Read Te B'aib'ara Iobi 12 Bible Online

Iobi 12 - Te B'aib'ara bible

Iobi 12

¹E taku Iobi nako ia raoraona:

²Eng, boni ngkami b'anaaia aomata. Ngkana kam mate, ao e mate naba te rabakau ma ngkami.

³I bon atai naba baikana kam atai, I aki babanga riki nako imi. A bane n ataaki baikana kam taekini.

⁴A ngareakinai naba n arou aei uaake bon raoraou; e ngae ngke I eti raoi n akea te b'ai ae I reke ni bukinaki iai. Bon iai ngkoa te tai ae kaekaekai iai au tataro te Atua.

⁵E aoria b'a are akea ami kaangaanga, ao kam a manga b'ainingareai. Kam a manga karawawata riki te aomata ae bon rawawata.

⁶A maiu ma te rau taani kimoa, ma aomata naba aika akea te b'ai ae a onimakinna, e ngae ngke a tia n atuani korakoraia.

⁷A boni kona naba mannikiba ma maan n reireiniko;

⁸titirakiniia manin aonteaba ma taari i bukin wanawanaia.

⁹A bane n ataia b'a E karaoia te UEA ni baina.

¹⁰Bon te Atua ae kairi maiuia Ana karikib'ai, a bane ni mena maiuia aomata i nanon m'aakana.

¹¹Ti katoong b'aai ni wiira, ao ti ongo b'aai n taningara,

¹²ao ti karekei rabakaura teutana mairouia aomata aika b'akanako aia ririki,

¹³ma bon te Atua boton te rabakau ma te korakora.

¹⁴Ngkana e urub'ai te Atua, akea ae kona ni manga kateia, akea naba ae kona ni kab'ara te aomata ae kainna te Atua n te karabuuti.

¹⁵E roko te rongo ngkana E taua te karau te Atua; a roko taian ieka ngkana E kanakoi taian ran.

¹⁶E korakora te Atua, ao E totokanikai n taai nako; a bane ni mena i aan m'akana aomata aika m'am'anaaki ma aomata naba aika taani m'am'ana te aba.

¹⁷E uoti nako rabakauia taan tautaeka, ao E karikiia taan kairiri b'a nanobaba.

¹⁸E kab'akaia uea man aia kaintokanuea, ao E karikiia b'a buure.

¹⁹E karinanoi nanoia ibonga, ao aomata aika iai te m'aaka i rouia.

²⁰E kaini wiia aomata aika onimakinaki, ao e uoti nako rabakauia unim'aane.

²¹E kamamaaia aomata aika taui taian nakoa aika rietaata, ao E katoki korakoraia taan tautaeka.

²²E kanakoa te oota nakon taabo aika rotongitong.

²³E karaoia botannaomata b'a a na korakora ma n rikirake, ao i mwiina E a manga kab'akaia ma ni kamaunaia

²⁴E kariki aia mataniwi b'a nanobaba, ao E katiotionakoia ni kam'aningaia, ao a noubaba.

²⁵A kakaenako baiia n te rotongitong, ao a raai waeia kaanga koro ni manging.