Read Te B'aib'ara Iobi 1 Bible Online

Iobi 1 - Te B'aib'ara bible

Iobi 1

¹N ririki aika b'akanako, te aomata ae arana Iobi e maeka n te aba are Uti.[1] Bon te aomata ae moan te raoiroi, ao e raarawa ni karaoa te m'akuri ae buakaka.

²Bon iai natina m'aane aika itiman, ao teniman natina aine,

³ao iai naba ana man aika itiua te nga te tiibu, tenua te nga te kamero, teuana te nga te kao, ma a kabaeaki ni kakauoman. Bon iai naba ana taani m'akuri aika rangi ni m'aiti, ao bon ngaia naba te kabanea ni kaub'ai n aomata n aaba ake i mainiku.

⁴Ao aki toki natina m'aane ni bobooa aia baka n am'arake temanna i mwiin temanna, n te aro are a baneakina moa ana baka temanna, ao i mwiina manga temanna, ao a kaoiia m'aneia ake teniman b'a a na raoniia.

⁵E aki toki n ututi Iobi ni karangainan te bong are i mwiin aia baka natina akekei n anga ana karea i bukiia natina n tatabemaniia nako b'a aonga ni kaitiakaki. E kakaraoa aei i bukina ngke e tataku n ana iango b'a n ae e a tia natina temanna ni kamatauninga te Atua n tiaki nanona.

⁶Ao ngke e a roko te bong are a na bootaki iai kaaini karawa i matan te Atua, ao e mena naba Tatan i buakoia. [2]

⁷Ao e titirakinna te Atua ni kaangai, “Tera ae ko a bon kakaraoia Tatan?” Ao e taku Tatan, “Kai akea b'a te nakonako n aki akaaka n te aonnaba aei.”

⁸Ao E a manga taku te Atua, “Ao ko nonora Au aomata are Iobi? Bon akea te aomata temanna n te aonnaba ae kakaonimaki man raoiroi riki nako ina. E tataromauriai, ao e kabanea korakora b'a e na aki karaoa te m'akuri ae buakaka teutana.”

⁹Ao e taku Tatan, “Bukin terana b'a e na aki karineko Iobi?

¹⁰Ko aki toki ni kakawakinna ma ana utu ni kabane. Ko kakab'aiai b'aai ni kabane ake e karaoi, ao ko anganna ana kao aika m'aiti ni kaona te aba ae b'anin.

¹¹Ma ngkana Ko anai b'aai ni kabane ngkai mai rouna-ane na taetae n aki akaaka nako Im bon i reben taningam!”

¹²E taku te UEA nakon Tatan, “E tamaroa, a mena b'aai ni kabane akana i rouna i nanoni baim, ma ko na aki kaikoaka Iobi.” Ao e a nako Tatan.

¹³N te tai teuana ngke a tabe ni karaoa aia baka n am'arake natin Iobi n ana auti teuare te karimoa;

¹⁴ao akea b'a e biri n roko te tia uarongorongo temanna nakon Iobi ao e taku, “Ngke ti tabe ni kamaraua tanon te tawaana ma taiani kao m'aane, ao taian aati a mena n te tawaana n uteute ae uaakan,

¹⁵ao a karina naba n roko I-Teba[3] ni buakaniira ma n anai taiani kao ma aati ni kabane. A tiringiia am taani m'akuri ni kabane, ao bon ti ngai nikiraia. Bon ti ngai are I biri nako b'a N na tuangko.

¹⁶Ao i mwiin banen ana taeka, ao e a manga roko te tia m'akuri are temanna ao e taku, “E karokoa te iti mai karawa te Atua, ao e tiringiia taian tiibu ma taan kawakin tiibu ni kabane. Bon ti ngai nikiraia are I a biri nako b'a N na tuangko.”

¹⁷Ao i m'aiin banen ana taeka, ao e a manga roko te tia m'akuri are temanna ao e taku, “Tenikoraki aia koraki taian I-Kareria[4] ake a roko ni buakaniira ma n uoti nako taiani kamero, ao a tiringiia am taani m'akuri ni kabane, ao bon ti ngai nikiraia. Bon ti ngai are I a biri nako b'a N na tuangko.”

¹⁸Ao i mwiin banen a na taeka, ao e a manga roko te tia m'akuri are temanna ao e taku, “Ngke a tabe n am'arake ni kukurei natim n ana auti teuare te karimoa,

¹⁹ao e a roko naba te ang ae korakora man te rereua. E uka te auti ni kab'aka, ao a bane ni mate iai. Ao bon ti ngai nikiraia are I a biri nako b'a N na tuangko.”

²⁰Ao e teirake Iobi, ao e raeuai kunnikaina i bukin rawawatan nanona. E koromara atuuna, ao e b'aka ni boobaraaki i aontano, ao n taromauriia te Atua,

²¹Ao e taku, “I bungiaki ngkoa n akea au b'ai; ao N na manga mate naba ma akea au b'ai. E anganai au b'ai te UEA, ao ngkai E a manga anai. Ke E neboaki arana!”

²²E bon aki roko n te bure Iobi ni bukina te Atua ni b'aai ni kabane ake a tia n riki.