Read Te B'aib'ara Te Otinako 40 Bible Online

Te Otinako 40 - Te B'aib'ara bible

Te Otinako 40

¹Ao E taku te UEA nakon Moote,

²Ko na katea Au Um'antabunrianna ike N na memena iai ni moanibongin te moan n ririki.

³Karina te Atiniberita i nanona, are a mena iai tuua ake tebwina, ao katinea te keeten i matana.

⁴Karina te taibora, ao katokai b'aina nako i aona. Karina naba kaintein te taura, ao katokai taian taura i aona.

⁵Kaki te baonikarea ae e b'ain kabuokan te b'ai ni kaboiarara i matan te Um'antabunrianna.

⁶Kaki te baonikarea are b'ain kabuokan taiani karea i matan te Um'antabunrianna.

⁷Kaki te beetin n tebotebo i marenan te Um'antabunrianna ma te baonikarea, ao kanoaa nanona n te ran.

⁸Katea oona ni katobibia, ao katinetinea te keeten ni mataroana.

⁹Ao imwina, katabua te Um'antabunrianna ma b'aina nako ni katimtim'a i aona te b'aa are e tabu.

¹⁰I mwiina, katabua te baonikarea ma b'aina ni kabane ni katimtim'a te b'aa i aona, ao e na riki n tabu iai.

¹¹Ao katabua naba te beetin n tebotebo ma nangoana n te aro naba anne.

¹²Kanakomaia Aaron ma natina mm'aane nakon mataroan te Um'antabunrianna, ao tuangiia b'a a na tebokia.

¹³Karina kunnikain Aaron are te kunnikai n ibonga ao katabua, b'a e boni kaokoroaki iai n te aro anne b'a e aonga ni kona n riki b'a Au ibonga.

¹⁴Kanakomaia natina mm'aane, ao karin taiani kabaraaki i aoia.

¹⁵Ao i mwiina, katabuia n ai aron naba katabuan tamaia, b'a Au ibonga n aki toki mai mwiin te katabutabu aei.

¹⁶Ao e karaoi b'aai ni kabane Moote n aron are E baaireia te UEA.

¹⁷Ma ngaia are, e a tei raoi Ana Um'antabunrianna te UEA ike E memena iai ni moanibongin te moan nam'akaina n te kauoua n ririki i mwiin kitanakin Aikubita.

¹⁸Ao e uniki ana aana Moote, ao e katei iai taiani kai ao e kanim iai kaai ake a bangaki, ao e katei taiani boua.

¹⁹Ao e arora te rabuna i aon te Um'antabunrianna, ao e arora te rabuna are mai tinaniku i aona, n aron Ana mwioko te UEA.

²⁰Ao i mwiina, a anai atiibu ake baaba ni koroboki ake uoua, ao e karin i nanon te Atiniberita. E karin taiani kai n amo n taiani m'am'a ake n te Ati, ao e katoka mataia i aona.

²¹Ao i mwiina, e a karina te Ati i nanon te Um'antabunrianna, ao e katikaarake te keeten ni kainna. Ao anne arona ni kaina te Atiniberita, n aron are E a tia ni baaireia te UEA.

²²Ao e karina te taibora i nanon te Um'antabunrianna n tanimeang, i tinanikun te keeten,

²³ao e katokaa te kariki are te angab'ai nakon te UEA i aon te taibora, n aron are E a tia ni baaireia te UEA.

²⁴E karina kaintein te taura i nanon te Um'antabunrianna, n tainimainiku ni kaaitaraa te taibora,

²⁵ao e kauraa te taura ikekei i matan te UEA, n aron are E a tia ni baaireia te UEA.

²⁶E karina te baonikarea are te koora i nanon te Um'antabunrianna i matan te keeten,

²⁷ao e kabuoka te b'ai ni kaboiarara are e boiarara n aron are E a tia ni baaireia te UEA.

²⁸E katinea te keeten i mataroan te Um'antabunrianna,

²⁹ao e kaki te baonikarea i bukin kabuokan karea ni kabuokaki, ao te karea are te uita, n aron are E a tia ni baaireia te UEA.

³⁰E katuka te beetin n uaati i marenan te Um'antabunrianna ma te baonikarea, ao e kanoaia n te ran.

³¹Ao a teboki baiia ma waeiia ikekei Moote, Aaron ao natina mm'aane,

³²ni katoa riniia n te Um'antabunrianna, ke nakoia nakon te baonikarea, n aron are E a tia ni baaireia te UEA.

³³Ao e katea te oo Moote ni katobibia te Um'antabunrianna, ao te baonikarea, ao e katinetinea te keeten i mataroan te oo. Ao ai anne aroni Moote ni karaoa m'akurian te Um'antabunrianna.

³⁴Ao i mwiina ao e a rabuna te Um'antabunrianna ike E memena iai te UEA n te nang, ao e kaona nanona raaititin te UEA.

³⁵Ao e aki konaa n rin nako Moote nako nanon te Um'antabunrianna i bukin aei.

³⁶A na kona ni kam'ainga aia maeka Iteraera nakon te tabo teuana ti ngkana e m'aing nako te nang mai aon te Um'antabunrianna.

³⁷Ngkana e tiku n aki m'aing te nang arei, ao ngaiia a aki naba kam'ainga aia maeka.

³⁸I nanon aia tai ni m'am'ananga, ao a nonora te nang are E memena iai te UEA i buakoia i aon te Um'antabunrianna n te ngaina, ao te boua te ai n te tairiki.