Read Te B'aib'ara Te Otinako 14 Bible Online

Te Otinako 14 - Te B'aib'ara bible

Te Otinako 14

¹Ao E taku te UEA ae te Atua nakoni Moote:

²Tuangiia aomata b'a a na okirikaaki ma ni katei aia maeka i Bi Airota i marenan Miketora ao Taari are Uraura, i rarikin B'aara Tebon.

³Ane e na taku te uea b'a a m'aninga nako Iteraera n te aba arei, ao n tuukaki n te rereua.

⁴N na karaoia b'a e na taningamatoa, ao e na manga kakioingkami, ao e na riki au tokanikai i aon te uea ma ana taanga ni buaka b'a karineau. Ane a na ataia iai kaain Aikubita b'a bon te UEA Ngai. Ao a karaoa are a tuangaki Iteraera.

⁵Ao ngke e a kaongoaki te uea b'a a tia ni birinako Iteraera, ao e a manga bita nanona ma ana aobitia, ao e taku, “Tera ngkai ae ti a tia ni karaoia? Ti a tia ngkai ni kabirinakoia Iteraera, ao ai akea ngkai ara toro!”

⁶Ao e katauraoi ana kaa ni buaka te uea ma ana taanga ni buaka.

⁷Ao e tao rimwiia ma ana kaa ni buaka ni kabane, n reitaki naba ma onobubua ana tautia aika a bane aroia, aika a kairaki irouia ana aobitia.

⁸Ao e tao rimwiia Iteraera ake a m'ananga nako ma te kakatonga te uea, i bukina ngke a boni kataningamatoaaki i roun te UEA ae te Atua.

⁹A kakioaki Iteraera n aia taanga ni buaka kaain Aikubita ma aia aoti ni kabane, ma aia kanibuaka, ao taani kabuti taian kanibuaka, ao a kauiaia ngke a maeka i rarikin Taari are Uraura i rarikin Bi Airota, ao B'aara Tebon.

¹⁰Ao ngke a noora ana taanga ni buaka te uea are B'arao Iteraera b'a a m'aati nakoia, ao a maaku, ao a tangi nakon te UEA are Atuaia ni bubuti buokaia.

¹¹Ao a taku nakoni Moote, “E raoiroi riki ngke ti taunaki n taian ruanimate ake i Aikubita, nakon ae ko kairira mai b'a ti na mate i nanon te rereua! Noora te b'ai ae ko a tia ni karaoia ngkai nako ira, ngkai ko uotiira nako mai Aikubita!

¹²Ti bon aki tuangko ngkoa i m'aain nakora b'a ae na bon riki te aro aei? Ti bon tuangko b'a ko na boni katikuira n arora b'a ti bon aoriira n riki b'a aia toro kaain Aikubita. E raoiroi riki te toronaki irouia kaain Aikubita nakon te mate ikai i nanon te rereua.”

¹³Ao e taku Moote, “Kam na aki maaku! Taua abami b'a kam na noora te b'ai ae na karaoia te UEA ae Atuami i bukin kamaiuami n te bong aei, kam na bon aki manga nooriia kaain Aikubita aika kam nooriia aikai.

¹⁴E na buaka te UEA ae Atuami i bukimi, ao bon akea te b'ai teuana ae kam na tangiria ni karaoia.”

¹⁵Ao E taku te UEA ae te Atua nakoni Moote, “E aera ngkai kam tangira buokami? Tuangiia aomata b'a a na waaki rake.

¹⁶Tabekaarake okom, ao aroria i aon taari. Ane e na bwenauaaki taari, ao a na kona Iteraera n nakonako i nanon taari i aon te tano ae m'au.

¹⁷N na karaoia kaain Aikubita b'a a na rangi n taningamatoa n te aro are a na bon waaki naba n rimwimi, ao e na manga karineaki naba arau i bukin au tokanikai i aon te uea ma ana taanga ni buaka, ana kaa ni buaka, ao ana taan kabuti kaa ni buaka.

¹⁸Ngkana I konaiia, ao a na bon ataia iai kaain Aikubita b'a bon te UEA Ngai.”

¹⁹Ao E a manga nako aneran te UEA are memena i moaia tautian Iteraera nako ni mena mai buki. Ao e m'aing nako naba te boua te nang ni karokoa

²⁰e roko i marenaia kaain Aikubita ma Iteraera. Ao e karooia kaain Aikubita te nang arei, ao e anga te oota nakoia Iteraera. Ma ngaia are, a aki kona ni kaaitibooia taanga ni buaka akekei n te tairiki arei ni karokoa te ngaina.

²¹Ao e arora nako baina Moote i aon taari, ao E uka taari ni kaokia te UEA n te angi mainiku ae korakora. E kare ni katoa tairiki n te aro are e a onika taari nakon te aba ae m'auteretere. Ao e bwenauaaki taari

²²ao a nakonako Iteraera i nanon taari i aon te tano ae m'au, ao taari, a tei kaanga taian o n itera ake uoua.

²³Ao kaain Aikubita, a kakioia nako nanon taari ma aia aoti ni kabane, ma aia kaa ni buaka, ao taani kabuti kaa ni buaka.

²⁴Ao E tarai naao te UEA mai aon te boua te ai, ao te boua te nang i m'aain ingin mainiku n tara aia taanga ni buaka kaain Aikubita, ao E katakakaiia.

²⁵E kabae wiiran aia kanibuaka, n te aro are a baenikai. Ao a taku kaain Aikubita, “E a buaka te UEA i bukiia Iteraera ni kaitaraira. Ti a kawaekoaira n nako mai ikai!”

²⁶Ao E taku te UEA nakoni Moote, “Arora baim i aon taari, ao ane e na manga oki taari ni b'aroia kaain Aikubita ma aia kaa ni buaka, ao taani kabuti kaa ni buaka.”

²⁷Ma ngaia are, e arora baina Moote i aon taari, ao e a manga okira arona taari ngke e a ing mainiku, ao a kataia n rawei maiuia, ma E kab'ab'aia te UEA i taari.

²⁸Ao e okira arona taari, ao e rabun taiani kaa ni buaka ma taani kabuti kaa ni buaka, ao kaain ana taanga ni buaka Aikubita ni kabane ake a rimwiia Iteraera n ri nanon taari, ao bon akea nikiraia ni maiu.

²⁹Ao Iteraera, a bon karauia n nakonako i taari i aon te tano ae m'au, ma taari aika a tei kaanga taian o n itera ake uoua.

³⁰Ao E kamaiuia Iteraera te UEA n te bong arei mai rouia kaain Aikubita, ao Iteraera a noriia kaain Aikubita ni wene ni mate i mataniwiin taari.

³¹Ao ngke a noora te m'aaka ae korakora Iteraera are E a tia te UEA ni kataenikaiia iai kaain Aikubita, ao a maaka te UEA, ao a onimakina te UEA, ao a kakoaua ana toro are Moote.