Read Te B'aib'ara Te Otinako 22 Bible Online

Te Otinako 22 - Te B'aib'ara bible

Te Otinako 22

¹Ngkana arona b'a ko iraea te kao mm'aane ao ko tiringnga ke ko kaboa nako, ao ko na kabooa mwiina n niiman taian kao mm'aane; ngkana ko iraea te tiibu ao ko tiringnga ke ko kaboa nako, ko na kaboa mwiina n aman te tiibu.

²Ma ngkana ko aki konaa ni kabooa mwiina n te man, ko na kabooaki nako b'a te toro ngkoe i bukin te b'ai are ko a tia n iraea.

³Ngkana ko iraea te kao mm'aane, te aati, ke te tiibu, ao a bon maiu, ao ko na kataboroa m'aitiia n anga nakon are ana man.

⁴Ngkana arona b'a ko bure n tiringa te tia kimoa ae e ninia am auti ngke e a roo, ao ko aki bure iai. Ao ngkana ko tiringa te aomata ae e ninia am auti n te ngaina, ko na reke n te bure n tiritiri iai.

⁵Ngkana arona b'a ko kaotinakoa am man man am tabo ao ni kakana te uteute[43] n ana tawaana ke ana nne ni kureebe temanna, ko na riai ni kabooa mwiin ana urub'ai am man man uaan am tai n am kureebe ao taian uita aika taiani kabanea n tamaroa.

⁶Ngkana ko aki taratara raoi ngkana ko kauraura ao e a raka nako nakon aban temanna, ko na riai ni kabooi mwiin taian aroka ke taian tawaana ake a uruaki n te ai nakon te aomata are ana b'ai.

⁷Ngkana arona b'a iai ae e buutiiko b'a ko na kawakina ana tirewa ke b'aai aika a kakaawaki n am auti, ao a manga iraeaki b'aai akanne. E na kabooi mwiin b'aai akanne te aomata are e kimoai ngkana e reke.

⁸Ma ngkana e aki reke te aomata are e kimoai, a na iangoia taan moti b'a ko na kabooa mwiina ke ko na aki.

⁹Ngkana arona b'a iai uoman aomata aika uneakina te kao ke te tiibu ke te kunnikai ae ti teuana. A na iangoa te kangaanga aei taani moti, ao te aomata are e reke n te bure, e na kataboroa m'aitin te b'ai anne nakon are bon oin ana b'ai.

¹⁰Ngkana arona b'a iai kaain rarikim ae na m'ananga moa nakon te tabo teuana ao e butiiko b'a ko na kaawakina ana aati ke te kao mm'aane ke te tiibu ke maan riki tabeua, ao e a ti mate naba ke e ikoaki ke e kimoaaki ngke akea ae e nooria.

¹¹Ngkana ko bon tuea ma Ngai b'a am tia kakoaua b'a ko bon aki kaikoaka te man anne, ao ko riai n aki kabooa mwiina. E riai n rau nanon te tia b'aib'ai n am kaotioti.

¹²Ma ngkana arona b'a e iraeaki te man ngke e mena iroum, ao ko na kabooa mwiina.

¹³Ngkana arona b'a e tenaaki te man irouia maan ni kaakang ao e mate, ao ko na kaota nikiran rab'atana nakon te aomata are ana man, ao ko na aki kabooa mwiina.

¹⁴Ngkana arona b'a ko tangoa te man iroun ae kaain rarikim, ao e manga ikoaki ke e mate ngke e aki mena ikekei te aomata are bon ana man. Ko riai ni kabooa mwiina.

¹⁵Ma ngkana arona b'a iai te b'ai ae e riki nakon te man ngke e bon mena ikekei te aomata are ana man, ao ko na aki kabooa mwiin te man anne. Ma ngkana kam riitina te man anne, ao e na riki te m'ane are kam anga b'a kabooan mwiin te kabuanib'ai are e riki nakoina.

¹⁶Ngkana arona b'a e tuai mani mare te ataeinaine temanna ao e tuai naba ni kainrou. Ao ngkana arona b'a e tuangnga b'a e na wene ni bure ma ngaia, e na riai moa ni kab'aka boon te kainrou, ao i mwiina, e a mare ma ngaia. [44]

¹⁷Ma ngkana arona b'a e rawa taman te aine ni marea natina te aine ma te mm'aane anne, e na bon kab'akaaki naba boona.

¹⁸Tuaan te tabunea bon te tiringaki.

¹⁹Tuaan te wene ni bure ma maan bon te tiringaki.

²⁰Tuaan te angakarea nakoia anti tabem'aang, bon te tiringaki akea riki b'a bon ti Ngai.

²¹Kam na aki kabuakakaia Iruwa aika maeka i buakomi. Uringnga b'a bon iruwa ngkami i Aikubita.

²²Kam na aki karaoa ae e aki raoiroi nakoia aine aika a mate buuia ke ataei aika akea aia karo.

²³Ngkana kam karaoa anne, ao ane a na buubutiai buokaia, ao N na roko ni kamaiuia.

²⁴Ae N na bon rangi n un n te aro are N na tiringiia ami mm'aane ao ni karikiia buuia b'a aine aika a mate buuia ao natiia b'a ataei aika akea tamaia.

²⁵Kam na aki tangira rakan te m'ane ae kam anga b'a e na taarauaki irouia aomata nako aika a maiu ni kainano.

²⁶Ko na riai ni kaoka te kabaraaki are te kooti are ko anaia b'a te b'ai ni kakoaua i bukin te roun, ao ko riai ni waekoa ni kaokia nako ina i m'ain bungin taai,

²⁷b'a bon ti anne rabunan te aomata ae maiu ni kainano are e na rabunna iai ngkana e matu n te tairiki. Bon te Atua Ngai ae I akoi, ao ngkana arona b'a a weteai, ao N na bon roko ni buokiia.

²⁸Kam na aki taekina ae e buakaka nakon Iu ke nakon ami tia kairiiri.

²⁹Kam na kakaonimaki n anga te karea are te uita ao te wain ake bon au b'ai.[45] Kam na katabuia natimi mm'aane b'a au b'ai

³⁰ao moan natiia naba ami kao ma ami tiibu. Katikuia maan i rarikin tinaia i nanon itiua te bong, ao te kawani bong kam na anganai, Ngai ae Atuami.

³¹Bon au aomata ngkami aika kam rineaki, ma ngaia ae kam na aki kang irikon taiani kao ke ami tiibu aika a tiringaki irouia maan aika moaanti. Ma kam kam'arakeia iai ami kamea.