Read Te B'aib'ara Te Otinako 19 Bible Online

Te Otinako 19 - Te B'aib'ara bible

Te Otinako 19

¹Ao a kiitana Rebirim Iteraera, ao a roko n rereuan Tinai ni moanibongin te katenua n nam'akaina i mwiin kitanakin Aikubita.

²Ao a katei maeka i oin te Maunga are Tinai. [34]

³Ao e tam'arakea te maunga Moote b'a e na maroroo ma te Atua. Ao E wetea Moote te Atua man te maunga, ao E tuangnga b'a e na taetae nakoia Iteraera ni kaangai, aika kanoan Iakob'a:

⁴“Kam bon noori b'aai ake I karaoi Ngai ae te Atua nakoia kaain Aikubita, ma arou ni uotingkami kaanga te ikare ngkana e uotiia natina i aoni baina ni kiba, ma ni uotingkami nako ikai nako Iu.

⁵Ao ngkai, ngkana kam ongotaeka i Rou, ma ni kaawakin au berita, ao kam na riki b'a au aomata. Au b'ai te aonnaba ae b'anin, ma ngkami kam na riki b'a Au aomata aika rineaki,

⁶aika aomata aika a katabuaki b'a au b'ai n ti Ngai, ao kam na m'akuri i buku n ai aroia ibonga.”

⁷Ma ngaia are, e ruorikaaki Moote, ao e weteia aia taani kairiiri aomata ni ikotiia, ao e tuangiia b'aai ni kabane ake E a tia te Atua n tuangnga.

⁸Ao i mwiin arei, ao a bane aomata n taku, “Ti na karaoi b'aai ni kabane akana E taekin te UEA,” ao e kaota arei Moote nakon te UEA.

⁹Ao E taku te UEA nakoni Moote, “N na kawariko n te nang ae matenten, b'a a aonga n ongo b'anaau aomata ngkana I taetae ma ngkoe, ao a na kakoauako man te tai aei, ao n taai nako.” Ao Moote e tuanga te UEA aia kaeka aomata,

¹⁰ao E taku te UEA nako ina, “Ko na nakoia aomata ao n tuangiia b'a a na kabanea te bong aei ao te ingabong ni kaitiakia i bukin te taromauri. A na riai ni uati kunnikaia,

¹¹ma ni katauraoia n te bong are i mwiin te ingabong b'a N na ruo nako aon te Maunga are Tinai n te bong anne, n te aro ae a na bane n noorai aomata ni kabane.

¹²Korea te tia ni katobibia te maunga b'a akea ae na ri aona, ao tuangiia b'a akea ae na tam'arakea te maunga ke ni kaaniia. Ngkana iai ane roko waena iai, ao e na bon kamateaki;

¹³E na kona naba ni karebanaaki n atiibu, ke ni katebeaki n taiani kanoa ni katebe, n te aro ae ana bon akea ae na riingnga. E na karaoaki te tua aei nakon te aomata, ao te man naba; a na bon tiringaki. Ma a na tam'arakea te maunga aomata ngkana e tang te bu.”

¹⁴Ao i mwiina, e ruorikaaki ma n tuangiia aomata b'a a na ikotaki ni katauraoia nakon te taromauri. Ma ngaia are, a uati aia kunnikai.

¹⁵Ao e taku Moote nako ia, “Kam na riai n tauraoi nakon te bong are i mwiin te ingabong, ao kam na aki bootaki ma buumi.”

¹⁶Ao e rebwe te baa ao e iti karawa ni moan ingabongin te katenua ni bong, ao e kaoti te nang ae matenten i aon te maunga, ao e tang te buu ae moan te tangim'aaka. Ao a bane n ruru ni maaku kaain aia maeka arei ni kabane.

¹⁷Ao e tuangiia aomata Moote b'a a na otinako man aia maeka b'a a na kaaitibo ma te Atua, ao a bane n tei i oin te maunga.

¹⁸Ao e rabunaki ni kabane te maunga are Tinai n te bubu, i bukina b'a E a ruo te Atua i aona n rab'atanna n te ai. Ao e aetorake te bubu arei kaanga bubun te ai ni kanaiai, ao a rangi n ruru ni maaku aomata ni kabane.

¹⁹Ao e rikirake n tangim'aaka tangin te buu arei. Ao e taetae Moote, ao e kaekaaki iroun te Atua n rebwen te baa.

²⁰Ao E ruona taubukin te maunga te UEA, ao E wetea Moote b'a e na tam'arake nako taubukin te maunga. Ao e tam'arake Moote

²¹ao E taku te UEA nako ina, “Naako ruuo, ao tuangiia aomata b'a a na aki ri aon te tia i bukin noorakiu, b'a ngkana a karaoa anne, ao a na mate aika bati mai buakoia.

²²E ngae ngkana taiani ibonga aika a roko ni kaaniai, a na riai moa ni kaitiakia b'a N na katuaaia ngkana a aki.”

²³Ao e taku Moote nakon te UEA, “A aki kona ni waerake aomata i bukina ngke Ko a tia n tuangiira b'a ti na atonga te maunga b'a e tabu, ma ni korea te tia ni katobibia.”

²⁴Ao E taku te UEA, “Naako ruuo ni kairamai Aaron. Ma ibonga ma aomata a na aki ri aon te tia are e a tia ni koreaki nako Iu, b'a N na katuaaia ngkana a ri aona.”

²⁵Ao e ruo rikaaki Moote nakoia aomata, ao e tuangiia b'aai ni kabane ake E taekin te UEA.