kabane i aon te aba.

⁸Ngkana e moanaki te botaki, ao kam na kab'arab'araa nakoia natimi mm'aane b'a kam karaoi baikai ni kabane i bukin te b'ai are E a tia ni karaoia ngkoa te UEA nako imi i Aikubita.

⁹E na riki te botaki aei b'a te b'ai ni kauring, kaanga te kanikina ae kabaeaki i aoni baimi, ke i aon toan ram'ami, e na bon kauring ngkami b'a kam na teimatoa n taetaekinna ma ni kamateb'aia ana tua te UEA, i bukina b'a E kaotinakoi ngkami te UEA mai Aikubita ni m'aakana ae korakora.

¹⁰Kam na bukamarua te botaki aei i aon taina ae e a tia ni koteaki ni katoa ririki.

¹¹E na karokoi ngkami te UEA n te aba are Kanaan, n aron are E a tia ni berita iai nako imi, ma ami bakatibu. Ngkana E anganingkami,

¹²ao kam na anga ami man karimoa aika mm'aane b'a Ana b'ai te UEA. A na bane ami man aika karimoa mm'aane n riki b'a ana b'ai te UEA,

¹³ao kam na kabooi ni kaoki mai Rouna taian aati aika karimoa mm'aane ni kabane. Kam kona naba ni kamaiua te aati n onea mwiina n te tiibuteteei. Ngkana kam aki kani kabooa te aati ni kaokia, ao kam na otea roroana. Kam na kamaiuia karimoa mm'aane ni kabane. [18]

¹⁴Ngkana a titirakiningkami natimi mm'aane n taai aika a na roko b'a tera te botaki aei, ao kam na kaangai, ‘E kamaiura te UEA ni m'aakana ae korakora, ni kaotinakoira mai Aikubita are te tabo are ti toronaki iai ngkoa.

¹⁵Ngke e matoatoa nanon uean Aikubita ma n rawa ni kanakoira, ao E tiringiia naati mm'aane aika karimoa te UEA n te aba are Aikubita. E tiringiia aomata ao maan. Ao bon aei bukina are ti kareani iai karimoa mm'aane ni kabane nakon te UEA, ma ti kabooi ni kaoki natira mm'aane.

¹⁶E na riki te botaki aei b'a te b'ai ni kauring, kaanga aron te b'ai ae kabaeaki i aon te bai, ke i aon toan te ram'a. E na boni kauringiira aron te UEA ni kaotinakoira mai Aikubita ni m'aakana ae korakora.

¹⁷Ao n tokina ngke e a tia te uea [19] ni kariaia nakoia aomata, E aki kairiia te UEA ri nanon abaia kaain Biritia,[20] e ngae ngke e rangi ni kaan te kawai iai. E a tia n taetae te Atua ni kaangai, “Ane a na manga iangoa okiran Aikubita ngkana a buakanaki.”

¹⁸Ma ngaia are, e a onea mwiina ni kairiia n te kawai ae ab'ab'aki are ribuki ri nanon te rereua ni kaineta Taari are Uraura.[21] A kiitana Aikubita Iteraera, ni katauraoia nakon te buaka.

¹⁹Ao e uotii riin Ioteb'a Moote n aron ana berita ngkoa Ioteb'a are e a tia karaoia nako ia Iteraera. E kaangai ngkoa ana taeka Ioteb'a, “Kam na uoti riiu mai ikai, ngkana E kamaiungkami te Atua.”

²⁰Ao a kiitana Tukota Iteraera, ao a katei maeka i Etam i mataniwiin te rereua.

²¹Ao E ri rimoaia te UEA n te ngaina n te boua te nang ni kaota kawaia, ao n te tairiki, E ri rimoaia n te boua te ai ni kaotaia, b'a aonga ni kona ni m'ananga n te ngaina ma te bong.

²²E memena te boua te nang i moaia aomata n taai nako i nanon te ngaina, ao te boua te ai n te bong.