Read Te B'aib'ara Te Otinako 8 Bible Online

Te Otinako 8 - Te B'aib'ara bible

Te Otinako 8

¹E taku nakon Moote: Ko na nakon te bareti ao tuanga uean Aikubita au taeka b'a e na kanakoia au aomata, b'a aonga ni konaa n taromauriai.

²Ngkana e rawa, ao N na kaona abana ni kabane n taiani biraoki.

³Ko na kauringa naba te uea b'a e na onrake te Naire n taiani biraoki, ao mai ikanne are a na kaona naba ana bareti te uea, n reitaki ma ana ru ni matu te uea ao bon aon naba ana kainiwene. A na rin taian biraoki i nanon aia auti ana aobitia nako ao a na roko naba n taian ai n umum ao nako nanon taiani boora ni kabo buraawa.

⁴A na kawakawa taian biraoki i aoia aomata nako; te uea, ana aobitia, ao aomata ni kabane ake a riki b'a kaain Aikubita.

⁵N te tai aei, Moote e tuanga Aaron b'a e na taua ana kai i aon te ran. Ao i mwiina, a na tam'arake taian biraoki man taian karaanga ni kabane, taiani kanare, ao taian nei nako i aon Aikubita, ao a kaona aon te aba ni kabane.

⁶Ao e ongotaeka Aaron, ao a rina n roko taian biraoki ni kabuta aon Aikubita.

⁷Ma a kamanenaa m'aakaia taan tabunea ni karaoa te aekaki naba arei.

⁸Ao te uea e kanaanako ni weteia Moote ma Aaron ao e tuangiia ni kaangai, “Ngkana kam tuanga Atuami b'a e na anaia taiani biraoki aikai mai rou ao mai rouia au aomata, ao N na kariaia nakoia am aomata b'a a na anga karea nako im.”

⁹Ao e taku Moote, “Ko na kotea te tai are N na tataro iai i bukin taiani biraoki b'a a na toki man aki karauam, ma am aobitia, ao am aomata, ao b'a a na kitani ami auti ao a na ti noonoraki n te karaanga.”

¹⁰Ao e taku te uea, “Ko na karaoia nakon te ingabong. Ao e kukurei iai Moote ao e kaangai, “Ngkana ko tangiria. Ao a na bane aomata n ataia b'a bon akea riki te anti ae ai aron te UEA,

¹¹ao a na aki manga nooraki taian biraoki n taabo nako, ma ti i nanon te Naire.”

¹²I mwiin kitanan te bareti irouia Moote ma Aaron, ao e buubuti Moote nakon te UEA b'a e na katoka te biraoki are e a tia ni kanakoa b'a katuaean te uea.

¹³E ongo te UEA n ana tataro Moote, ao a mate taiani biraoki n taabo nako; i nanon taian auti, i tinanikun te auti, ao i nanon taian katawanang.

¹⁴A ikoikotaki taian biraoki ake a mate, ao e a m'aung te aba arei ni kabane.

¹⁵Ma ngke e nooria te uea b'a nako raoi b'aai nako, ao e a manga okira naba arona n aron are e a tia n taekinna te UEA ao e kamatoatoaa nanona n rawa n ongo iroun Moote ma Aaron.

¹⁶E taku te UEA nakon Moote, “Tuanga Aaron b'a e na orea te tano n okona, ao a na bane n riki bubun aontano i Aikubita b'a taian uti.”

¹⁷Ao a ongotaeka, ao ngke e orea aontano Aaron n okona, ao a kawakawa naba taian uti i aoia aomata ao taian man. Ni koauana, a boni bane n riki b'a taian uti bubun tanon Aikubita.

¹⁸Ao ngke a kataa m'aakaia taan tabunea ni karaoa naba arei, a bon aki konaa, ao a bon tiku naba taian uti i aoia aomata ma maan.

¹⁹Ao a tuanga te uea taan tabunea b'a bon te Atua ae E karaoia. Ma n aron are E a tia n taekinna te UEA, e bon teimatoa naba n aki kan ongo te uea.

²⁰E taku te UEA nakon Moote: N te moaningabong n ningabong, ngkana e tabe ni m'ananga te uea nakon te karaanga, ko na nako ni kaangai nako ina, ‘E taku te UEA b'a ko na kanakoia Ana aomata, b'a a aonga ni konaa n taromauriia.

²¹Ngkana ko aki, ao E na manga karokoi taian nango aika m'aiti b'a a na uuniko, ma am mataniwi, ao kaain abam ni kabane. A na bane n on taian auti, ao e na on aontano iai.

²²N na kamaiuia kaain te aono are Koten, ike a maeka iai au aomata, b'a e na akea te nango iai. N na karaoa aei b'a ko aonga n ataia b'a I bon mena naba n te aba aei Ngai ae te UEA.

²³N na karaoa te kaokoro i marenaia au aomata ma am aomata. E na koro bukin te kakai aei nakon te ingabong.’ ”

²⁴Ao E kakoroa raoi nanon ana berita te UEA, b'a E kaona te bareti ao mwengaia ana mataniwi te uea n taian nango aika m'aiti, ao e bane n rootaki aon te aba arei ni kabane.

²⁵Ao te uea e kanaanako ni weteia Moote ma Aaron ao e taku nakoia, “Kam na nako n anga ami karea nakon Atuami, ma kam na aki kiitana Aikubita.”

²⁶Ao e kaeka Moote, “E kangaanga karaoan anne i roura. A na bon matauninga kaain Aikubita ni b'aai ake ti na anga b'a ara karea nakon te UEA ae Atuara, ao tokina a na kareira n atiibu ni kamateira.

²⁷Ti na bon aki konaa ni karaoa anne! E a tia n tuangiira te UEA b'a ti na nakonako i nanon tenua te bong i nanon te rereua i m'aain ae ti anganna ara karea, ao bon anne bukina ngkai ti riai ni karaoa aei.”

²⁸Ao e taku te uea nako ina, “N na kariaia b'a kam na nakon te rereua n anga ami karea, ngkana kam aki kararoaingkami. Ma kam a tataro naba i buku.”

²⁹Ao e kaeka Moote, “Teuae ko karineaki, N na tataro i bukim n te tai are I nako iai, ao a na nako taian nango mai roum, ma am mataniwi, ao kaain abam n ningabong, Ko na bon aki kewe n te tai aei b'a ko na bon kanakoia ara aomata b'a a na anga karea nakon te UEA.”

³⁰Ao e tataro Moote ngke e a tia ni kiitana te bareti,

³¹ao e kaekaaki ana tataro iroun te UEA. Bon akea naba te nango temanna ae tiku n aki karaua te uea, ana mataniwi, ke aomata nako i Aikubita.

³²Ma e a manga taningamatoa naba te uea ao e aki roko n te kanakoia aomata.