Read Te B'aib'ara Iobi 11 Bible Online

Iobi 11 - Te B'aib'ara bible

Iobi 11

¹E taku Toob'a mai Naama[16]

²“E koaua b'a akea ae na kaekai titiraki n nanobaba aikai ni kabane? E koaua b'a e kaeta te aomata te kab'araria?

³Iobi, Ko taku b'a ti aki kona ni kaekako? B'a am taetae ni b'ainingare, ti na aki kona ni kakarongoa ao ni kaekako iai?

⁴Ko taku b'a a koaua b'aai ake ko taekin, ao ko itiaki i matan te Atua?

⁵Tera ngke E kaekai am taeka te Atua!

⁶E na tuangko b'a a m'aiti iteran nako te rabakau, ao iai b'aai aika rangi n nano nakon wanawanan te aomata. E kauarerekea tuaam te Atua, ngke e bon riai ni korakora.

⁷Ko kona ni kunea tian ma tokin korakoran, ao m'aakan te Atua?

⁸E ataa tokin karawa te Atua, ma ko aki kona n rootia. E ataa abaia maate, ma ko aki ataia ngkoe.

⁹E buubura riki korakoran te Atua nakon te aonnaba, ao e raababa riki nakon marawa.

¹⁰Ngkana E katikiko te Atua ma ni kateiko n te bowi, ao antai ae na tuukia?

¹¹E ataia aomata aika akea manenaia te Atua, E noori aia m'akuri ni kabane aika buakaka.

¹²A na rikirake ni wanawana aomata aika nanobaba ngkana a bungiaki bunin aati aika katam'anti.

¹³Bita nanom Iobi ao nakon te Atua n tataro.

¹⁴Kanakoa te bure ma te buakaka man am auti.

¹⁵Ao manga katokamatam ma te nanomatoa ao te ninikoria.

¹⁶Ao a na bane ni mauna nako taian kangaanga man am iango, n ai aron taian ieka aika tia n nako ao a m'anuokinaki.

¹⁷E na oota riki maium nakon ootan te tawanou, ao a na oota kaanga te kaarangaina aoan maium ake a rangi n rotongitong.

¹⁸Ko na maiu ma te rau, ao e na reke am iango. E na kaawakiniko te Atua, ao E na anganiko te motirawa.

¹⁹Ko na aki maakuia am kairiribai; a na m'aiti aomata aika na bubuti buokaia mairoum.

²⁰Ma a na taratara nako aomata aika buakaka ni kakaea buokaia, ao a na kunea b'a bon akea te kawai are a na biri nako iai. Ti teuana aia kantaninga b'a kakantaningaan te mate.