Read Te B'aib'ara Te Otinako 34 Bible Online

Te Otinako 34 - Te B'aib'ara bible

Te Otinako 34

¹E taku te UEA nakon Moote n te bong teuana, “Korei atiibu aika uoua aika a rabaaba n aron are te moan are I a tia ni karaoia, ao N na korei i aona taian tua aika ti te bo ma ake n te moan atibu, ake a tia n uruaki.

²Katauraoiko nakon te ingabong n te moaningabong b'a ko na tam'arakea te Maunga are Tinai ni kawarai i taubukina.

³Bon akea ae e na iriko ke n toka naba i aon te maunga. Bon akea naba ae e na kaam'arakea ana tiibu ke ana nanai ni kao i oin te maunga.”

⁴Ma ngaia are, e korei atiibu aika a rabaaba Moote n aron ake taian moa n atiibu, ao n te moaningabong are i mwiina e uoti nako taubukin te Maunga are Tinai, n aron are E a tia ni mwiokoia te UEA iai.

⁵E ruorikaaki te UEA ae te Atua i aon te nang ao E tei i rarikin Moote ikekei i aon te maunga. Ao E taekina arana ae e tabu te Atua, “ae te UEA”.[78]

⁶Ao i mwiina, e ri matan Moote ao e weewete ni kaangai, “Bon te UEA Ngai ae te Atua. I nanoanga ao I taotaonaki n nano nakoia au aomata. I kaota nakoim te tangira ae e korakora, ao te kakaonimaki.

⁷I kakaawakina au berita nakoia au aomata n aki toki, ma I katuaaia aomata nako aika a bure. Ngkana a bure aomata, I katuaaia ma natiia, ao tibuia naba ma tibutoruia, ao tibutarataraia.”

⁸Ao e kawaekoaa ni boobaraaki Moote nako aontano ao e taromauriia te UEA.

⁹Ao e tataro ni kaangai, “Te UEA, ngkana arona b'a Ko bon kukurei irou, ao I tataro b'a Ko na iriira. E bon koaua ae bon taani bure aomata aikai ao taani kamangao, ma Ko na kab'arai ara bure ao karikiira b'a am aomata.”

¹⁰E taku te UEA: I berita b'a N na karaoa te kakai i bukimi ae kam tuai man noonoria n taabo tabeua n te aonnaba aei. A na tei ni maaku botannaomata aika i rarikira ma n ataia b'a bon Ngai ae I karaoi b'aai aika kakai aikai.

¹¹N na kairoroia ni kanakoia kaain Amora, kaain Kanaan, kaain Eta, kaain Beriti, kaain Iwa, ao kaain Iebuti, ao kam riai ni karaoa te b'ai ae I mwiokoingkami iai n te bong aei.

¹²Kam na aki karaoa te iraorao ma temanna mai buakoia aomata aikai. Ngkana kam karaoa anne, ao e na riki b'a te m'aruarua ni kam'ane.

¹³Kam na onea mwiin anne n urua aia baonikarea ma ni kamaeei taian boua ake a tabu [79]

¹⁴I rangi ni kainanoa ami kakaonimaki ni kabane--kam riai n aki taromauri anti tabem'aang!

¹⁵Kam na aki raorao ma aomata ake ikekei, b'a kam kaawa ni manga taromauri anti ma n iri buakon aia am'arake n angakarea.

¹⁶Ane a na mare ami mm'aane ma aia aine ma ni kakairi n taromauriaia antiia.

¹⁷Kam na aki karaoi bannan antiia man taian biti.

¹⁸Kam na aki m'am'aninga ni karaoa te Toa are te Kariki are Aki Karikaki n te nam'akaina are Abibi. [80]

¹⁹Au b'ai karimoa mm'aane man ami utu nako ao ami nanai n tiibu ao ami nanai ni kao.

²⁰Kam konaa ni katokaa kain te aati[81] ni kareana te tiibuteteei; ao ngkana kam aki, ao kam riai n otea roroan te aati. Kam riai ni kamaiuia karimoa mm'aane ni kabane.

²¹Kam na karaoa ami m'akuri i nanon onobong ao kam na motirawa n te kaitiua ni bong, e aoria naba ngkana e b'akara nanon bongin te ununiki ma te tai.

²²Kam na bukamarua te Toa ae M'anganikaai [82] ni karokoa tokin te aumeaang ngkana kam taiia uaan te uita, ao ni bukamarua te Toa ae M'anganikaai[83] ni katoa tokin te aumaiaki ngkana kam kiniki uaa.

²³A na riai n roko ami mm'aane n taromauriai tenua te tai n te ririki, i bukina b'a bon te UEA Ngai ae Atuan Iteraera.

²⁴N na kanakoia botannaomata ake i abami, ao N na kabuubura tian abami. Ao e na bon akea temanna ae e na konaa n anaa ami b'ai ngkana kam roko n taromauriai tenua te tai ni katoa ririki.

²⁵Kam na aki anga te kariki ae e itinaki ngkana kam kareana te man i aon te baonikarea. Ao kam na aki katuka nikiran te man anne n te Riao nakon te bong are i mwiina.

²⁶Bon te UEA Ngai ae Atuami, ma ngaia are, kam riai ni uoti moan uaan ami tai nakon te tabo n taromauri. Kam na aki kaburoa te kooti ae e uarereke i nanon mirikin tinana.

²⁷E tuanga Moote te UEA b'a e na koroi taian tua n taian koroboki, b'a kanoan te boraraoi ma Iteraera.

²⁸E tiku Moote ma te UEA i aon te maunga i nanon abwi te ngaina ao abwi te tairiki, n aki am'aam'arake ke ni mooi. Ao e koroi Tuua ake tebwiina, ake m'akoron te boraraoi aika a rangi ni kakaawaki i marenan te Atua ma ana aomata.

²⁹E ruorikaaki Moote mai aon te Maunga are Tinai, ao e uoti Tuua ake Tebwiina. E oota moana n oota nako i bukina ngke E a tia n taetae te UEA ma ngaia. Ma e aki ataia n te moan tai Moote ae e oota nako moana.

³⁰Ao ngke a taraa Moote teuare Aaron ma raona ake tabeman, a nooria b'a e oota nako moana, ao a maakua ni kaaniia.

³¹Ao e weewetea Aaron teuare Moote ma taani kairiiri b'a a na kawaria, ao e taetae ma ngaiia.

³²Ao a ikotaki ni katobibia Moote nikiraia Iteraera, ao e anganiia taian tua ake e anganna te UEA i aon te Maunga are Tinai.

³³Ao e bon teimatoa naba n oota nako moan Moote, ao ngke e tia n taetae ma aomata, e a rabuna moana n te rabuna ni mata.

³⁴E aki toki ni kaakanakoa te rabuna ni mata Moote ngkana e rin n te Um'antabunrianna n taetae ma te UEA. Ao ngkana e oti nako, e na tuangiia aomata nako b'aai ni kabane ake e a tia n tuangnga te UEA.

³⁵Ao a nonoora moana b'a e bon teimatoa naba n oota nako. Ma ngaia are, ngkana e tia n taetae ma ngaiia, e na rabuna matana n te rabuna ni mata ma ni katikua i matana ni karokoa manga rokona are i mwiina n taetae ma te UEA n te bong are i mwiina.