Read Te B'aib'ara Iobi 23 Bible Online

Iobi 23 - Te B'aib'ara bible

Iobi 23

¹Ao e taku Iobi,

²“I bon teimatoa naba ni kaaitaraa te Atua, ma ni kauntaeka nako Ina. I bon aki kona ni katoka ngurengureu.

³Tera ngke I ata te tabo ike E mena iai, N na kona iai n roko n te tabo are E mena iai.

⁴B'a N na kaoti ngurengureu i matana, ma n tabeki tangiu ni kabane nako Ina.

⁵Ao n te aro anne, ao E na taetae nako iu, ao N na atai ana taeka.

⁶E koaua b'a E na kabanea korakorana ni kaaitaraai? E aki, ma E na bon ongora nakon te b'ai ae N na taekinna.

⁷Ngkana e roko te tai arei, ao E na bon ongora ni ngurengureu ngkai bon te aomata ngai ae I b'ab'aina te eti; ao au tia motikitaeka ae te Atua, E na anganai te inaomata ae akea tokina, ao E na katanoataai b'a te aomata ngai ae akea ana bure.

⁸I a tia ni kakae i mainiku, ma bon akea te Atua ikekei; ao I bon aki kunea naba ngke I kakaae i maeao.

⁹E a tia ni m'akuri te Atua i meang, ao i mainiku, ma I bon tuai naba man nooria.

¹⁰Ma e ngae n anne, ao E atai m'anekau ni kabane te Atua; ao ngkana E kataai, ao E na bon kakoauaai b'a bon akea au bure.

¹¹I toui m'anekana ni kabane, ao I tuai man rairakinako mai iai.

¹²I karaoi Ana mwioko ni kabane ake E tuangai b'a N na karaoi.

¹³E aki kona ni bitaki; bon akea ae kona n rairia, ke ni katokia man karaoan te b'ai are E tangiria

¹⁴E na bon kakoroa bukin te b'ai ae E iangoia i buku; are bon teuana mai buakon Ana iango.

¹⁵I ruru ni maaku i matana, ao ngkana I karaua ni iangoa te Atua, ao I onrake n te maaku.

¹⁶E a tia n urua ninikoriau te Atua ae m'aaka,

¹⁷ao I kainaki i nanon te ianroo, ao e rabuna matau te rotongitong.