Read Te B'aib'ara Iobi 2 Bible Online

Iobi 2 - Te B'aib'ara bible

Iobi 2

¹Ngke e a manga roko te bong are a na bootaki iai kaaini karawa i matan te UEA, ao Tatan naba i buakoia [5]

²ao E taku te UEA nako ina, “Ko a nako maiaa ngkai Tatan?” Ao e taku Tatan, “Kai akea b'a te nakonako n aki akaaka n te aonnaba aei.”

³Ao e taku te UEA, “Tera am iango iroun au toro are Iobi? Bon akea temanna i aon te aba ae kakaonimaki ma n raoiroi riki nako ina. E tataromauriai, ao e kabanea korakorana n aki kakaraoa te m'akuri ae buakaka. Ko a tia ni imanonoai b'a N na kariaia b'a ko na kataia n akea bukina, ma e bon teimatoa naba Iobi n arona ni kakaonimaki.”

⁴Ao e taku Tatan, “Ane na bon kaaki taekan b'aai ni kabane te aomata i bukin iangoan maiuna.

⁵Ao iangoia b'a aongkoa ko kamaraka rab'atana, ane na taetae n aki akaaka nako Im bon i reben matam!”

⁶Ao E taku te UEA nakon Tatan, “E raoiroi, e mena taekana ngkai i nanoni baim, ma ko riai n aki tiringnga.”

⁷Ao e nako Tatan mai matan te UEA, ao e kariki taiani kaboa i aon rab'atan Iobi ni kabuta.

⁸Ao e nako Iobi n tekateka i rarikin te tabo ni maange, ao e anaa te maibi ni katiibu ni kakaara iai kaboana.

⁹Ao e taku buuna, “Ae ko bon teimatoa naba ni kakaonimaki? E aera ngkai ko aki taetae n aki akaaka nakon te Atua, b'a ko bon aoria ni mate?”

¹⁰Ao e kaeka Iobi, “Ko taetae ni baba. Ngkana E anganiira baika raraoi te Atua, ao ti kariaia, ao e aera ngkai ti na ngurengure ngkana E anganiira taiani kangaanga?” Bon akea te b'ai ae taekinna Iobi ni kaaitaraa te Atua i bukin kamarakakina aikai ni kabane.

¹¹Raoraon Iobi ake teniman bon Eribati man te kaawa ae buubura are Teman, Biretata man te aba are Tua, ao Toob'a man te aba are Naama. Ngke a ongo rawawatan Iobi, ao a iangoa m'anangaia ni kawaria ni kabebetea nanona. [6]

¹²Ao a kaman noora Iobi ma ngke a mena i keraroa ma aki kinaa, ma ngke a kinaa ao a moana tanginiweneia ma tangiia ni korakai. A raeuai aia kunnikai i bukin rawawataia, ao a tetewerakei taiani mannang nako eta i aon atuuia.

¹³Ao i mwiina, a uaia n tekateka ma ngaia i aon te tano i nanon itiua te bong ao te ngaina n aki kakarongoa, i bukina ngke a bon noora rawawatana.