Read Te B'aib'ara Te Otinako 31 Bible Online

Te Otinako 31 - Te B'aib'ara bible

Te Otinako 31

¹E taku te UEA nakon Moote:

²I a tia n rinea Betarera[72] are kaain barongan Iuta b'a e na karaoa te Um'antabunrianna ma b'aina nako.

³I aki ti kaonna n Tamneiu

⁴ma I a tia naba n anganna te wanawana are na karikia b'a te tia karaob'ai ngaia,

⁵ae bairaoi are na karaoa te b'ai man te koora, te tirewa, te buraonti, te atiibu, ao te kai.

⁶I a tia n rinea Ooriaba[73] are kaain te baronga are Taan b'a e na m'akuri ma ngaia, ao I a tia n anga naba te konab'ai ni karaob'ai nakoia aomata nako aika na buokiia ni karaoi b'aai nako aika I a tia ni mwiokoingkami iai n aron aikai:

⁷te Um'antabunrianna ma b'aina nako, te Atiniberita ma te tabo n akoi, te taibora ma b'ain aona nako,

⁸te taura ma b'aina nako, baonikarean te b'ai ni kaboiarara are e kaakabubuaki, te baonikarea i bukin taian karea ma b'aina nako,

⁹te boora are te buraonti ma kainteina, kunnikaiia ibonga aika a tamaroa i bukiia Aaron ma natina mm'aane,

¹⁰te b'a ni katabutabu ao te m'akuri ni katabutabu,

¹¹ao te b'ai ni kaboiarara are e kaakabubuaki i bukin te Tabo are e Tabu.

¹²E tuangiia Iteraera Moote ana taeka te UEA are E taekinna ae kaangai:

¹³Bon au b'ai te Taabati.[74] I tuangkami ngkai ma ami kariki nako b'a kam na ongotaeka n taai nako nakon tuan nako te Taabati. I bukin karaoan aei i Rou, b'a kam aonga n ataia b'a I a tia n rineingkami b'a au aomata ni koaua.

¹⁴Karika te bong ae te Taabati b'a te bong ae tabu.

¹⁵Onobong ami bong ni karaoi ami m'akuri, ma Au b'ai te Taabati, ao e na riai n tiku b'a te bong ni motirawa. Kam na aki atongaki b'a Au aomata ngkana kam m'akuri n te Taabati, ao kam na kamateaki.

¹⁶A riai roro nako i aon Iteraera ni karinea te Taabati.

¹⁷E riki te bong aei n taai nako b'a te tia kauring, nako Iu ao nako ia naba Iteraera, b'a I karaoi taiani karawa ma aonnaba i nanon onobong, ao I motirawa ma ni katoka kuau n te kaitiua ni bong.

¹⁸Ngke bane ana taeka te Atua nakon Moote i aon te Maunga are Tinai, ao E anganna taian atiibu aika uoua aika raababa aika E a tia ni korei i aoia ana tua ni kabane, n oin tabonibaina.