Read Te B'aib'ara Iobi 13 Bible Online

Iobi 13 - Te B'aib'ara bible

Iobi 13

¹I a tia n ongo mai m'aaina b'aai ni kabane akana kam taekini.

²I atai ni kabane. I bane n atai n ai arom. Kam aki wanawana riki nako Iu.

³Bon ti te b'ai i marenau ma te Atua, ao tiaki i marenau ma ngkami; I tangiria ni kauntaeka arou ma Ngaia.

⁴Kam rabuni bangabaimi n taiani kewe, kaanga ai aroia taokita ngkami aika aki kona ni kamaiuia aomata.

⁵Kam wanawana riki ngkana kam aki kakarongoa!

⁶Tai kakarongoa ngkana I kaeta taekau, ao kakauongo nakon au kauntaeka.

⁷E aera ngkai kam kewe? Tao kam taku b'a kam buoka te Atua n ami kewe?

⁸Ngkami ngkai ae kam na tei i bukin te Atua? Ngkami aika kam na kauntaeka i bukina n te kabowi?

⁹Ngkana tao E karaua n taraingkami te Atua, iai te b'ai ae raoiroi ae na kunea i roumi? Kam taku b'a kam kona ni bureburea te Atua n ai aron burebureaia aomata?

¹⁰E ngae ngkana kam tei i bukin te Atua ma iai nanomi ae nanonano ae raba, ao E na bon kaeti ngkami naba.

¹¹Ko na maaka mimitongin m'aakana.

¹²A na riki am taeka n rabakau aika akea maneia b'a kaanga taiani mannang. A na mamaara am kauntaeka kaanga te bokaboka.

¹³Tai karongoa ma karekea au tai n taetae moa. Ao ni kariaia b'aai ni kabane akana riki n aroia nako.

¹⁴N na bon tauraoi n anga maiu.

¹⁵A bane ni bua au kantaninga, ao tera ngkana arona b'a E tiringai te Atua? B'a N nang kaeta taekau nako Ina.

¹⁶Tao N na boni kamaiuaki ngkana I tei ni matoatoa i matan te Atua, ngkai bon akea aomata aika buakaka aika tauraoi ni kaitaraa te Atua.

¹⁷Kakauongo nakon te b'ai ae N na kab'arab'ara,

¹⁸I a tia ni katauraoa au taeka nakon te kabowi; b'a I ataia b'a bon akea au bure.

¹⁹Ko na tauraoi ni kaaitaraai n te kabowi, te Atua?” b'a ngkana Ngkoe, ao I tauraoi n aki taetae ao ni mate.

²⁰Taiaoka, b'a N na bubutiiko b'aai aika uoua, ao Ko na kariaia; N na bon aki kataia ni karabai nako Im.

²¹E a tau katuaaeau, ao an tai kamanatuaai n te b'ai ae kakamaaku.

²²Taetae moa Atuau, ao N na kaekako; ke kariaiai b'a N na taetae moa, ao Ko na kaekaai.

²³Tera au bure? Ao baika ra au kaairua? Ao tera au bure ae na baireaki taekau iai?

²⁴E aera ngkai Ko karabai matam mairou, ao Ko aranai b'a te kairiribai?

²⁵Ko kataia ni kakamaakai ma bon ti te banikai ngai ae akea korakorana. Ko buakanai ma bon ti te uteute ae m'auteretere ngai, ae akea arona.

²⁶B'a Ko katuaaeai ni baika a matoatoa, ao Ko karawawataai i bukin au bure ngkoa ngke te rikirake ngai.

²⁷Ko kabaei waeu n te b'ai ni kabaewae, ao Ko aki ti tabeakina nakonakou ma Ko kakatanem'anekai naba m'anekau.

²⁸I b'aka ni bo-rarabaua n ai aron te kai ae mka, ke kaanga te kunnikai ae kanna te koa.