Read Te B'aib'ara Te Otinako 5 Bible Online

Te Otinako 5 - Te B'aib'ara bible

Te Otinako 5

¹Ao a m'ananga Moote ma Aaron nakon uean Aikubita ao a tuangnga ni kaangai, “E taku te UEA ae te Atua, “Ko na kariaia Au aomata b'a a na nakon te rereua, b'a a aonga ni konaa ni karineai ni karaoa aia bootaki ni kukurei ikekei.”

²Ao e kaeka te uea ni kaangai, “Antai te UEA aei, ao bukin tera ngkai N na ongotaeka i Rouna? I rawa ni kanakoi ngkami ma ami aomata!”

³Ao a taku, “E a tia ni kaoti te UEA ae Atuaia Ebera nako ira. Ti butiiko b'a ko na kariaia b'a ti na nakonako i nanon tenibong nakon te rereua ike ti konaa n anga iai ara karea nako ina. Ngkana ko aki, ao e na oroira n te kangaanga ae e kakamaaku ke n te buaka.”

⁴Ao e taku te uea nakon Moote ma Aaron, “E aera ngkai kam na katoka m'akuriia aomata aikai? Kaokiia taani m'akuri aikai nakon aia m'akuri!

⁵E korakora riki m'aitimi nako ia kaain Aikubita, ao kam a manga aki m'akuri!”

⁶Ao n te bong naba anne are e a manga kanakoa ana taeka te uea nako ia aia mataniwi tooro ao mm'aane ake a tararuaia tooro ake Iteraera. Ao e taku:

⁷Akea te uteute ae kam na anganiia tooro b'a a na kamatoai aia buriki iai. Kairoroia b'a a na bon kakaei aia uteute n taabo n aki akaaka, [12]

⁸ma a na bon karaoa naba te m'aiti ni buriki n aron are a bon kaakaraoia mai m'aaina. A taningaroti, ke a aonga n aki manga butiai b'a N na kanakoia n anga karea nakon Atuaia.

⁹Kakorakora aia m'akuri b'a e aonga n aki reke aia tai n ongo nakon taian taeka ni kewe aikai.

¹⁰Ao a nako aia mataniwi tooro ao mm'aane ake taan tararuaia ao a tuangiia ni kaangai, “E taku te uea b'a ti na aki manga anganingkami te uteute.

¹¹Kam na kakaaea ami uteute n taabo n aki akaaka, ma kam na bon karaoa naba te m'aiti ni buriki n aron are mai m'aaina.”

¹²Ao a nakonako toro i aon Aikubita ni kabutaa ni kakaaea te uteute.

¹³Ma a tua matoa aia b'aoti nako ia ao a aki toki n taetae ni kaangai, “Kam na karaoi buriki ae m'aitin naba are kam kaakaraoia mai m'aaina ngke kam a anganganaki ngkoa te uteute.”

¹⁴Ao a kataereaki mataniwiia tooro irouia taiani b'aoti ao a taku, “E aera ngkai kam aki kairoroia tooro b'a a na karaoi buriki aika a m'aiti ngkoananoa ao n te bong aei n aron are a bon kaakaraoia mai m'aaina?”

¹⁵Ao n tokina mm'aane aika Iteraera ake a tararuaia tooro a m'ananga ni kawara te uea ao a taku, “E aera ngkai ko karaoa aei nako ira?

¹⁶Bon akea ae e anganiira te uteute, ao ti bon tuangaki naba b'a ti na boni karaoa te buriki ni m'aitin are ti kaakaraoia mai m'aaina. Ti oreaki n taiani kainikataere, ao a boni bure am aomata.”

¹⁷Ao e kaeka te uea ni kaangai, “Kam rangi n taningaroti, bon akea manenami b'a kam taningaroti! Ao bon anne bukina ngke kam aki toki ni buubutiai b'a N na kanakoi ngkami b'a kam na anga ami karea nakon Atuami.

¹⁸Naako okiri ami m'akuri, ma kam na bon karaoa naba te m'aiti ni buriki n aron are mai m'aaina.”

¹⁹Ao a namakinna mm'aane b'a a reke n te kangaanga ae korakora ngke a manga tuangaki naba b'a a na karaoa te buriki ni m'aitin are a kaakaraoia mai m'aaina ni katoa bong.

²⁰Ao ngke a tia ni kiitana te uea, a nako ni kawara Moote ma Aaron, ake a tataningaia.

²¹Ao a taku mm'aane akekei, “E a tia ngkai te UEA n iangoia b'a E na katuaaingkami ni kauoman ngkai kam a tia ni kauna te uea nako ira. Ao ngkai e nang tiringiira.”

²²Ao e kiitaniia Moote n nako n tataro ni kaangai, “Ara UEA e aera ngkai ko karokoa irouia Am aomata taiani kangaanga aika m'aiti? Bon aei bukin karokoaia ikai i Roum?

²³Ko tuangai ngkoa b'a N na taetae nakon te uea, ao akea te b'ai ae Ko karaoia ma ti karokoan te kangaanga nako ia aomata aikai. Ao Ko tuai man karaoa Am buobuoki.”