Read Te B'aib'ara Iobi 22 Bible Online

Iobi 22 - Te B'aib'ara bible

Iobi 22

¹Ao e taku Eribati, [22]

²“Tera boongara ngaira aika aomata, nakon te Atua, ao ngaira maibuakora ake kabanea ni wanawana?

³Ngkana bon akea am bure, e na bon akea naba nanon aio iroun te Atua ae moan te M'aaka?

⁴E koaua b'a E boaiko i bukina ngkai ko tataromauria?

⁵Tiaki ngaia anne, ma E karaoa anne i bukina ngke bon te tia bure ngkoe.

⁶I bukin kabaean tarim b'a e na kabooa mwiin te m'ane are e taarauia i roum, ao ko anaa kunnikaina, ao ko katikua ma akea kunnikaina.

⁷Ko rawa n anga te kariki ma te ran nako ia aika baki mani kani mooi.

⁸Ko kamanena m'aakam ma nakoam n taua aonteaba ni kabane.

⁹Ko aki ti rawa ni buokiia aine aika mate buia, ma ko iraei naba aia b'ai ataei ake akea aia karo, ma ni karawawataia.

¹⁰Ao ngkai a otab'aniniiko taian rua, ao ane ko na onrake n te maaku n te tai ae waekoa.

¹¹E roko te rotongitong ae ko aki kona n noora iai te b'ai teuana, ao e rabuniko te ieka.

¹²E koaua b'a E aki maeka te Atua i karawa are te kabanea n rietaata, ao E baraaki n tarai aon taiani itoi, e ngae ngke a bon rietaata naba.

¹³Ma kam taku, “B'a tera ae na ataia te Atua? E aki kona ni motika taekan temanna b'a a raba matana n taian nang aika rotongitong.

¹⁴Kam taku b'a e toki ana taratara n taian nang aika matenten ngkana E tabe n nakonako i aon mronronin karawa.

¹⁵Ko tabe ni iangoa te toui kawaia aomata aika buakaka?

¹⁶A uotaki nako n te ieka e ngae ngke a tuai n roko aia tai.

¹⁷Aikai aomata aika rarawa nakon te Atua, ake a taku b'a akea te b'ai ae E kona ni karaoia te Atua nako ia.

¹⁸Ma bon te Atua ae kabatiai aia b'ai I aki kona n atai aia iango ni baba.

¹⁹A kukurei aomata aika raoiroi, ao a ngarengare aika akea aia bure ngkana a nooria aomata aika buakaka ngkana a katuaaeaki.

²⁰A bane ni kamaunaaki ana b'ai te aomata ae buakaka, ao e kababanei ni kabuoki nikiran b'aai te ai.

²¹Iobi, Ko riai ngkai n ioki ma te Atua, ma ni katoki arom nako Ina aika ai aron ana m'akuri te kairiribai; b'a ngkana ko karaoa aei, ao E na kakab'aiako.

²²Butim'aai reirei ngkana E anga; kawakin Ana taeka i nanom.

²³Okira te Atua ma te nanorinano, ao katoki b'aai ni kabane aika buakaka ake a kakaraoaki i nanon am auti.

²⁴Karenakoa am koora; tewenakoi ake a rangi n raoiroi i buakon atiibun kabin te karaanga ae m'auteretere.

²⁵Karika te Atua ae m'aaka b'a am koora, ke te tirewa, ae uatao rake.

²⁶Ao ane na kaoniko te Atua n te kukurei, ao ko na tararake nako Ina ma te aki mamaa.

²⁷E na kaeka am tataro ngkana ko tataro nako Ina, ao ko na kaawakina am berita are ko karaoia nako Ina.

²⁸A na kokororaoi bukin b'aai ni kabane aika ko karaoi; ane na oota te oota i aon kawaim nako.

²⁹E kab'akaia aika kainikatonga te Atua, ao E kamaiuia aika nanorinano.

³⁰E na boni kamaiuko ngkana akea am bure, ngkana e bon eti te b'ai ae ko karaoia.