Read Te B'aib'ara Te Otinako 39 Bible Online

Te Otinako 39 - Te B'aib'ara bible

Te Otinako 39

¹Ao a karaoi kunnikaia ibonga ake a na kamanenai ngkana a karaoa aia m'akuri n te Tabo are e Tabu, ao a karaoi man buraen te tiibu ake a buruu, a beebo ao a uraura. A karaoa te kunnikai n ibonga i bukin aron Ana mwioko te UEA.

²A karaoa te ebota man te rinen ae e raoiroi, te burae n tiibu ae e buruu, e uraro, ao ae e uraura, ao man te karai naba ae te koora.

³A amana te koora ni kammaniia, ao a koroi ni kairariki b'a a na karaoaki ma te riinen ae e raoiroi, ao te burae n tiibu ae e buruu, ao ae e uraro, ao ae e uraura.

⁴A karaoi uoua i aon te anga i aon te kunnikai b'a b'ain te ebota ni kabaeaki nako rarikina, b'a a aonga ni kona ni bae ni matoatoa.

⁵Ao e kabaeaki ma te ebota te bare ae karanaki mani biraki, ao e karaoaki naba man te b'ai ae ti te bo ma ake a karaoaki naba iai akekei, ao e kabaeaki ma te ebota n ti teuana ma ngaia n aron Ana mwioko te UEA nakoni Moote.

⁶A kanim'aki atiibu aika oniki, n tein te b'ai ni katamaroa te koora: ao a karauaki ni koreaki i aoia n tatabeua nako araia natin Iakob'a ake mm'aane ake tengaun ma uoman.

⁷A katikui i aon b'ain aonnangan te ebota b'a oneani mwiia barongan Iteraera ake tengaun ma uoman, n aron Ana mwioko te UEA nakon Moote.

⁸A karaoa naba te ub'a ni b'aai ake e karaoaki mai iai te ebota, ao ti te arona naba katamaroaia.

⁹E bon tikuea, ao e oteaki uoua te tai, uabwi ma uoua te tientemiita ab'akina, ao uabwi ma uoua te tientemiita raababana.

¹⁰Ao a kanim aua te rinan te koora i aona; te moan rinan bon te tarerio, tobati, ao te kabangkoro.

¹¹Te kauoua n rinan bon te timaraketo, te tabeiro, ao te taiman.

¹²Te katenua n rinan, te uakinto, te akete, ao te ametuteto.

¹³Ao te kaaua n rinan bon te beruro, te oniki, ao te iatebi.

¹⁴A koreaki i aon atiibu ake tebwi ma uoua araia natin Iakob'a ake tengaun ma uoman; temanna i aon teuana te atiibu b'a kaanga onean mwiia barongan Iteraera ake tengaun ma uabaronga.

¹⁵A karaoa te tiein man te koora ae itiaki ae e biraki n ai aron te koora b'a b'ain te ub'a.

¹⁶A karaoi uoua b'ai ni katamaroa koora, ao uoua kaanga taiani m'am'a, ao a kanimwi m'aam'a ake uoua nakon tabon te ub'a ake mai eta.

¹⁷A kabaei taiani kora ake koora nakon taiani m'am'a ake uoua,

¹⁸ao tabon koora ake uoua nakon taiani b'ai ni katamaroa ake uoua. Ao a kabaei n aron aei mai moana nakon tabonangan aon te ebota.

¹⁹Ao a karaoi riki uoua taiani m'am'a koora, ao a kabaei ma tabon koonan te ub'a ake mai nano i aon te mataniwi are i nanona are i akuun te ebota.

²⁰A karaoi riki uoua m'aam'a koora, ao a kanim ma m'akoron te ebota are mai nano i matan b'ain aon te anga ake uoua, i rarikin te kabaea n nuuka i etan te roo are rarangaaki raoi.

²¹Ao a kabaea m'am'an te ub'a nakon m'am'an te ebota n te karai ae e buruu, n te aro are e na wene raoi te ub'a i aon te bare n aki matanatana.

²²E karaoaki te kunnikai are e ri aan te ebota man te buraentiibu ae e buruu ni kabane.

²³E karaoaki mataniwiina ni kaitaraa b'angab'angan te roroa n te aro ae e na matoatoa n aki kakai raeuaaki.

²⁴A kanim taiani bamkuranete aika rinen aika a raraoi ma buraentiibu

²⁵aika a buruu, uraro, ao a uraura ni kaai marenaaki n taiani beero aika koora aika raneanea,

²⁶n aron are e a tia ni mwiokoaki iai Moote iroun te UEA.

²⁷Ao a karaoi kabaraaki i bukin Aaron, ma natina mm'aane,

²⁸ao taian rabuna n atuu, b'ara, kawaerake aika rinen,

²⁹ao te kabae ae e karaoaki man te rinen ae e raoiroi, ao te buraentiibu ae e buruu, uraro, ao ae e uraura, ao e katamaroaaki n aron mwiokoan Moote iroun te UEA.

³⁰Ao a karaoa te b'ai ni katamaroa, ae te kanikina ae e tabu man te koora ae raneanea, ao a korea i aona ae e kaangai, Ana b'ai te UEA

³¹Ao a kabaea i moan te rabuna n atuu n te karai ae e buruu n aron Ana mwioko te UEA nakoni Moote.

³²Ao e a tia raoi te m'akuri i aon Ana Um'antabunrianna te UEA. A karaoi b'aai ni kabane Iteraera n aron are E a tia te UEA ni mwiokoa iai Moote.

³³Ao a uota te Um'antabunrianna ma b'aina ni kabane, te matau, kaina ake a bangaki, bouana, ao kainteina;

³⁴te rabuna are kunin te tiibu mm'aane ae katamaroaaki n te uraura; te rabuna are kunin te man ae e raoiroi; te keeten;

³⁵te Atiniberita are e mena iai te atiibu ni koroboki, taiani kai n amoamo ao matana,

³⁶te taibora ma b'aina nako, ao te kariki are te angab'ai nakon te Atua;

³⁷kaintein te taura are te koora ae itiaki, taurana ma b'aina nako, ao b'aan te taura;

³⁸te baonikarea are te koora; te b'aa ni katabutabu; te b'ai ni kaboiarara; keetenin mataroan te Um'antabunrianna;

³⁹te baonikarea are te buraonti ma warawarana naba are te buraonti, kain amoana ma b'aina ni kabane; beetin ao nangoaia;

⁴⁰keetenin te oo ma bouana, ao aaia, ao te keeten i bukin oon mataroana, ma roobuna; beken te Um'antabunrianna; ao b'aai ni kabane ake a na kabonganaaki n te Um'antabunrianna;

⁴¹ao te kunnikai ae e tamaroa are a na kamanena i nanon te Tabo are e Tabu, kunnikai aika a tabu i bukin Aaron are te ibonga, ao natina mm'aane.

⁴²Ao a tia ni karaoi m'akuri ni kabane Iteraera n aron are E mwiokoaki iai Moote iroun te UEA.

⁴³Ao e tuoi b'aai nako Moote, ao e nooria b'a a tia ni karaoi n aron Ana mwioko te UEA. Ma ngaia are, E a taetae ni kakab'aiaia Moote.