Read Te B'aib'ara Te Otinako 17 Bible Online

Te Otinako 17 - Te B'aib'ara bible

Te Otinako 17

¹Ao a kiitana te Rereua are Tin te botannaomata are Iteraera ni kabane, man te tabo teuana nakon te tabo teuana n aron ana babaaire te UEA. A maeka i Rebirim,[27] ma bon akea te ran ae a na kona ni mooi iai ikekei.

²A ngurengure nakoni Moote ao a taku, “Ko na anganiira te ran b'a ti na mooi.” Ao e taku Moote, “E aera ngkai kam a ngurengure? E aera ngkai kam kataa te UEA?”

³Ma a bon rangi ni bora n taka aomata, ma ngaia are, a boni ngurengure naba nakoni Moote, ao a taku, “E aera ngke ko kaotinakoira mai Aikubita? Ko na tiringiira ma ara ataei ao ara man n te taka?”

⁴Ao e kakorakora Moote n tataro nakon te UEA ao e taku, “Tera ae N nang karaoia nakoia aomata aikai? Ae a kaan karebanaai n taian atiibu.”

⁵Ao E taku te UEA nakoni Moote, “Kairiia tabeman taani kairiri irouia Iteraera, ao naako ri moaia aomata. Ao uota naba te oko are ko orea ngkoa te karaanga are te Naire iai.

⁶N na tei i m'aaim i aon te b'a are n te Maunga are Tinai. Ko na orea te b'a, ao ane na tiinako te ran man te b'a i bukin nimaia aomata.” Ao e karaoa arei Moote i mataia aia taani kairiri Iteraera.

⁷Ao e aranaki te tabo arei b'a Mata ao Merib'a, [28] i bukina ngke a ngurengure Iteraera, ao a kataa te UEA n aia titiraki ae kaangai, “E boni memena i roura te UEA ke E aki?”

⁸Ao a roko kaain Amareka ni buakaniia Iteraera i Rebirim

⁹Ao e taku Moote nakon Iotua, “Kairiia tabeman mm'aane b'a kam na buakaniia kaain Amareka ningabong, ao n tei i aon taubukin te tabuki ma n taua te oko are tuangai te UEA b'a n na uotia.”

¹⁰Ao e karaoa are tuangaki Iotua irouni Moote, ao e nako ni buakaniia kaain Amareka; ao Moote, Aaron ma Ura, a nako n tam'arakea te tabuki.

¹¹Ao ngkana e katei baina Moote, ao a tokanikai Iteraera, ao ngkana e katikui baina, ao a manga moanna n tokanikai kaain Amareka.

¹²Ao ngke a kakai bain Moote, ao a urakini atiibu Aaron ma Ura b'a e na tekateka i aona Moote, ao ngaiia a taui bain Moote ni kamatoa ni karokoa bungin taai.

¹³Ao anne aron reken tokanikain Iotua i aoia kaain Amareka.

¹⁴Ao i mwiin arei, E taku te UEA nakon Moote, “Koroi taekan te tokanikai aei ao warekia nakon Iotua. I tangiriia kaain Amareka b'a a na mauna nako taekaia n aki toki.”

¹⁵Ao e katea te baonikarea Moote, ao e aranna ni kaangai, “Bon au man n tokanikai te UEA.”

¹⁶Ao e taku, “katioa i eta Ana mani n tokanikai te UEA.” E na bon teimatoa te UEA ni buakaniia kaain Amareka.