Read Te B'aib'ara Iobi 24 Bible Online

Iobi 24 - Te B'aib'ara bible

Iobi 24

¹E aera te Atua ngkai E aki karekea te tai ni motikitaeka, te bong i bukin karaoan te eti nako ia aomata aika toro i Rouna.

²A kam'aei tian aaba aomata ni kaiabai; a iraei tain tiibu, ao a kamenaki i buakon aia nanai.

³A anai aia aati ataei aika akea aia karo, ao a taua ana kao m'aane te aine ae mate buuna ni karokoa b'aran ana taarau te aine anne.

⁴A tuuka reken te eti nako ia aomata aika kainano, ao a imanonoia aomata aika akea aia b'ai b'a a na bon karabaia mai rouia taan karawawataia aomata.

⁵Ma ngaia are a ukoukora kanaia aomata aika kainano, i nanon te rereua n ai aroia taian aati aika katam'anti.

⁶A taii uaan taian tawaana aika aki uniki, ao a rikoi uaan kureebe n aia nne n aroka aomata aika buakaka. [23]

⁷A matu n aki rabuniia n te tairiki; akea te b'ai teuana ae a kamanoi iai rab'ataia man te m'aitoro.

⁸A m'aim'ai n te karau are b'aka i aon taiani maunga, ao a karabaia i rarikin taiani b'a ni kamanoia iai.

⁹A karaoia ataei aika akea aia karo b'a aia toro aomata aika buakaka, ao a anai natiia aomata aika kainano b'a kab'araan aia taarau tamaia.

¹⁰Ma ngaia are, a nakonako aomata aika kainano ma akea kunnikaiia are a na katana rab'ataia iai, ao a taia te uita i bukiia tabem'aang.

¹¹A tawakaia te uita ni kanakoa b'aana i nanon aia tabo n ongirib'a aomata aika kaub'ai, ao a toutou kureebe i bukin te wain, ma te taka ae korakora i rouia.

¹²A tang aomata aika ikoaki ma aika kani mate i nanon taiani kaawa, ma E aki kaekai aia tataro te Atua.

¹³Iai aomata aika ririiba te oota; a rawa n nakonako i nanon te kawai ae oota.

¹⁴E kautinako n te kaarangaina te tia tiriaomata n tiringa te aomata ae kainano, ao e a manga kimoa n te tairiki

¹⁵E tataninga te moan tairiki te aomata ae te tia wene ni bure; e rabuna matana b'a e aonga n aki nooraki i roun temanna.

¹⁶A nini auti taani kimoa n te tairiki, ao a karabaia n te ngaina ni b'angaia i nanon te tabo ae akea te oota iai.

¹⁷A mamaaka ootan te ngaina, ao bon akea maakakin te rotongitong i rouia.

¹⁸Ao e taku Toob'a, “E uotaki nako te aomata ae buakaka n te ieka, ao e kamaraiaaki ana buakonikai i roun te Atua; e aki kona ni manga nakoni nnen arokana te kureebe.

¹⁹Kaanga ai aron te tinoo ngkana e mauna nako n te kabuebue ma bongin te m'auteretere, ao ai aron naba te tia bure b'a e na mauna nako man abaia aika maiu.

²⁰E na bon aki ururingnga naba are bon oin tinana. E na kanaki i rouia ino ma ni kamaunaaki n ai aron te aroka ae einako ni b'aka.

²¹E riki anne nako ina i bukina ngke e aki karaoa ae riai nako ia aine aika mate buuia, ao e aki akoia aine aika akea natiia.

²²E kamaunaia aika korakora ni m'aakana. E m'akuri te Atua, e mate te aomata ae buakaka.

²³E bon anganna te maiu raoi ti i nanon tabeua te tai, ma E bon tarataraia n taai nako.

²⁴E rikirake kab'aian te aomata ae buakaka, ma e a manga rai n ai aron te uteute, kaanga ai aron te kai ae uangingi are a tia ni koreaki.

²⁵Iai ae kona ni kakewea aei? Iai ae kona ni kakoaua b'a e kewe au taeka?