Read Te B'aib'ara Iobi 15 Bible Online

Iobi 15 - Te B'aib'ara bible

Iobi 15

¹Ao e taku Eribati are te I-Teman, [17]

²E bon riai b'a e na kaeka te aomata n aki iango, ma ni kaonna n iango aika kabuebue?

³E bon riai b'a e na kauntaeka n taeka aika akea manenaia, ke n taeka aika akea uaaia aika raoiroi?

⁴Ko a karikiia aomata tabem'aang b'a a na kitana maakakin te Atua, ao ko katokiia man tataroan te Atua.

⁵A ootara mamaaram n am taeka, ma ko kataia ni karaba n am taeka n rabakau.

⁶E na boni kabuakakako wiim; tiaki ngai, ao bon matan riam naba aika na bukiniko.

⁷Ko taku n am iango b'a boni ngkoe te moani bungiaki mai buakoia aomata? Ke tao ko riki i m'aain karikan taiani maunga?

⁸Ko mena ikekei ngke E karaoi Ana babaire te Atua? Ti ngkoe ni wanawana? [18]

⁹Tera te b'ai ae ko ataia ae ti aki ataia? Ao tera ae ko mataata iai ae aki oota nanora iai?

¹⁰Ti karekei rabakaura mai rouia aomata aika iaia atuuia, koraki ake a kamani bungiaki i m'aain tamam.

¹¹E anganiko kabebeteam te Atua; tera bukina b'a ko totokoia? Ti taetae i bukina n te aro ae rau, ma taian taeka?

¹²Ma e onrake nanom n te aro n un, n te aro are a kan b'aka takaron matam;

¹³ma ngaia are ko ekaanako te Atua ma ni kaotinakoi taeka aika buakaka nako Ina?

¹⁴E koaua b'a e kona te aomata n itiaki? Bon iai ae kona ni kororaoi i matan te Atua?

¹⁵E bon aki onimakiniia naba Ana anera te Atua, ao a aki itiaki naba i matana,

¹⁶ao e nang kanga riki n onimakinaki te aomata ngkai bon te b'ai ae buakaka, ae akiako, ae e taka i bukin te buakaka.

¹⁷Ongora ngkai, Iobi nakon baika I atai, ao ko na reirei

¹⁸rabakau ake ataaki mairouia tabeman n taai ake ngkoa.

¹⁹A kainaomataaki abaia mairouia i anena, ao bon akea temanna ae roko ni kairiia nako mai roun te Atua.

²⁰E na bon kamarakaki ni uaa matena te aomata ae karawawataia aomata.

²¹A na mena i taningana taiani karongoa aika kakamaaku, A na bane n rau aomata ao bon ti ngaia ae na aki karauaki i rouia kam'arua.

²²Bon akea iangoan te kan otinako man te rotongitong i rouna, b'a bon tokina te mate i tabon te kabaang,

²³A tataninga mannikiba ake taiani ikare, b'a a na kana rab'atana. A ataia b'a e a kaan roko te rotongitong i rouna;

²⁴te kanganga, kanga ai aron te uea ae korakora, are tataningaia b'a e na buakaniia.

²⁵A riki baikai, b'a a tia ni kataia ni katokai baiia i aon te Atua, ma ni kataia ni kaaitaraa teuare moan te m'aaka.

²⁶E uota otangana, ao e biri ni buakana te Atua ma te aoburamaiu;

²⁷b'a e kun n nuonuo,

²⁸ma a maeka i buakon b'aai aika a uruaki ni kawa aika a akea kaaia.

²⁹A na bon aki bati a na b'ai, ao e na bon aki teimaan kaub'aina. E na bon aki nene wakaana n te aonnaba aei.

³⁰E na bon aki kona ni biri nako man te rotongitong, ao e na ukaki nako n ikeiken te Atua.

³¹Ke e tai onimakina rietaatana, b'a e kaawa ni kam'anea i bon i rouna, b'a e na bon okiria te kangaanga ngkana e taku i nanona b'a e rietaata.

³²Ane e na rai i m'aain rokon ana tai, ao a na aki riki baana i aon m'aangana.

³³Ane e na kamrarai uaana aika raraitaai n ai aron te kureebe, ao e na tetewenakoi ueena n ai aron te kai te oriwa.

³⁴A na kanoabo botaki n aomata aika akea atuaia, ao e na uruaki aia auti n rianna n te ai i rouia aomata aika babakanikawai.

³⁵Bon aikai aomata aika iaiangoi m'akuri ni kakiriwe aika buakaka. A onrake nanoia n taiani kewe.