Read Te B'aib'ara Te Otinako 24 Bible Online

Te Otinako 24 - Te B'aib'ara bible

Te Otinako 24

¹E taku te UEA nakon Moote, “Nako mai nako iu i aon te maunga aei. Kaira Aaron, ao ai uana naba ma natina mm'aane ake uoman ake Nataba ao Abiu, ao itingaun mai buakoia taani kairiri aika Iteraera. A riai n taua raroaia ngkana a taromauriai,

²ma bon ti ngkoe ae ko na kaaniai. Akea riki temanna ae ko na kairiia ni waerake.”

³Ao e anga taian tua Moote nakoia aomata ao a berita ni kaangai, “Ti na karaoi b'aai nako akana e a tia ni mwiokoira iai te UEA!”

⁴Ao i mwiina, e korei b'aai nako Moote ake taekin te UEA. Ao e uti Moote n te ingabong are i mwiina. E karaoa te baonikarea i oin te maunga ao e katea te atiibu ae rangi ni buubura i bukiia barongan nako Iteraera n tatabeua nako.

⁵E bon kanakoia naba tabeman rorobuaka b'a a na kabuoka te angab'ai ao te karea are te kaomm'aane b'a te raka n angab'ai[52] nakon te UEA.

⁶E anaa m'akoron raraan te man Moote mai nanon boora ao e tatauriia iai nikiran rab'atan te baonikarea ni kabane.

⁷Ao i mwiina, e wareka ana Tua te UEA n te b'anaa ae e korakora nakoia aomata, Ao a taku, “Ti na ongotaeka iroun te UEA ma ni karaoi b'aai nako ake E mwiokoira iai!”

⁸E anaa raraan te man Moote man taiani boora ao e tatauriia iai aomata. Ao i mwiina, e tuangiia ni kaangai, “E karaoa te boraraoi te UEA n te raraa aei ma ngkami.

⁹Ao a kaai n tam'arakea te maunga Moote ao Aaron, ao ai uana naba ma Nataba ao Abiu ao taani kairiiri ake itingaun

¹⁰ao a noora Atuan Iteraera b'a a mena i aani waena te b'ai ae kaanga taraan te tabo ae kamatoaaki ae karaoaki n te tabeiro[53] ao e raneanea kaanga karawa.

¹¹E bon aki katuaaia taani kairiiri aikai te Atua e ngae ngke a nooria. Ma ngaia are, a am'arake ma ni mooi.

¹²E taku te UEA nakon Moote, Tam'arake nako iu i aon te maunga ao ko na tiku ikai tabeua te tai. N na anganiko atiibu aika uoua ae I a tia ni koroi i aoia taian tua aika a riai n ongotaeka iai au aomata.”

¹³Ao a katauraoi Moote ma Iotua are ana kauoman, ao i mwiina e a waaki ni kawaina Moote n tam'arakea te maunga ni kaitibo iai ma te Atua.

¹⁴E a tia Moote n tuangiia taani kairiiri ni kaangai, “Kam na tataninga ikai ni karokoa okiu. A na raoningkami Aaron ma Ura ao a na karaoi taian mangaongao ni kabane ngkana ti nako.”

¹⁵Ao ngke a tam'arakea te maunga are Tinai Moote, ao e rabunaki te maunga n te nang,

¹⁶ao e ruo rikaaki raneanean mimitongin te UEA ao e tiku ikekei. E rabuna te maunga te nang i nanon onobong, ao E tuanga Moote te UEA n te kaitiua ni bong b'a e na rin i buakon te nang.

¹⁷Ao e karaoa arei Moote n tiku ikekei i nanon abwi te ngaina ma te bong.

¹⁸Taraan mimitongin te UEA irouia aomata ti te bo taraana ma te ai ae urarake i taubukin te maunga.