Read Te B'aib'ara Iobi 16 Bible Online

Iobi 16 - Te B'aib'ara bible

Iobi 16

¹Ao e taku Iobi,

²“I a tia n ongo baikanne mai m'aaina, ao bon akea te kabebete ae kam anganai.

³Ma bukin tera ngkai kam aki toki ni karongoa? Tera te b'ai ae karika unimi?

⁴Ngke arona b'a I mena n tabo ane kam mena iai, ao e nang baiti te aro ni kabuakaka ke n anga taeka ni buobuoki.

⁵I kona ni kakorakorai ngkami ni wiiu, ao ni karekea te rau nako imi n au taeka.

⁶Ngkana I taetae, ke ni kainab'aabu, N na bon teimatoa n rawawata n tainako.

⁷E a tia te Atua n anaa korakorau; E a tia n tiringiia au utu ni kabane.

⁸E a tia n raweai, ao E a riki b'a au kairiribai. Ao I a tiku ni ngengenrii, ao bon anne kakoauaana i rouia aomata b'a te tia bure ngai.

⁹E raebitiai n unna, ao E ribaai; ao e kangengei wiina nako iu, ao e katokai matana au kairiribai nako iu.

¹⁰A bane n ureki reben mataia aomata nako Iu, ao a katobibiai ma n orotabaai.

¹¹E anga ngai te Atua nako nanon baiia aomata aika buakaka, ao E kaaki taekau i rouia aomata aika kam'araa.

¹²I bon maeka n rau, ma E roko n aki karauai. E koona roroau, ao E booa ketau. E kateai b'a a na b'ai n taakete.

¹³A katobibiai ana taani katebe, ao e teke marakin nuukau n ana kanoa ni katebe. Bon akea Ana nanoanga, ao E katiinakoa ariu i aontano.

¹⁴E aki toki uruan rab'atau, ao E buakanai n ai aron te tia buaka ae riribai n ana iango.

¹⁵I a kunnikaiai n te kunnikai te baeki, ao I tekateka ni konaaki i aontano. [19]

¹⁶E a ura moau i bukin te tang, ao a b'ata kunin matau.

¹⁷E ngae ngke bon akea te b'ai ae buakaka ae I a tia ni karaoia, ao a itiaki au tataro.

¹⁸Te aonnaba O, tai karabai taiani kaairua aika a tia ni karaoaki nako Iu. Ko na tai katoka tangiu i bukin te eti.

¹⁹Bon iai temanna i karawa ae na tei i buku.

²⁰A tinanikuai raoraou, ao a tiinako rannimatau nakon te Atua.

²¹I tangira temanna ae na tei ni kauntaeka ma te Atua i buku, kaanga aron temanna ae tei i bukin raoraona.

²²A tabe ni waaki nako au ririki ngkai, ao I m'ananga n te kawai ae aki manga okirikaaki.