Read Te B'aib'ara Iobi 17 Bible Online

Iobi 17 - Te B'aib'ara bible

Iobi 17

¹A mate au kantaninga, e a boo au tai, ao e tauraoi te rua ni mate i m'aaiu.

²A m'aiti aomata ake a b'ainingareai, ao I nooriia ngke a buakanai n te aro ae kakamaaku.

³Ngkana arona, b'a ko aki buokai te UEA, ao antai ae kona ni kaboa kainaomatakiu?

⁴Ko a tia ni kamatei nanoia b'a a na akea aia iango, ao tai katokanikaia i aou.

⁵N taian taeka n rabakau ngkoa ao te aomata e na kam'anea raoraona i bukin te m'ane, ao ane a na kainano natina.

⁶E a tia ni karikai b'a aia b'ai ni kabootau aomata, ao a roko ni baawarei ubu.

⁷Ao a rikirake ni mataki matau i bukin rawawatau, a rangi ni irariki baiu ma waeu n te aro are kaanga a nang aki reke nuuia.

⁸A rangi ni mimi aomata aika raoiroi n te baei, ao a taku b'a te aomata ngai ae akea atuau.

⁹E na bon aki toki waen te aomata ae raoiroi, ao e a rikirake ni korakora ma ni korakora ane e itiaki baina.

¹⁰Ma ngkana a bane n nakomai ao n tei i matau, ao N na bon aki kunea te aomata ae wanawana i buakoia.

¹¹A toki au bong ni maiu, ma au babaaire nako, ao e a uruaki au kantaninga.

¹²“Ao a atonga te bong b'a te ngaina raoraou; ngkana e a tabe n roo, ao a ngaiia a taku b'a e a tabe n oota.”

¹³I a tiku ma kakantaningaan abaia maate. N na arora kieu ni wene ikekei n te rotongitong.

¹⁴N na atonga te ruanimate b'a tamau, ao N na atongi ino ake a na kana rab'atau b'a tinau ao m'aneu.

¹⁵Tera te b'ai ae N na kantaningaia? Iai ae ata kanoan au bong aika na roko?

¹⁶Te kantaninga e na bon aki irai ngkana I ruo riikaki nakon abaia maate?